Miqueas 7:1-20
7 ¡Óotsilen! Beyen juntúul máax wiʼijeʼ,juntúul máax táan u kaxtik baʼal u jaant le kéen tsʼoʼokok u cosechartaʼal le uvabey xan u yich le cheʼob ku yantal tu kʼiiniloʼob yáaxkʼiinoʼ.
Chéen baʼaleʼ kex kin tsʼíiboltik in jaantik junpʼóoch uvawa junpʼéel higoeʼ maʼ tin kaxtik mix baʼal.
2 Tsʼoʼok u pʼáatal minaʼan mix máak* chúukaʼan u yóol way luʼumeʼ.
Mix máak beetik baʼax toj.+
Tuláakloʼobeʼ táan u chʼúuktik u yéet máakiloʼob utiaʼal u beetkoʼob loob tiʼob.+
Cada juntúuleʼ ku yilik u chukik u sukuʼun yéetel junpʼéel nuxiʼ red ku meyaj utiaʼal chuk kay.
3 U kʼaboʼobeʼ jach u yojel u beetoʼob baʼax kʼaas.+
Le príncipeoʼ ku kʼáatik ka tsʼaʼabak baʼaloʼob tiʼ,le máax ku juzgaroʼ ku kʼáatik ka boʼotaʼak,+le máak yaan páajtalil tiʼoʼ ku yaʼalik baʼaxoʼob ku tsʼíiboltik,+letiʼobeʼ ku múul chʼaʼtuklikoʼob baʼax ken u beetoʼob.
4 U maas utsil ichiloʼobeʼ bey kʼiʼixeʼ.
Le máak maas chan maʼalob baʼax ku beetkoʼ maas ku beetik loob ke le kʼiʼixoʼob ku meyaj utiaʼal u kʼaʼalal junpʼéel terrenooʼ.
Yaan u kʼuchul le kʼiin aʼalaʼan tumen le máaxoʼob ku kananoʼoboʼ, yaan u kʼuchul u kʼiinil u juzgartaʼaloʼob.+
Letiʼobeʼ yaan u sen sajaktaloʼob.+
5 Maʼ a kʼubik a wóol tiʼ a amigo,mix a confiar tiʼ juntúul máax jach ka biskaba tu yéetel.+
Kanáant le baʼax ka waʼalik tiʼ le máax yaan naatsʼ tiʼ techoʼ.
6 Tumen le hijotsiloʼ ku taasik mix baʼalil u papá,le hijatsiloʼ ku tsʼáaikuba tu contra u maama,+yéetel le x-ilibtsiloʼ ku tsʼáaikuba tu contra u suegra.+
U jaajileʼ, tu yotoch máakeʼ tiʼ yaan u enemigoʼobiʼ.+
7 Chéen baʼaleʼ teneʼ tu yoʼolal Jéeobaeʼ maʼ ken in chaʼa u náayal in wóol.+
Yaan u chúukpajal in wóol in páaʼt Dios, le máax kun salvarkenoʼ.+
In Dioseʼ yaan u yuʼubiken.+
8 Teech, le máax pʼekmilenoʼ, maʼ u kiʼimaktal a wóol yoʼolal le baʼaloʼob ku yúuchultenoʼ.
Tumen kex tsʼoʼok in lúubuleʼ, yaan in kaʼa líikʼil,yéetel kex ich éeʼjochʼeʼenil yaneneʼ, Jéeobaeʼ yaan u beetik u juul u sáasil tin wóokʼol.
9 Teneʼ tsʼoʼok in kʼebantal tu táan Jéeoba,+le oʼolal yaan in aguantartik u pʼujaʼaniltak ken u defenderten le kéen juzgartaʼakenoʼ, yéetel tak ken u yil ka beetaʼakten justicia.
Letiʼeʼ yaan u tsʼáaiken tuʼux yaan sáasil.
Yaan in wilik bix u beetik justicia.
10 In enemigoeʼ yaan xan u yilikyéetel yaan u suʼlaktal, yaan u suʼlaktal le máax aʼalten lelaʼ:
«¿Tuʼux yaan Jéeoba, a Dios?».+
Teneʼ yaan in wilik le baʼax kun úuchul tiʼoʼ.
Letiʼeʼ yaan u pepeʼchaʼataʼal jeʼex u pepeʼchaʼataʼal le luukʼ yaan teʼ calleʼoboʼ.
11 Teʼ kʼiin jeʼeloʼ yaan u líiʼsaʼal a pakʼiloʼob,teʼ kʼiin jeʼeloʼ a luʼumeʼ yaan u maas nojochkíintaʼal.*
12 Teʼ kʼiin jeʼeloʼ le máakoʼoboʼ yaan u taaloʼob ta wiknal,yaan u taal le máaxoʼob yanoʼob Asiria yéetel le yanoʼob tu kaajiloʼob Egiptooʼ,yaan u taal le máaxoʼob yanoʼob tu luʼumil Egiptooʼ tak le yanoʼob teʼ Ríooʼ,*yaan u taaloʼob desde junpʼéel kʼáaʼnáab tak tuláakʼ kʼáaʼnáab, yaan u taaloʼob desde junpʼéel montaña tak tuláakʼ montaña.+
13 Tu yoʼolal u kajnáaliloʼobeʼ teʼ luʼumoʼ yaan u pʼáatal mix baʼal yaniʼ,bey kun úuchul tu yoʼolal le baʼaxoʼob kʼaastak tu beetoʼoboʼ.*
14 Kiʼichkelem Yuum, yéetel le xóotʼ cheʼ a machmoʼ beet uts a kanáantik a kaajal, kanáant le a herenciaoʼ,+le kaaj kajakbal tu juunal teʼ kaʼanal kʼáaxoʼ, chúumuk tiʼ le paakʼaloʼoboʼ.
Bisaʼakoʼob janal tu luʼumiloʼob Basán yéetel Galaad+ jeʼel bix úuchjeakiloʼ.
15 «Jeʼel bix teʼ kʼiinoʼob ka jóokʼech tu luʼumil Egiptoeʼ,teneʼ yaan in weʼesiktech nukuch baʼaloʼob.+
16 Le kaajoʼoboʼ yaan u yilkoʼob le nukuch baʼaloʼobaʼ yéetel kex jach yaan u páajtaliloʼobeʼ yaan u suʼlaktaloʼob.+
Letiʼobeʼ yaan u pixik u chiʼob yéetel u kʼaboʼob,yéetel yaan u kóoktaloʼob.
17 Yaan u léetsʼkoʼob le luʼum jeʼex u beetik le kaanoʼ.+
Jeʼex u jóokʼol le baʼalcheʼob ku jíiltikubaʼob teʼ tuʼux ku taʼakikubaʼoboʼ bey kun jóokʼloʼob táan u kikilankiloʼoboʼ.
Letiʼobeʼ yaan u kikilankiloʼob le kéen taalakoʼob tu yiknal k-Dios Jéeoba,jach yaan u chʼaʼikoʼob saajkil tiʼ».*+
18 ¿Yaan wa uláakʼ Dios jeʼex teech,ka u perdonart u kʼeban yéetel le baʼaloʼob maʼ maʼalobtak+ ku beetik u yalab a kaajaloʼ?*+
Techeʼ maʼ mantatsʼ ken a weʼes a pʼujaʼaniliʼ,tumen techeʼ uts ta tʼaan a weʼesik nojoch yaabilaj.+
19 Techeʼ yaan a kaʼa chʼaʼiktoʼon óotsilil,+ yaan a pepeʼchaʼatik k-kʼebanoʼob.
Techeʼ yaan a píikchʼintik tuláakal k-kʼebanoʼob tu taamil le kʼáaʼnáaboʼ.+
20 Techeʼ yaan a weʼesik chúukaʼan óolal tiʼ Jacob,yaan a weʼesik nojoch yaabilaj tiʼ Abrahán,yaan a beetik jeʼex ta jurartil úuchjeak tiʼ k-úuchben láakʼtsiloʼobeʼ.+
Notas
^ Wa «Tsʼoʼok u saʼatal máax».
^ Uláakʼ bix u traducirtaʼaleʼ «teʼ kʼiin jeʼeloʼ le leyoʼ yaan u pʼáatal náach yanil».
^ Uláakʼ bix kʼaj óolaʼanileʼ Éufrates.
^ Ich hebreoeʼ ku yaʼalaʼal kaʼach «tu yoʼolal u yich le baʼaxoʼob tu beetoʼoboʼ».
^ Ich hebreoeʼ ku yaʼalaʼal kaʼach «yaan u chʼaʼikoʼob saajkil tech».
^ Ich hebreoeʼ ku yaʼalaʼal kaʼach «u herencia».
