Mateo 16:1-28
16 Le tiaʼan Jesús teʼeloʼ bin le fariseoʼob yéetel le saduceoʼob tu yiknaloʼ. Utiaʼal túun u túuntkoʼob u yóoleʼ tu kʼáatoʼobtiʼ ka u yeʼestiʼob junpʼéel señal ku taal tiʼ Dios.+
2 Chéen baʼaleʼ Jesúseʼ tu yaʼalajtiʼob: «Le kéen éeʼsameʼenchajkeʼ teʼexeʼ suuk a waʼalikeʼex: ‹Yaan u beetik maʼalob kʼiin tumen chakjoleʼen u nakʼ kaʼan›.
3 De jaʼatskabeʼ ka waʼalikeʼex: ‹Bejlaʼeʼ yaan u kʼáaxal jaʼ yéetel yaan u keʼeltal tumen chakjoleʼen u nakʼ kaʼan yéetel nookoy xan›. Teʼexeʼ a wojleʼex a naʼateʼex u yich kaʼan, chéen baʼaleʼ maʼ ta naʼatkeʼex le baʼaxoʼob táan u yúuchul teʼ kʼiinoʼobaʼ.
4 Le generación kʼasaʼan yéetel ku traicionartik Diosaʼ maʼ tu xuʼulul u kaxtik junpʼéel señal, chéen baʼaleʼ mix junpʼéel señal kun tsʼaabiltiʼ,+ chéen u señal Jonás».+ Ka tsʼoʼok u yaʼalik lelaʼ lukʼ tu yiknaloʼob.
5 Le discípuloʼob túunoʼ binoʼob tiʼ uláakʼ u tséel le jaʼoʼ, chéen baʼaleʼ tuʼub u biskoʼob waaj.+
6 Jesúseʼ tu yaʼalajtiʼob: «Jach pʼil a wicheʼex, kanáantabaʼex tiʼ u levadura le fariseoʼob yéetel le saduceoʼoboʼ».+
7 Le discípuloʼob túunoʼ káaj u yaʼalikoʼob tu baatsiloʼob: «Si maʼ t-taasaj waajiʼ».
8 Tumen u yojel Jesús le baʼax ku yaʼalikoʼoboʼ tu yaʼalaj: «Máakeʼex junpʼíit a fejeʼex, ¿baʼaxten táan a waʼalikeʼex maʼ ta taaseʼex waajiʼ?
9 ¿Láayliʼ wa maʼ ta naʼatkeʼex baʼax in kʼáat in waʼaleʼ? ¿Maʼ wa kʼajaʼanteʼex le cinco waajoʼob tʼoʼox tiʼ le 5,000 máakoʼobeʼ yéetel jaypʼéel xaakoʼob ta moleʼexiʼ?+
10 ¿Maʼ wa kʼajaʼanteʼex xan le siete waajoʼob tʼoʼox tiʼ le 4,000 máakoʼobeʼ yéetel jaypʼéel xúuxakoʼob ta moleʼexiʼ?+
11 ¿Baʼaxten maʼ ta naʼatkeʼex maʼ tiʼ waaj tʼaanajeniʼ? Teʼexeʼ kanáantabaʼex tiʼ u levadura le fariseoʼob yéetel le saduceoʼoboʼ».+
12 Ka túun tu naʼatoʼob maʼ táan u yaʼaliktiʼob kaʼach ka u kanáantubaʼob tiʼ u levadurail le waajoʼoboʼ, baʼaxeʼ tiʼ u kaʼansaj le fariseoʼob yéetel le saduceoʼoboʼ.
13 Le ka kʼuch Jesús tu kaajil Cesarea de Filipoeʼ tu kʼáataj tiʼ u discípuloʼob: «Le máakoʼoboʼ, ¿máax ku yaʼalikoʼob u Paal máak?».+
14 Letiʼobeʼ tu yaʼaloʼob: «Yanoʼobeʼ ku yaʼalikoʼobeʼ Juan Bautista,+ uláakʼoʼobeʼ Elías,+ uláakʼoʼob xaneʼ Jeremías wa uláakʼ juntúul tiʼ le profetaʼoboʼ».
15 Jesúseʼ tu yaʼalajtiʼob: «Kux túun teʼex, ¿máaxen a waʼalikeʼex?».
16 Simón Pedroeʼ tu núukaj: «Teech le Cristooʼ,+ u Paal le kuxaʼan Diosoʼ».+
17 Jesúseʼ tu yaʼalajtiʼ: «Simón u paal Jonás, kiʼimakchajak a wóol, tumen lelaʼ maʼ wíinik tsʼáa a wojéeltiʼ, baʼaxeʼ in Taata yaan teʼ kaʼanoʼ.+
18 Teen xaneʼ kin waʼaliktech: techeʼ Pedroech,+ yéetel tu yóokʼol le cháaltunaʼ+ tiʼ ken in muchʼkíint le máaxoʼob ku tsʼáaik u fejoʼob tiʼ tenoʼ.* Letiʼobeʼ maʼ kun lúubloʼob tu kʼab le kíimiloʼ.*
19 Tiʼ techeʼ yaan in tsʼáaik u llaveiloʼob u Reinoil kaʼan, jeʼel baʼalak ka a kʼax way luʼumeʼ tsʼokaʼaniliʼ u kʼaʼaxal teʼ kaʼanoʼ, jeʼel baʼalak xan ka a wachʼ way luʼumeʼ tsʼokaʼaniliʼ u waʼachʼal teʼ kaʼanoʼ».
20 Letiʼ túuneʼ tu kʼubéentaj tiʼ u discípuloʼob maʼ u yaʼalikoʼob tiʼ mix máak wa letiʼ le Cristooʼ.+
21 Teʼ kʼiin jeʼeloʼ Jesucristoeʼ káaj u tsolik tiʼ u discípuloʼob yaan u bin Jerusalén. Teʼeloʼ yaʼab baʼaloʼob ken u muʼyajt tu kʼab u nuuktakil le kaajoʼ, tu kʼab u nuuktakil le sacerdoteʼoboʼ bey xan tu kʼab le escribaʼoboʼ. Tsʼoʼoleʼ yaan xan u kíimsaʼal, chéen baʼaleʼ tu yóoxpʼéel kʼiineʼ yaan u líiʼsaʼal.+
22 Pedroeʼ ka tu yuʼubaj lelaʼ tu bisaj junpáayileʼ ka tu táajtʼantaj táan u yaʼaliktiʼ: «Yuumtsil, mix u máan ta tuukul leloʼ, le baʼax ka waʼalikoʼ junpuliʼ maʼ kun úuchultech».+
23 Chéen baʼaleʼ Jesúseʼ tu sutaj u paach tiʼ Pedroeʼ ka tu yaʼalajtiʼ: «¡Tselaba tin táan Satanás!* Techeʼ chéen táan a kʼatkaba tin beel tumen maʼ ta tuukul jeʼex u tuukul Dioseʼ, baʼaxeʼ jeʼex u tuukul wíinikeʼ».+
24 Jesús túuneʼ tu yaʼalaj tiʼ u discípuloʼob: «Wa yaan máax u kʼáat taal tin paacheʼ u pʼektuba yéetel u chʼaʼ u cheʼil u muʼyaj, ka taalak mantatsʼ tin paach.+
25 Tumen le máax u kʼáat u salvart u kuxtaleʼ yaan u perdertik, chéen baʼaleʼ le máax ku perdertik u kuxtal tin woʼolaleʼ yaan u salvartik.+
26 U jaajileʼ, ¿baʼax utsil jeʼel u jóoʼsik máak wa ku tiaʼalintik tuláakal yóokʼol kaab chéen baʼaleʼ ku boʼotik yéetel u kuxtal?+ ¿Yaan wa baʼax jeʼel u tsʼáaik máak tu yoʼolal u kuxtaleʼ?+
27 Tumen u Paal máakeʼ yaan u taal yéetel u ángeloʼob bey xan yéetel u poder u Taata, tiʼ túun ken u boʼot tiʼ cada juntúul le baʼax u beetmoʼ.+
28 Tu jaajil kin waʼalikteʼexeʼ yaan jujuntúul tiʼ le máaxoʼob waʼalakbaloʼob wayoʼ maʼ kun kíimloʼob táanil tiʼ u yilkoʼob u taal u Paal máak yéetel u Reino».+
Notas
^ Wa «tu kʼab u joonajiloʼob le Muknaloʼ».
^ Wa «tiʼ ken in beet in múuchʼuliliʼ».
^ Wa «Kʼaasilbaʼal».
