Mateo 19:1-30
19 Ka tsʼoʼok túun u yaʼalik Jesús leloʼ, lukʼ Galileaeʼ ka bin tu jáal u luʼumil Judea tuláakʼ u tséel le Jordánoʼ.+
2 Teʼeloʼ bin xan yaʼabkach máakoʼob tu paach, letiʼ túuneʼ tu tsʼakoʼob.
3 Jujuntúul fariseoʼob u tukultmoʼob u probarkoʼobeʼ* náatsʼoʼob tu yiknaleʼ ka tu yaʼaloʼobtiʼ: «¿Maʼalob wa ka u divorciartuba juntúul xiib tiʼ u yatan tu yoʼolal jeʼel baʼalakeʼ?».+
4 Jesúseʼ tu núukaj: «¿Maʼ wa ta xokeʼexeʼ le máax beet wíinik desde tu káajbaloʼ tu beetaj xiib yéetel koʼolel?+
5 Yéetel tu yaʼaleʼ ‹tu yoʼolal lelaʼ le xiiboʼ yaan u pʼatik u papá yéetel u maama utiaʼal u pʼáatal* yéetel u yatan, yéetel tu kaʼatúulaloʼobeʼ yaan u suutoʼob junpʼéeliliʼ wíinklil›.+
6 Bey túunoʼ maʼ kaʼatúuloʼobiʼ, baʼaxeʼ junpʼéeliliʼ wíinkliloʼob. Le oʼolaleʼ le baʼax tsʼoʼok u nuʼupul tumen Diosoʼ mix máak unaj u jatsik».+
7 Letiʼobeʼ tu yaʼaloʼobtiʼ: «¿Baʼaxten túun Moiséseʼ tu yaʼalaj ka tsʼaʼabak u juʼunil divorcio tiʼ le atantsil utiaʼal ka xiʼikoʼ?».+
8 Jesúseʼ tu yaʼalajtiʼob: «Tumen chich a puksiʼikʼaleʼexeʼ Moiséseʼ tu yaʼalaj jeʼel u páajtal a divorciarkabaʼex tiʼ a wataneʼexeʼ,+ chéen baʼaleʼ úuch kaʼacheʼ maʼ beyoʼ.+
9 Teneʼ kin waʼalikteʼexeʼ wa juntúul máak ku divorciarkuba tiʼ u yatan kex le koʼolel maʼ yanchajaʼan mix baʼal u yil yéetel wa máaxeʼ,* le máakoʼ ku kʼebantal* wa ku kaʼa tsʼoʼokol u beel yéetel uláakʼ koʼolel».+
10 U discípuloʼob túuneʼ tu yaʼaloʼobtiʼ: «Wa beyoʼ maas maʼalob túun maʼ u tsʼoʼokol u beel máak».
11 Letiʼeʼ tu yaʼalajtiʼob: «Maʼ tuláakal máak jeʼel u páajtal u beetik le baʼax kin waʼalikoʼ, chéen le máaxoʼob tsʼaʼantiʼob u páajtalil u beetkoʼoboʼ.+
12 Yaan máakoʼobeʼ maʼ tu tsʼoʼokol u beeloʼob tumen desde ka síijoʼobeʼ yaan baʼax uchaʼan tiʼ u xiibiloʼob, yaan xaneʼ maʼ tu tsʼoʼokol u beeloʼob tumen xotʼaʼan u xiibiloʼob, uláakʼ máakoʼob xaneʼ tu juunaloʼob ku chʼaʼtuklik maʼ u tsʼoʼokol u beeloʼob tu yoʼolal u Reinoil kaʼan. Le máax jeʼel u páajtal u beetik beyoʼ maʼalob ka u beete».+
13 Le máakoʼob túunoʼ tu taasoʼob jujuntúul mejen paalal tu yiknal Jesús utiaʼal ka u tsʼáa u kʼab tu yóokʼoloʼob yéetel utiaʼal ka orarnak tu yoʼolaloʼob, chéen baʼaleʼ kʼeʼeyoʼob tumen le discípuloʼoboʼ.+
14 Jesús túuneʼ tu yaʼalaj tiʼ u discípuloʼob: «Maʼ a kʼatikeʼex u beel le mejen paalaloʼoboʼ, chaʼex u taaloʼob tin wiknal, tumen u Reinoil kaʼaneʼ u tiaʼal máakoʼob jeʼex letiʼobeʼ».+
15 Ka tsʼoʼok u tsʼáaik u kʼab tu yóokʼoloʼobeʼ lukʼ teʼeloʼ.
16 Tsʼoʼoleʼ taal juntúul xiʼipal tu yiknaleʼ ka tu yaʼalaj: «J-Kaʼansaj, ¿máakalmáak le baʼaloʼob maʼalobtak unaj in beetik utiaʼal ka yanakten kuxtal minaʼan u xuuloʼ?».+
17 Jesúseʼ tu yaʼalajtiʼ: «¿Baʼaxten tiʼ teen ka kʼáatik máakalmáak le baʼaloʼob maʼalobtakoʼ? Chéen juntúul máax aʼalik baʼaxoʼob maʼalobtak unaj u beetaʼal.+ Wa a kʼáat ka yanaktech le kuxtaloʼ beet mantatsʼ baʼax ku yaʼalik u Ley Dios».+
18 Le xiʼipalaʼ tu yaʼalajtiʼ: «¿Máakalmáak tiʼ letiʼob?». Jesúseʼ tu yaʼalajtiʼ: «Maʼ unaj a kíimsik mix máakiʼ,+ maʼ unaj a tusik a núupiʼ,*+ maʼ unaj a wookoliʼ,+ maʼ unaj a tuus kéen a beet a testigoil tiʼ wa baʼaxiʼ,+
19 unaj a respetartik a papá bey xan a maama,+ yéetel unaj a yaabiltik a wéet máakil jeʼex a yaabiltikabaeʼ».+
20 Le xiʼipaloʼ tu yaʼalajtiʼ: «Tuláakal le jeʼeloʼobaʼ kin beetik, ¿baʼax uláakʼ unaj in beetik?».
21 Jesúseʼ tu yaʼalajtiʼ: «Wa a kʼáat a beet tuláakal baʼal jach jeʼex unajeʼ xeen, kon le baʼaxoʼob yaantechoʼ ka a síi u tojol tiʼ le óotsiloʼoboʼ, beyoʼ yaan u yantaltech ayikʼaliloʼob teʼ kaʼanoʼ.+ Le kéen tsʼoʼokkeʼ ka taal tin paach».+
22 Le ka tu yuʼubaj le xiʼipal baʼax aʼalaʼabtiʼoʼ lúub u yóoleʼ ka bini, tumen jach yaʼab baʼaloʼob yaantiʼ.+
23 Jesúseʼ tu yaʼalaj tiʼ u discípuloʼob: «Tu jaajil kin waʼalikteʼexeʼ juntúul máak ayikʼaleʼ istikyaj jeʼel u yokol tu Reinoil kaʼaneʼ.+
24 Kin waʼalikteʼex: maas séeb jeʼel u máan juntúul camello tu chan joolil junpʼéel púutsʼeʼ ke ka okok juntúul ayikʼal máak tu Reino Dios».+
25 Le discípuloʼoboʼ ka tu yuʼuboʼob leloʼ jach jaʼakʼ u yóoloʼobeʼ ka tu yaʼaloʼob: «Wa beyoʼ, ¿máax túun jeʼel u salvarkubaeʼ?».+
26 Jesús túuneʼ tu paktaj u yichoʼobeʼ ka tu yaʼalajtiʼob: «Utiaʼal wíinikeʼ lelaʼ maʼ tu páajtal, chéen baʼaleʼ utiaʼal Dioseʼ tuláakal baʼal jeʼel u páajtaleʼ».+
27 Pedro túuneʼ tu núukaj: «Ilawile, toʼoneʼ tsʼoʼok k-pʼatik tuláakal le baʼaxoʼob yaantoʼon kaʼachoʼ yéetel tsʼoʼok k-taal ta paach, ¿baʼax túun kun tsʼaabiltoʼon?».+
28 Jesúseʼ tu yaʼalajtiʼob: «Tu jaajil kin waʼalikteʼexeʼ le kéen túumbenkuntaʼak tuláakal baʼal yéetel le kéen kulak u Paal máak tu kiʼichkelem tronoeʼ, teʼex taaleʼex tin paacheʼ yaan xan a kutaleʼex tiʼ 12 tronoʼob yéetel yaan a juzgarkeʼex u 12 tribuiloʼob Israel.+
29 Tuláakal le máaxoʼob tsʼoʼok u pʼatik u yotochoʼob, wa u sukuʼunoʼob, wa u kiikoʼob, wa u papáʼob, wa u maamaʼob, wa u paalaloʼob, wa u luʼumoʼob tin woʼolaleʼ, yaan u tsʼaʼabal u maas yaʼabil tiʼob yéetel yaan u tsʼaʼabaltiʼob kuxtal minaʼan u xuul.+
30 Chéen baʼaleʼ yaʼab tiʼ le máaxoʼob yanoʼob táaniloʼ yaan u pʼáatloʼob tu tsʼook yéetel yaʼab tiʼ le yanoʼob tu tsʼookoʼ yaan u máanoʼob táanil.+
Notas
^ Wa «u túuntkoʼob u yóoleʼ».
^ Wa «u nupkuba».
^ Ich griegoeʼ teʼelaʼ táan u yúuchul tʼaan tiʼ u kʼebantal máak yéetel máax maʼ u núupiʼ.
^ Wa «maʼ núupkʼebanchajaʼanoʼ». Ilawil «Núupkʼeban», página 2573.
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
