Lucas 18:1-43
18 Jesúseʼ utiaʼal u yeʼesik tiʼ u discípuloʼob baʼaxten unaj u oraroʼob mantatsʼ yéetel maʼ u xuʼulul u beetkoʼobeʼ tu tsikbaltajtiʼob lelaʼ:+
2 «Tiʼ junpʼéel kaajeʼ yaan kaʼach juntúul juez maʼ u chʼaʼamaj saajkil tiʼ Diosiʼ yéetel maʼatech u chʼaʼik óotsilil tiʼ mix máak.
3 Teʼ kaaj xanoʼ yaan kaʼach juntúul koʼolel kimen u yíichamiʼ, letiʼeʼ maʼ tu xuʼulul kaʼach u bin u yaʼal tiʼ le juezoʼ: ‹Ilawil ka beetaʼakten justicia yoʼolal le baʼax ku beetaʼaltenoʼ›.
4 Tu káajbaleʼ le juezoʼ maʼ tu yóotiʼ, chéen baʼaleʼ ka tsʼoʼokeʼ káaj u tuklik: ‹Kex maʼ in chʼaʼamaj saajkil tiʼ Dios yéetel kex maʼatech in chʼaʼik óotsilil tiʼ mix máakeʼ
5 yaan in wilik ka beetaʼak justicia tiʼ le koʼolelaʼ, tumen sáamsamal táan u taal u molestarten. Wa maʼ in beetkeʼ yaan u náaksik in wóol yéetel le baʼaxoʼob maʼ tu xuʼulul u kʼáatkoʼ›».+
6 Yuumtsil túuneʼ tu yaʼalaj: «¿Ta wuʼuyeʼex baʼax tu yaʼalaj le juez kex kʼasaʼan máakoʼ?
7 Kux túun Dios, ¿maʼ wa maas jeʼel u beetik justicia tiʼ le máaxoʼob u yéeymoʼ? Kex táan u kʼáat óolaloʼob tiʼ letiʼ bul kʼiin yéetel bul áakʼabeʼ+ letiʼeʼ maʼatech u náakal u yóol tiʼ letiʼob.+
8 Kin waʼalikteʼexeʼ Dioseʼ tu séebaʼanil ken u yil ka beetaʼakteʼex justicia. Chéen baʼaleʼ kéen kʼuchuk u Paal máakeʼ, ¿jach wa tu jaajil yaan u kaxtik máakoʼob way luʼum yaantiʼob junpʼéel fe beyaʼ?».
9 Tiʼ jujuntúul máakoʼob ku tuklikoʼob jach maʼalob baʼax ku beetkoʼob yéetel ku taaskoʼob mix baʼalil u maasil máakoʼobeʼ letiʼeʼ tu tsikbaltajtiʼob lelaʼ:
10 «Kaʼatúul máakoʼobeʼ binoʼob orar teʼ templooʼ, juntúuleʼ fariseo yéetel uláakʼ juntúuloʼ ku cobrartik impuesto.
11 Le fariseooʼ waʼalajeʼ ka joʼopʼ u orar ichil u puksiʼikʼal táan u yaʼalik: ‹In Dios, kin tsʼáaiktech gracias tumen maʼ beyen jeʼex le máakoʼob ku yookoloʼoboʼ, jeʼex le kʼasaʼan máakoʼoboʼ, le máakoʼob ku tusik u núupoʼoboʼ,* yéetel tumen maʼ beyen jeʼex le máak ku cobrartik impuestoaʼ.
12 Teneʼ kin ayunar kaʼatéen tiʼ junpʼéel semana yéetel kin tsʼáaik u diezmoil tuláakal le baʼaxoʼob ku yantaltenoʼ›.+
13 Chéen baʼaleʼ le máak cobrartik impuestooʼ náach pʼáat waʼatal yéetel maʼ u kʼáat mix tak u líiʼs u yich teʼ kaʼanoʼ, baʼaxeʼ táan kaʼach u loxik u tseem yéetel táan kaʼach u yaʼalik: ‹Kiʼichkelem Yuum, chʼaʼten óotsilil, tumen j-kʼeban máaken›.+
14 Kin waʼalikteʼexeʼ le máakaʼ ka lukʼ teʼ templooʼ maas maʼalob yanil tu táan Dios ke le fariseooʼ.+ Le máax ku taaskuba nojbaʼalileʼ yaan u mixbaʼalkúuntaʼal, chéen baʼaleʼ le máax ku mixbaʼalkúuntkubaeʼ yaan u nojbaʼalkúuntaʼal».+
15 Le máakoʼob túunoʼ káaj u taaskoʼob u mejen paalaloʼob tu yiknal Jesús utiaʼal ka u bendecirtoʼob, chéen baʼaleʼ le discípuloʼoboʼ le ka tu yiloʼob lelaʼ káaj u kʼeykoʼob le máakoʼoboʼ.+
16 Pero Jesúseʼ tu tʼanaj le mejen paalaloʼob tu yiknaloʼ, ka tu yaʼalaj tiʼ u discípuloʼob: «Maʼ a kʼatikeʼex u beel le mejen paalaloʼ, chaʼex u taaloʼob tin wiknal, tumen u Reino Dioseʼ u tiaʼal máakoʼob jeʼex letiʼobeʼ.+
17 Tu jaajil kin waʼalikteʼexeʼ le máax maʼ tu kʼamik u Reino Dios jeʼex u beetik juntúul chan paaleʼ junpuliʼ maʼ kun ookliʼ».+
18 Juntúul gobernanteeʼ tu kʼáataj tiʼ Jesús: «Utsul j-Kaʼansaj, ¿baʼax kʼaʼabéet in beetik utiaʼal in kʼamik kuxtal minaʼan u xuul?».+
19 Jesúseʼ tu yaʼalajtiʼ: «¿Baʼaxten ka waʼalik utsen? Mix máak uts, chéen Dios.+
20 Techeʼ a wojel le Leyoʼ ku yaʼalik: ‹Maʼ a tusik a núup,*+ maʼ a kíimsik máak,+ maʼ a wookol,+ maʼ a tuus kéen a beet a testigoil tiʼ wa baʼax,+ yéetel unaj a respetartik a papá yéetel a maama›».+
21 Le máakaʼ tu yaʼalaj: «Tuláakal lelaʼ desde tin chichnil kin beetik».
22 Le ka tu yuʼubaj Jesús lelaʼ tu yaʼalajtiʼ: «Láayliʼ yaan junpʼéel baʼax ku bineltik a beetkeʼ: kon tuláakal le baʼaxoʼob yaantechoʼ ka a síi u tojol tiʼ le óotsiloʼoboʼ, beyoʼ yaan u yantaltech ayikʼaliloʼob teʼ kaʼanoʼ. Le kéen tsʼoʼokkeʼ ka taal tin paach».+
23 Le ka tu yuʼubaj lelaʼ le máakoʼ lúub u yóol, tumen jach ayikʼal kaʼachi.+
24 Jesús túuneʼ tu paktaj le máakoʼ ka tu yaʼalaj: «¡Jach túun istikyaj kun ookloʼob tu Reino Dios le máaxoʼob yaan taakʼin tiʼoboʼ!+
25 U jaajileʼ maas séeb jeʼel u máan juntúul camello tu chan joolil junpʼéel u púutsʼil chuuyeʼ ke ka okok juntúul ayikʼal máak tu Reino Dios».+
26 Le máaxoʼob uʼuyoʼ tu yaʼaloʼob: «Wa beyoʼ, ¿máax túun jeʼel u páajtal u salvarkubaeʼ?».+
27 Letiʼeʼ tu yaʼalaj: «Le baʼaxoʼob maʼ tu páajtal u beetik wíinikeʼ, Dioseʼ jeʼel u páajtal u beetkeʼ».+
28 Pedro túuneʼ tu yaʼalaj: «Ilawile, toʼoneʼ tsʼoʼok k-pʼatik tuláakal le baʼaxoʼob yaantoʼon kaʼachoʼ yéetel tsʼoʼok k-taal ta paach».+
29 Letiʼeʼ tu yaʼalajtiʼob: «Tu jaajil kin waʼalikteʼexeʼ le máax tsʼoʼok u pʼatik u yotoch, u yatan, u sukuʼunoʼob, u taataʼob wa u paalal tu yoʼolal u Reino Dioseʼ+
30 yaan u kʼamik u maas yaʼabil teʼ kʼiinoʼobaʼ yéetel teʼ túumben yóokʼol kaaboʼ yaan u yantaltiʼ kuxtal minaʼan u xuul».+
31 Jesús túuneʼ tu bisaj junpáayil le 12 apóstoloʼoboʼ ka tu yaʼalajtiʼob: «¡Ilawileʼex! Táan k-bin Jerusalén, teʼeloʼ yaan u béeychajal* tuláakal le baʼax u tsʼíibtmaj le profetaʼob tu yoʼolal u Paal máakoʼ.+
32 Letiʼeʼ yaan u kʼuʼubul tiʼ le máakoʼob maʼ judíoʼoboʼ,+ yaan u pʼaʼastaʼal,+ yaan u poʼopochʼaʼal, yaan u túubaʼal+
33 yéetel yaan u jaʼajatsʼaʼal. Le kéen tsʼoʼokkeʼ yaan u kíimsaʼal,+ chéen baʼaleʼ tu yóoxpʼéel kʼiineʼ yaan u líiʼsaʼal».+
34 Chéen baʼaleʼ letiʼobeʼ maʼ tu naʼatoʼob baʼax u kʼáat u yaʼal mix junpʼéel tiʼ le baʼaloʼobaʼ, tumen taʼakaʼabtiʼob. Letiʼobeʼ maʼ tu naʼatoʼob le baʼax aʼalaʼabtiʼoboʼ.
35 Le ka náatsʼ Jesús tu kaajil Jericóeʼ tu jáal le bejoʼ tiʼ kulukbal kaʼach juntúul máak chʼóopiʼ, letiʼeʼ táan kaʼach u kʼáat caridad.+
36 Le máak túunaʼ tu yuʼubaj táan u máan yaʼabkach máakoʼob teʼeloʼ, le oʼolal káaj u kʼáatik baʼax ku yúuchul.
37 Ka aʼalaʼabtiʼ: «¡Táan u máan Jesús le Nazarenooʼ!».
38 Letiʼ túuneʼ káaj u kʼaʼam aʼalik: «¡Jesús, u Paal* David, chʼaʼten óotsilil!».
39 Le máaxoʼob ku binoʼob táaniloʼ káaj u sen aʼalikoʼobtiʼ ka u mak u chiʼ, chéen baʼaleʼ letiʼeʼ káaj u maas kʼaʼam aʼalik: «¡U Paal David, chʼaʼten óotsilil!».
40 Jesús túuneʼ jeʼeli, ka tu yaʼalaj ka taasaʼak le máak tu yiknaloʼ. Le ka náatsʼ le máak tu yiknaloʼ Jesúseʼ tu kʼáatajtiʼ:
41 «¿Baʼax a kʼáat ka in beet ta woʼolal?». Letiʼeʼ tu yaʼalaj: «Yuumtsil, in kʼáat ka suunak u sáasilil in wich».
42 Jesús túuneʼ tu yaʼalajtiʼ: «Suunak u sáasilil a wich. Yoʼolal a fejeʼ tsʼoʼok a wutstal».+
43 Teʼ súutukoʼ le máakoʼ suunaj u sáasilil u yicheʼ ka joʼopʼ u bin tu paach Jesús+ táan u alabartik Dios. Tuláakal xan u kajnáaliloʼob le kaajoʼ ka tu yiloʼob lelaʼ tu alabartoʼob Dios.+
Notas
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
^ Wa «u chúukpajal».
^ Ich griegoeʼ le tʼaanaʼ u kʼáat xan u yaʼal «chʼiʼibal» wa «áabil».
