Oseas 11:1-12
11 «Tu paalil kaʼach Israeleʼ teneʼ tin yaabiltaj,+tu luʼumil Egipto yaan kaʼach in hijo ka tin tʼanaj.+
2 Jeʼex úuchik u maas tʼaʼanloʼob tumen le máakoʼoboʼ*bey xan úuchik u bin u maas náachtaloʼob tiʼ letiʼob.+
Letiʼobeʼ seguernaj u kʼubkoʼob sacrificioʼob tiʼ u imageniloʼob Baal,+bey xan tiʼ le póolbil imagenoʼoboʼ.+
3 Chéen baʼaleʼ teen kaʼans xíimbal Efraín,+ teneʼ tin chʼaʼajoʼobeʼ ka tin méekʼoʼob.+
Pero letiʼobeʼ maʼ tu reconocertoʼob wa teen tsʼakoʼobiʼ.
4 Tiʼ teneʼ meyajnaj le utsil yéetel le yaabilaj bey suumoʼob* utiaʼal in natsʼkoʼob tin wiknaloʼ.+
Teneʼ tin chʼúuyaj le u cheʼil kuuch yaan yóokʼol u kaaloʼoboʼ,tsʼoʼoleʼ yéetel yaabilaj tin tsʼáaj u yoʼoch cada juntúul.
5 Letiʼobeʼ maʼ kun suutoʼob tu luʼumil Egipto, chéen baʼaleʼ u reyil Asiria kun reinar tu yóokʼoloʼob,+tumen maʼ tu yóotoʼob suut tin wiknaliʼ.+
6 Tsʼoʼoleʼ junpʼéel espadaeʼ yaan u pirinsuut tu contra u kaajaloʼob+yéetel yaan u xuʼulsik le trancaʼob yanoʼob tu joonajil le kaajoʼoboʼ, yaan u xuʼulsiktiʼob tu yoʼolal le baʼaloʼob kʼaastak ku tuklik u beetkoʼoboʼ.+
7 In kaajaleʼ mantatsʼ táan u kaxtikoʼob bix u traicionarkenoʼob.+
Kex aʼalaʼabtiʼob tumen le profetaʼob ka u natsʼubaʼob tu yiknal le Maas Nojoch Diosoʼ, mix juntúul tiʼ letiʼob tu yóotiʼ.
8 Chéen baʼaleʼ, Efraín, ¿bix ken in pʼatech?+
¿Bix ken in kʼubech tu kʼab a enemigoʼob?
¿Bix ken in tratartech jeʼex úuchik in tratartik Admáoʼ?
¿Bix ken in beettech le baʼax tin beetaj tiʼ Zeboyimoʼ?+
Tsʼoʼok u kʼexpajal le bix in wuʼuyikinba ta woʼolaloʼ,beoraaʼ jach kin chʼaʼiktech óotsilil.+
9 Teneʼ maʼ ken in weʼes bukaʼaj pʼujaʼanilen,maʼ ken in kaʼa xuʼuls tiʼ Efraín.+
Tumen teneʼ Diosen, maʼ juntúul wíinikeniʼ,teen le Máax Santo yaan ta wéeteloʼ.
Teneʼ maʼ kin taal ta contra ichil in pʼujaʼanil.
10 Letiʼobeʼ yaan u binoʼob tu paach Jéeoba, yéetel letiʼeʼ yaan u jéenkal jeʼex u jéenkal juntúul leóneʼ.+
Le kéen jéenkalnakeʼ u paalaleʼ yaan u taaloʼob desde chikʼin* táan u kikilankiloʼob.+
11 Le kéen jóokʼkoʼob tu luʼumil Egiptoeʼ yaan u kikilankiloʼob jeʼex juntúul chʼíichʼeʼ,le kéen jóokʼkoʼob tu luʼumil Asiriaeʼ yaan u kikilankiloʼob jeʼex juntúul palomaeʼ.+
Teen túuneʼ yaan in beetik ka kajlakoʼob tu yotochoʼob», lelaʼ teen Jéeoba aʼalik.+
12 «Efraíneʼ chéen baʼaloʼob maʼ jaajtak ku yaʼalikteniʼ,yéetel jeʼel tuʼuxak ka in sutinbaeʼ chéen le bix u tuus Israel kin wilkoʼ.+
Chéen baʼaleʼ Judáeʼ láayliʼ táan u máan yéetel Dioseʼ,letiʼeʼ chúukaʼan u yóol tiʼ le Máax jach santooʼ».+
Notas
^ Teʼelaʼ táan u tʼaan tiʼ le profetaʼob yéetel tiʼ le uláakʼ máakoʼob túuxtaʼaboʼob u kaʼansoʼob u kaajil Israeloʼ.
^ Maʼ xaaneʼ táan u tʼaan tiʼ le suum ku meyaj kaʼach tiʼ juntúul taatatsil utiaʼal u kaʼansik u chan hijo xíimbaloʼ.
^ Wa «oeste».
