Proverbios 14:1-35
14 Le koʼolel jach tu jaajil yaan u naʼatoʼ ku beetik u bin utsil tiʼ u yotoch,+pero le koʼolel minaʼan u naʼatoʼ bey jutbil u beetik yéetel u kʼaboʼobeʼ.
2 Le máax ku bisik junpʼéel toj kuxtaloʼ ku respetartik Jéeoba,pero le máax ku bin tiʼ junpʼéel bej maʼ maʼaloboʼ* u pʼekmaj Dios.
3 U chiʼ le j-maʼ naʼat ku creerkubaoʼ bey junpʼéel cheʼ ku jaatsʼeʼ,pero le máaxoʼob yaan u naʼatoʼoboʼ yaan u kanáantaʼaloʼob tumen u chiʼob.
4 Tuʼux minaʼan wakaxeʼ limpio le tuʼux ku tsʼaʼabal u yoʼochoʼoboʼ,pero u muukʼ juntúul toroeʼ ku beetik u yantal yaʼab cosecha.
5 Juntúul maʼalob testigoeʼ maʼatech u tuus,pero juntúul maʼ maʼalob testigoeʼ ku tuus cada ken u jap u chiʼ.+
6 Le máax nojbaʼal u taaskubaoʼ* ku máan u kaxt naʼat pero maʼ tu béeytal u kaxtik,chéen baʼaleʼ le máax yaan u naʼatoʼ séebaʼan u kaanbal.+
7 Náachkuntaba tiʼ le j-maʼ naʼatoʼtumen mix baʼal ken a kan tiʼ le baʼaxoʼob ku jóokʼol tu chiʼoʼ.+
8 Le máax yaan u naʼatoʼ ku yéeyik maʼalob le bej tuʼux kun binoʼ,pero le máaxoʼob minaʼan u naʼatoʼoboʼ ku tuʼusloʼob tumen u j-maʼ naʼatiloʼob.*+
9 Le j-maʼ naʼatoʼoboʼ kex tiʼ letiʼob yaan u culpail junpʼéel baʼaleʼ chéen ku cheʼejtikoʼob,+pero le máaxoʼob toj u kuxtaloʼoboʼ ku beetkoʼob baʼax kʼaʼabéet utiaʼal u kaʼa biskubaʼob.
10 Le puksiʼikʼaloʼ u yojel baʼax ku muʼyajtik,yéetel mix máak jeʼel u páajtal u múul kiʼimaktal u yóol tu yéeteleʼ.
11 U yotoch le kʼasaʼan máakoʼoboʼ yaan u xuʼulsaʼal,+pero yaan u bin utsil tiʼ u yotoch le utsul máakoʼoboʼ.
12 Yaan junpʼéel bej maʼalob u yilik máak,+pero tu xuuleʼ ku bisik máak tiʼ kíimil.+
13 Kex táan u cheʼej máakeʼ maʼ xaaneʼ yaan baʼax táan u beetik u yaatal u yóol u puksiʼikʼal,le kiʼimak óolaloʼ jeʼel u suut yaayaj óolaleʼ.
14 Le máax terco u puksiʼikʼaleʼ yaan u kʼamik u boʼolil le bej ku biskoʼ,+pero le utsul máakoʼ ku kʼamik u yutsil le baʼaxoʼob ku beetkoʼ.+
15 Le máax maʼ jach yaan u naʼatoʼ ku creertik tuláakal baʼax ku yaʼalaʼal,pero le máax yaan u naʼatoʼ ku jach ilik tuʼux ku tsʼáaik u yook.+
16 Le máax yaan u naʼatoʼ ku kanáantik baʼax ku beetik yéetel ku náachkuntkuba tiʼ baʼax kʼaas,pero le j-maʼ naʼatoʼ maʼ tu kanáantik baʼax ku beetik* yéetel jach ku píitmáan u confiarkuba.
17 Le máax séeb u pʼuʼujuloʼ ku yeʼesik minaʼan u naʼat,+pero le máax ku tuklik tubeel baʼax ken u beetoʼ ku pʼektaʼal.
18 Le máaxoʼob ku jáan creerkoʼob tuláakal baʼaleʼ* ku yeʼeskoʼob minaʼan u naʼatoʼob,pero utiaʼal le máaxoʼob yaan u naʼatoʼoboʼ bey junpʼéel corona le kaʼansajoʼ.+
19 Le loolob máakoʼoboʼ yaan u chintaloʼob tu táan le utsul máakoʼoboʼ,le kʼasaʼan máakoʼoboʼ yaan u chintaloʼob tu jool u yotoch le máaxoʼob toj u kuxtaloʼoboʼ.
20 Le máax óotsiloʼ pʼektaʼan tak tumen le máaxoʼob yanoʼob naatsʼ tiʼ letiʼoʼ,+pero le máax ayikʼaloʼ yaʼab u amigoʼob.+
21 Le máax ku pʼektik u yéet máakileʼ ku kʼebantal,pero kiʼimak u yóol le máax ku chʼaʼik óotsilil tiʼ juntúul óotsiloʼ.+
22 ¿Maʼ wa kun bin kʼaasil tiʼ le máaxoʼob ku chʼaʼtuklikoʼob u beetkoʼob baʼax kʼaasoʼ?
Pero le máaxoʼob u chʼaʼtukultmaj u beetkoʼob baʼax maʼaloboʼ yaan u yeʼesaʼaltiʼob nojoch yaabilaj yéetel chúukaʼan óolal.+
23 Jeʼel baʼaxak meyajileʼ ku taasik utsil,pero chéen tʼaaneʼ ku bisik máak tiʼ óotsilil.+
24 U corona le máaxoʼob yaan u naʼatoʼoboʼ u ayikʼaliloʼob,pero le baʼax ku beetik le j-maʼ naʼatoʼoboʼ ku beetik u pʼáatal maas minaʼan u naʼatoʼob.+
25 Juntúul maʼalob testigoeʼ ku salvartik kuxtaloʼob,pero juntúul testigo ku tuuseʼ ku tuus cada ken u jap u chiʼ.
26 Juntúul máax ku respetartik Jéeobaeʼ jach ku confiar tiʼ letiʼ,+u paalaleʼ yaan u yantaloʼob tiʼ junpʼéel lugar seguro.+
27 U respetartaʼal Jéeobaeʼ u sayabil kuxtal,ku náachkuntik máak utiaʼal maʼ u léechtaʼal tumen le kíimiloʼ.
28 Kéen yaʼabchajak u kajnáaliloʼob junpʼéel kaajeʼ ku yantal páajtalil tiʼ juntúul rey,+pero juntúul gobernante minaʼan máaxoʼob u gobernarteʼ tsʼoʼok tiʼ beyoʼ.
29 Le máax maʼ tu jáan pʼuʼujuloʼ jach yaan u naʼat,+pero le máax séeb u náakal u yóoloʼ ku yeʼesik minaʼan u naʼat.+
30 Junpʼéel puksiʼikʼal jeetsʼel yanileʼ ku tsʼáaik toj óolal* tiʼ u wíinklil máak,pero le celosoʼ bey junpʼéel kʼojaʼanil kʼaskúuntik u baakel máakeʼ.+
31 Le máax ku beetik u kʼasaʼanil tiʼ juntúul óotsileʼ táan u pochʼik le Máax Beetmiloʼ,+pero le máax ku chʼaʼik óotsilil tiʼ juntúul óotsileʼ ku alabartik.+
32 Le kʼasaʼan máakoʼ u kʼasaʼanil kun xuʼulsiktiʼ,pero le utsul máakoʼ yaan u kanáantaʼal tumen chúukaʼan u yóol u beet baʼax maʼalob.+
33 Le naʼatoʼ tiʼ ku jeʼelel tu puksiʼikʼal le máax yaan u naʼatoʼ,+pero le j-maʼ naʼatoʼ yéetel le baʼax ku yaʼalikoʼ ku yóotik u yeʼes yaan u naʼat.
34 Le justiciaoʼ ku nojbaʼalkúuntik junpʼéel luʼumil,+pero le kʼebanoʼ ku mixbaʼalkúuntik junpʼéel kaaj.
35 Juntúul reyeʼ ku kiʼimaktal u yóol le kéen u yil yaan u naʼat le máax meyajtikoʼ,+pero ku pʼuʼujul tu contra le máax ku beetik baʼaloʼob suʼtsiltakoʼ.+
Notas
^ Wa «loʼoloʼochoʼ».
^ Wa «Le máax ku burlaroʼ».
^ Uláakʼ bix u traducirtaʼaleʼ «le máaxoʼob minaʼan u naʼatoʼoboʼ ku tuskoʼob uláakʼ máakoʼob yoʼolal u j-maʼ naʼatiloʼob».
^ Wa «jach ku pʼuʼujul».
^ Wa «Le máaxoʼob maʼ jach yaan u naʼatoʼoboʼ».
^ Wa «kuxtal».
