Mateo 6:1-34
6 Jach kanáanteʼex maʼ a beetkeʼex baʼaloʼob maʼalobtak chéen utiaʼal ka ilaʼak tumen le máakoʼoboʼ,+ tumen wa maʼeʼ mix baʼal kun siibilteʼex tumen a Taataʼex yaan teʼ kaʼanoʼ.
2 Le oʼolaleʼ kéen a beet uts tiʼ le óotsiloʼoboʼ maʼ a wustik trompeta ta táan jeʼex u beetik le j-kaʼapʼéel ichoʼob teʼ sinagogaʼob yéetel teʼ bejoʼoboʼ, tumen letiʼobeʼ ku beetkoʼob utiaʼal ka úuchuk maʼalob tʼaan tu yoʼolaloʼob. Tu jaajil kin waʼalikteʼex: letiʼobeʼ minaʼan uláakʼ baʼax ken u kʼamoʼob.
3 Chéen baʼaleʼ techeʼ, kéen a weʼes a wutsil tiʼ le óotsiloʼoboʼ maʼ unaj u yojéeltik a x-tsʼíik kʼab baʼax ku beetik a x-noʼoj kʼabiʼ,
4 beyoʼ u maasileʼ maʼ ken u yojéelt wa tsʼoʼok a weʼesik a wutsil tiʼ le óotsiloʼoboʼ. Bey túunoʼ a Taata, le máax paktikech desde teʼ kaʼan tuʼux maʼ tu páajtal a wilkoʼ, yaan u boʼotiktech.+
5 Kéen orarnakeʼex xaneʼ maʼ unaj a beetkeʼex jeʼex le j-kaʼapʼéel ichoʼoboʼ,+ tumen letiʼobeʼ uts tu tʼaan u waʼataloʼob orar teʼ sinagogaʼob yéetel tu esquinail le kóokoch bejoʼob chéen utiaʼal ka ilaʼakoʼoboʼ.+ Tu jaajil kin waʼalikteʼex: letiʼobeʼ minaʼan uláakʼ baʼax ken u kʼamoʼob.
6 Chéen baʼaleʼ techeʼ kéen orarnakecheʼ, ooken chéen ta juunal ta cuarto, kéen tsʼoʼokok a kʼalik le joonajoʼ orarnen tiʼ a Taata yaan teʼ kaʼanoʼ.*+ A Taata túun ku páajtal u yilik tuláakal baʼaleʼ yaan u boʼotiktech.
7 Kéen orarnakech túuneʼ maʼ a babal aʼalik junpʼéeliliʼ baʼal jeʼex u beetik le máaxoʼob maʼ u kʼaj óoloʼob Diosoʼ, tumen letiʼobeʼ ku tuklikoʼobeʼ ikil u sen aʼalikoʼob yaʼab tʼaanoʼobeʼ yaan u yuʼubaʼaloʼob tumen Dios.
8 Teʼexeʼ maʼ a beetkabaʼex jeʼex letiʼoboʼ, tumen a Taataʼexeʼ u yojel baʼax kʼaʼabéetteʼex+ tak táanil tiʼ a kʼáatkeʼextiʼ.
9 Teʼex túuneʼ, bey unaj a orareʼexaʼ:+
‹K-Taata yanech teʼ kaʼanoʼ, santificartaʼak*+ a kʼaabaʼ.+
10 Taalak a Reino,+ beetaʼak baʼax a kʼáat,+ jeʼex u beetaʼal teʼ kaʼanoʼ bey xan ka beetaʼak way luʼumeʼ.+
11 Tsʼáa k-oʼoch waaj utiaʼal le kʼiinaʼ.+
12 Perdonart k-pʼaax,* jeʼel bix toʼon tsʼoʼok k-perdonartik le máaxoʼob pʼaxmiloʼonoʼ.+
13 Maʼ a chaʼik k-lúubul tiʼ baʼax kʼaas,+ baʼaxeʼ kanáantoʼon* tiʼ le Kʼaasilbaʼaloʼ›.*+
14 Tumen wa ka perdonarkeʼex le kʼaas ku beetaʼalteʼex tumen le máakoʼoboʼ, a Taataʼex yaan teʼ kaʼanoʼ yaan xan u perdonarkeʼex.+
15 Chéen baʼaleʼ wa maʼ ta perdonarkeʼex le kʼaas ku beetaʼalteʼexoʼ, a Taataʼexeʼ maʼ xan ken u perdonart le baʼaloʼob kʼaastak ka beetkeʼexoʼ.+
16 Kéen ayunarnakeʼexeʼ,*+ maʼ a wóotsilkuntik a wicheʼex jeʼex u beetik le j-kaʼapʼéel ichoʼoboʼ, tumen letiʼobeʼ ku chaʼik u kʼóokʼoltal u yichoʼob utiaʼal ka ilaʼak tumen le máakoʼob táan u ayunaroʼoboʼ.+ Tu jaajil kin waʼalikteʼex: letiʼobeʼ minaʼan uláakʼ baʼax ken u kʼamoʼob.
17 Chéen baʼaleʼ techeʼ kéen ayunarnakecheʼ jiʼi aceite ta pool yéetel pʼoʼ a wich.
18 Beyoʼ le máakoʼoboʼ maʼ ken u yiloʼob wa táan a ayunar, chéen a Taata yaan teʼ kaʼan ken u yiloʼ. Bey túunoʼ a Taata yaan teʼ kaʼan ku yilik tuláakal baʼaloʼ yaan u boʼotiktech.
19 Xuʼuluk a muchʼkíintikeʼex ayikʼaliloʼob way luʼumeʼ,+ tumen ku kʼaskúuntaʼal tumen kʼamas, ku yiitsintkuba yéetel ku yoklaʼal.
20 Baʼaxeʼ muchʼkíinteʼex ayikʼaliloʼob teʼ kaʼanoʼ,+ tumen teʼeloʼ maʼ tu kʼaskúuntaʼal tumen kʼamas,+ maʼ tu yiitsintkuba yéetel maʼ tu yoklaʼal.
21 Tumen le tuʼux yaan a ayikʼaliloʼobeʼ tiʼ kun antal xan a puksiʼikʼaliʼ.
22 Le ichoʼ letiʼe baʼax sáasilkuntik le wíinkliloʼ,+ le oʼolaleʼ wa sáasil* a wicheʼ tuláakal a wíinklil kun sáasiltal.
23 Chéen baʼaleʼ wa kʼasaʼan* a wicheʼ+ tuláakal a wíinklileʼ yaan u yéeʼjochʼeʼental. Wa ku yéeʼjochʼeʼental le sáasil yaantechoʼ, ¡chéen tukult bukaʼaj kun éeʼjochʼeʼental a wíinklil!
24 Mix máak jeʼel u páajtal u meyajtik* kaʼatúul tsʼuuloʼobeʼ, tumen yaan u pʼektik juntúuliʼ yéetel yaan u yaabiltik le uláakʼoʼ,+ wa yaan u biskuba yéetel juntúuliʼ yéetel yaan u náachtal tiʼ le uláakʼoʼ. Maʼ tu páajtal a meyajtikeʼex Dios wa táan a meyajtikeʼex le Ayikʼaliloʼ.+
25 Le oʼolaleʼ kin waʼalikteʼex: xuʼuluk a chiʼichnaktaleʼex+ tu yoʼolal baʼax ken a jaanteʼex wa baʼax ken a wukʼeʼex, bey xan tu yoʼolal baʼax ken a búukinteʼex.+ ¿Maʼ wa maas kʼaʼanaʼan le kuxtal tiʼ le janal yéetel tiʼ le nookʼoʼ?+
26 Jach ilawileʼex le chʼíichʼoʼob ku xikʼnaloʼob teʼ kaʼanoʼ;+ letiʼobeʼ maʼ tu paakʼaloʼob, maʼ tu joochoʼob mix tu líiʼskoʼob u yich u paakʼaloʼob tiʼ chʼiiloʼob. Kex beyoʼ ku tséentaʼaloʼob tumen Dios, le u Taataʼob yaan teʼ kaʼanoʼ. ¿Maʼ wa maas koʼoj a tojoleʼex tiʼ letiʼobiʼ?
27 ¿Máax tiʼ teʼex jeʼel u chowakkíintik junpʼíit maas u kuxtal ikil u sen chiʼichnaktaleʼ?+
28 ¿Baʼaxten xan ka chiʼichnaktaleʼex tu yoʼolal baʼax ken a búukinteʼex? Kaanbalneneʼex tiʼ bix u nuuktal le looloʼob yanoʼob teʼ kʼáaxoʼ, letiʼobeʼ maʼatech u kíimskubaʼob meyaj yéetel maʼatech u chuuyoʼob,
29 chéen baʼaleʼ kin waʼalikteʼexeʼ tak Salomón+ kex jach táaj ayikʼal kaʼacheʼ maʼ tu vestirtuba jeʼex junkúul tiʼ le looloʼobaʼ.
30 Máakeʼex junpʼíit a fejeʼex, wa Dios bey u vestirtik u cheʼiloʼob yéetel u xíiwiloʼob kʼáax, kex chéen bejlaʼa kuxaʼanoʼob yéetel sáamal ku puʼululoʼob teʼ kʼáakʼoʼ, ¿maʼ wa maas jeʼel u vestirkeʼexeʼ?
31 Le oʼolaleʼ junpuliʼ maʼ a sen chiʼichnaktaleʼex+ ka a waʼaleʼex: ‹¿Baʼax ken k-jaante?›, ‹¿baʼax ken k-ukʼe?›, ‹¿baʼax ken k-búukinte?›.+
32 Tumen tuláakal le baʼaloʼobaʼ letiʼe baʼax ku chʼíikil u kaxt le máaxoʼob maʼatech u meyajtikoʼob Diosoʼ. A Taataʼex yaan teʼ kaʼanoʼ u yojel kʼaʼabéetteʼex tuláakal le baʼaloʼobaʼ.
33 Le oʼolaleʼ maʼ u xuʼulul a kaxtikeʼex táanil u Reino Dios yéetel u justicia, beyoʼ tuláakal le uláakʼ baʼaloʼobaʼ yaan xan u tsʼaʼabalteʼex.+
34 Le beetkeʼ junpuliʼ maʼ a sen chiʼichnaktaleʼex yoʼolal u kʼiinil sáamal,+ tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ. Cada kʼiineʼ yaan yéetel le bukaʼaj chiʼichnakiloʼob ku taaskoʼ.
Notas
^ Wa «tiʼ a Taata maʼ tu páajtal u yilaʼaloʼ».
^ Wa «respetartaʼak».
^ Wa «k-kʼebanoʼob».
^ Wa «salvartoʼon».
^ Ich griegoeʼ ku yaʼalaʼal kaʼach «le j-Kʼasaʼanoʼ».
^ Ilawil página 2557.
^ Wa «minaʼan u kʼasaʼanil, ku paakat chéen junpʼéeliliʼ tuʼux, jach uts».
^ Wa «kʼaschajaʼan; ku tsʼíiboltik baʼax maʼ u tiaʼal».
^ Wa «u beetkuba esclavoil tiʼ».
