Lucas 13:1-35
13 Taal túun jujuntúul máakoʼobeʼ ka tu tsikbaltoʼob tiʼ Jesús bix úuchik u kíimsaʼal jujuntúul galileoʼob tumen Pilato, lelaʼ tu beetaj le táan kaʼach u kʼubkoʼob kíimsbil baʼalcheʼoboʼ.
2 Jesús túuneʼ tu yaʼalajtiʼob: «A tuklikeʼexeʼ, ¿úuch wa tiʼob tumen maas j-kʼeban máakoʼob ke u maasil galileoʼoboʼ?
3 Maʼ, maʼ beyiʼ. Teneʼ kin waʼalikteʼexeʼ wa maʼ ta kʼexik a tuukuleʼexeʼ yaan xan a láaj kíimleʼex.+
4 Le 18 máakoʼob xan kíimoʼob le ka lúub u torreil Siloam tu yóokʼoloʼobeʼ, a tuklikeʼexeʼ, ¿maas wa yaʼab u kʼebanoʼob ke tuláakal u kajnáaliloʼob Jerusalén?
5 Maʼ, maʼ beyiʼ. Teneʼ kin waʼalikteʼexeʼ wa maʼ ta kʼexik a tuukuleʼexeʼ yaan xan a láaj kíimleʼex jeʼex úuchik tiʼ letiʼoboʼ».
6 Tsʼoʼoleʼ tu tsikbaltajtiʼob lelaʼ: «Juntúul máakeʼ u pakʼmaj kaʼach junkúul higuera tu parcela, ka bin u yil wa yaan u yicheʼ mix junpʼéel tu kaxtiʼ.+
7 Ka tu yaʼalaj tiʼ le máax meyajtik le parcelaoʼ: ‹Ilawile, tsʼoʼok tres años káajak in taal in wil wa yaan u yich le higueraaʼ, chéen baʼaleʼ mix junpʼéel u yich in wile. ¡Kúulchʼakte! Tumen wa maʼeʼ le luʼumoʼ maʼ tu páajtal u meyaj utiaʼal yaanal baʼal›.
8 Le máakoʼ tu yaʼalajtiʼ: ‹In tsʼuulil, chaʼa u pʼáatal xan teʼ añoaʼ utiaʼal ka in péeks u luʼumil u baʼpach yéetel ka in tsʼáa u taʼ baʼalcheʼ tu chuun.
9 Wa ku yichankil kéen máanak kʼiineʼ ka pʼatik, chéen baʼaleʼ wa maʼ tu yichankileʼ ka kúulchʼaktik›».+
10 Tiʼ junpʼéel u kʼiinil sábadoeʼ Jesúseʼ táan kaʼach u kaʼansaj tiʼ junpʼéel sinagoga.
11 Teʼeloʼ tiʼ yaan kaʼach juntúul koʼolel tsʼoʼok 18 años beetaʼak u kʼojaʼantal tumen juntúul demonioiʼ. Le koʼolelaʼ wuutsʼul u paach yéetel junpuliʼ maʼ tu páajtal u toj waʼatal.
12 Ka tu yilaj Jesús le koʼoleloʼ tu yaʼalajtiʼ: «Koʼolel, beoraaʼ tsʼoʼok a wutstal tiʼ le baʼax beetik a kʼojaʼantaloʼ».+
13 Jesúseʼ tu tsʼáaj u kʼab yóokʼol le koʼoleloʼ letiʼ túuneʼ tu séebaʼanil toj waʼalaji, ka joʼopʼ u alabartik Dios.
14 Chéen baʼaleʼ u nojchil le sinagogaoʼ tumen kʼuuxilnajaʼan úuchik u tsʼaʼakal le koʼolel tumen Jesús tu kʼiinil sábadooʼ káaj u yaʼalik tiʼ le yaʼabkach máakoʼoboʼ: «Seis kʼiinoʼob yaan utiaʼal u meyaj máak,+ teʼ kʼiinoʼob túunaʼ taalakeʼex utiaʼal ka tsʼaʼakakeʼex, chéen baʼaleʼ maʼ a taaleʼex tu kʼiinil sábado».+
15 Yuumtsil Jesús túuneʼ tu núukajtiʼ: «J-kaʼapʼéel icheʼex,+ tu kʼiinil sábadoeʼ, ¿maʼ wa cada juntúul tiʼ teʼexeʼ ku wachʼik u yalakʼ wakax wa u yalakʼ burro teʼ tuʼux u kʼaxmaj utiaʼal ka u bis u yukʼ jaʼoʼ?+
16 Le oʼolaleʼ le koʼolel u hija Abrahán tsʼoʼok 18 años maʼachak tumen Satanásoʼ, ¿maʼ wa túun maʼalob úuchik u jáalkʼabtaʼal tu kʼiinil sábadoiʼ?».
17 Ka tsʼoʼok u yaʼalik lelaʼ tuláakal le máaxoʼob pʼekmiloʼ sen suʼlakchajoʼob, chéen baʼaleʼ le yaʼabkach máakoʼob u muchʼmubaʼoboʼ sen kiʼimakchaj u yóoloʼob tu yoʼolal tuláakal le nukuch baʼaloʼob tu beetoʼ.+
18 Jesúseʼ tu yaʼalaj xan tiʼob: «¿Tiʼ baʼax chíikaʼan u Reino Dios? ¿Wa baʼax yéetel jeʼel in comparartikteʼexeʼ?
19 Chíikaʼan tiʼ junpʼéel u semillail mostaza chʼaʼab tumen juntúul máakeʼ ka tu pakʼaj tu parcela. Le semilla túunaʼ káaj u nojochtal ka kʼuch tak u beetuba junkúul nojoch cheʼ, le chʼíichʼoʼob túunoʼ tu beetaj u kʼuʼob tu kʼaboʼob».+
20 Jesúseʼ tu kaʼa aʼalaj: «¿Yéetel baʼax jeʼel in comparartikteʼex u Reino Dioseʼ?
21 Bey jeʼex le levadura tu chʼaʼaj juntúul koʼolel utiaʼal u xaʼakʼtik kex yéetel diez kilos harinaoʼ. Ka tsʼoʼokeʼ siʼipʼ tuláakal le juuchʼoʼ».+
22 Le táan u bin Jesús Jerusalénoʼ máan kajalkaaj bey xan tiʼ mejen kajtaliloʼob táan u kaʼansaj.
23 Juntúul máak túuneʼ tu kʼáatajtiʼ: «Yuumtsil, ¿junpʼíit wa le máakoʼob ken u salvartubaʼoboʼ?». Letiʼeʼ tu yaʼalajtiʼob:
24 «Beeteʼex tuláakal le ku páajtal utiaʼal a wookleʼex tiʼ le nuʼunutʼ joonajoʼ,+ tumen kin waʼalikteʼexeʼ yaʼabeʼ yaan u taaktal u yookloʼobiʼ, chéen baʼaleʼ maʼ kun béeytal u beetkoʼob.
25 Tsʼoʼoleʼ le kéen líikʼik u yuumil naj u chʼot le joonajoʼ teʼexeʼ yaan a pʼáatleʼex waʼatal táankab yéetel yaan a kʼoopeʼex táan a waʼalikeʼex: ‹Yuumtsil, jeʼekʼabttoʼon joonaj›.+ Chéen baʼaleʼ letiʼeʼ yaan u yaʼalikteʼex: ‹Maʼ in kʼaj óoleʼexiʼ›.
26 Teʼex túuneʼ yaan a waʼalikeʼex: ‹Si toʼoneʼ kulajoʼon janal ta wéetel, tsʼoʼoleʼ kaʼansajnajech tu kóokoch bejiloʼob k-kaajal›.+
27 Chéen baʼaleʼ letiʼeʼ yaan u yaʼalikteʼex: ‹Kʼasaʼan máakeʼex, maʼ in kʼaj óoleʼexiʼ. ¡Náachkuntabaʼex tiʼ teen!›.
28 Le kéen a wileʼex tiaʼan Abrahán, Isaak, Jacob yéetel le profetaʼob tu Reino Diosoʼ yaan a wokʼoleʼex yéetel yaan a karachʼtik a kojeʼex tumen teʼexeʼ jóoʼsaʼaneʼex táankab.+
29 Tsʼoʼoleʼ yaan u taal yaʼab máakoʼob tu tojil lakʼin, chikʼin, xaman bey xan noojol,* yéetel yaan u kutaloʼob yiknal le mesa teʼ tu Reino Diosoʼ.
30 Tsʼoʼoleʼ ¡ilawileʼex!, yaan tiʼ le máaxoʼob yanoʼob táaniloʼ yaan u pʼáatloʼob tu tsʼook, yéetel yaan tiʼ le yanoʼob tu tsʼookoʼ yaan u máanoʼob táanil».+
31 Jach teʼ súutuk jeʼeloʼ jujuntúul fariseoʼobeʼ náatsʼoʼob yiknal Jesúseʼ ka tu yaʼaloʼobtiʼ: «Jóokʼkech, xeen, tumen Herodeseʼ taak u kíimskech».
32 Jesúseʼ tu yaʼalajtiʼob: «Xeen a waʼaleʼex tiʼ le chʼomakoʼ:* ‹¡Ilawile! Bejlaʼeʼ táan in jóoʼsik demonioʼob tiʼ le máakoʼoboʼ yéetel táan in tsʼakikoʼob, bey xan sáamal, chéen baʼaleʼ kaʼabejeʼ yaan u tsʼoʼokol in meyaj›.
33 Teneʼ yaan u seguer in viajar bejlaʼeʼ, sáamal bey xan kaʼabej tak ken kʼuchken Jerusalén tumen juntúul profetaeʼ maʼ unaj u kíimsaʼal paachil tiʼ Jerusaléniʼ.+
34 Jerusalén, Jerusalén, techeʼ ka kíimsik le profetaʼoboʼ yéetel ka muruxtuntik le máaxoʼob ku túuxtaʼaloʼob ta wiknaloʼ...,+ ¡teneʼ yaʼab u téenel tin tratartaj in muchʼkíint a paalal jeʼex u muchʼkíintik u mejnil le x-nuk kaax yáanal u xiikʼoʼoboʼ! Chéen baʼaleʼ teʼexeʼ maʼ ta wóoteʼexiʼ.+
35 Le oʼolal yaan u xúumpʼattaʼal a wotocheʼex.+ Kin waʼalikteʼexeʼ maʼ ken a kaʼa ileneʼex tak ken kʼuchuk u kʼiinil a waʼalikeʼex: ‹¡Alabartaʼak le máax ku taal tu kʼaabaʼ Jéeobaoʼ!›».+
