Proverbios 15:1-33
15 Utsul tʼaaneʼ ku beetik u xuʼulul kʼuuxil,+pero tʼaan yaj u yuʼubaʼaleʼ ku beetik u maas pʼuʼujul máak.+
2 Le máaxoʼob yaan u naʼatoʼoboʼ le kéen tʼaanakoʼobeʼ maʼalob bix u meyajtiʼob le baʼaxoʼob u yojloʼoboʼ,+pero tu chiʼ le j-maʼ naʼatoʼoboʼ ku jóokʼol tʼaanoʼob ku yeʼesik minaʼan u naʼatoʼob.
3 U yichoʼob Jéeobaeʼ tiaʼan tuláakal tuʼuxeʼ,táan u yilkoʼob le kʼasaʼan máakoʼoboʼ bey xan le utsul máakoʼoboʼ.+
4 Junpʼéel aakʼ ku utsul tʼaaneʼ* bey junkúul cheʼ ku tsʼáaik kuxtaleʼ,+pero junpʼéel tʼaan maʼ pataleʼ ku beetik u yaatal u yóol máak.
5 Le j-maʼ naʼatoʼ kéen tsoʼolok u nuʼuk tiʼ tumen u papáeʼ maʼ tu kʼamik,+pero le máax yaan u naʼatoʼ ku chaʼik u nuʼuktaʼal.*+
6 Tu yotoch le utsul máakoʼ yaan yaʼab ayikʼalil,pero u yich u meyaj* le kʼasaʼan máakoʼ ku taasik problemas tiʼ.+
7 U chiʼ le máax yaan u naʼatoʼ ku kʼiʼitbesik baʼax u yojel,+pero u puksiʼikʼal le j-maʼ naʼatoʼ maʼ bey u beetkiʼ.+
8 Jéeobaeʼ jach u pʼekmaj u sacrificio le kʼasaʼan máakoʼoboʼ,+pero jach uts tu tʼaan u yuʼubik u oración le utsul máakoʼoboʼ.+
9 Jéeobaeʼ jach u pʼekmaj le bej ku bisik le kʼasaʼan máakoʼ,+pero u yaabiltmaj le máax ku bin tu paach le justiciaoʼ.+
10 Le máax ku pʼatik le maʼalob bejoʼ, maʼ maʼalob* u yuʼubik u tsoʼolol u nuʼuk tiʼiʼ,+pero jeʼel máaxak u pʼeek u tsoʼolol u nuʼuk tiʼeʼ yaan u kíimil.+
11 Wa Jéeoba chíikaʼan u yilik le Muknal* bey xan le tuʼux ku xuʼulul tiʼ máakoʼ,*+¿maʼ wa maas chíikaʼan u yilik baʼax yaan tu puksiʼikʼal máakiʼ?+
12 Juntúul máax nojbaʼal u taaskubaeʼ* maʼ tu yaabiltik le máax tsolik u nuʼuk tiʼoʼ.*+
Letiʼeʼ maʼ ken u kaxt u nuʼuktaj le máaxoʼob yaan u naʼatoʼoboʼ.+
13 Junpʼéel puksiʼikʼal kiʼimak u yóoleʼ ku beetik u kiʼimaktal u yóol u yich máak,pero junpʼéel puksiʼikʼal táan u muʼyajeʼ ku beetik u yaatal u yóol máak.+
14 Junpʼéel puksiʼikʼal yaan u naʼateʼ ku yilik u maas kaanbal,+pero u chiʼ le j-maʼ naʼatoʼoboʼ ku tséentkuba yéetel* le j-maʼ naʼatiloʼ.+
15 Le máax yaachajaʼan u yóoloʼ mix junpʼéel kʼiin maʼalob u yilik,+pero le máax kiʼimak u yóol* u puksiʼikʼaloʼ bey sáamsamal yaan fiesta tu yiknaleʼ.+
16 Maas maʼalob yanil juntúul máak chéen junpʼíit baʼaloʼob yaantiʼ pero ku respetartik Jéeoba+ke juntúul máax jach ayikʼal pero chéen sen tuukul ku beetik.*+
17 Maas maʼalob u jaantaʼal junpʼéel plato verduras tuʼux yaan yaabilaj+ke u jaantaʼal u bakʼel wakax tuʼux yaan kʼuuxilil.+
18 Juntúul máak kʼaas u modoseʼ ku beetik u yantal baʼateʼel,+pero le máax maʼ tu jáan pʼuʼujuloʼ ku beetik u xuʼulul le baʼateloʼ.+
19 U beel le maʼakʼóoloʼ bey junpʼéel bej chuup yéetel kʼiʼixoʼobeʼ,+pero u beel le máaxoʼob toj u kuxtaloʼoboʼ bey junpʼéel bej táaxkuntaʼaneʼ.+
20 Le paal yaan u naʼatoʼ ku kiʼimakkúuntik u yóol u papá,+pero le máax minaʼan u naʼatoʼ ku mixbaʼalkúuntik u maama.+
21 Le j-maʼ naʼatiloʼ ku taasik kiʼimak óolal tiʼ le máax maʼ maʼalob bix u tuukuloʼ,*+pero le máax yaan u naʼatoʼ maʼ tu xuʼulul u bin tiʼ le maʼalob bejoʼ.+
22 Le baʼaloʼob chéen tu juunal máak ku chʼaʼtuklikoʼ maʼatech u jóokʼol maʼalobil,pero le baʼax ku chʼaʼtuklaʼal tumen yaʼab máakoʼobeʼ ku jóokʼol utsil.+
23 Máakeʼ kiʼimak u yóol kéen u núuk maʼalob junpʼéel baʼal,+junpʼéel tʼaan ku yaʼalaʼal teʼ súutuk kʼaʼabéetoʼ, ¡jach táaj maʼalob u yuʼubaʼal!+
24 Le máax yaan u naʼatoʼ ku naʼakal tiʼ le bej ku bisik máak tiʼ le kuxtaloʼ,+yéetel ku náachtal tiʼ le bej ku yéemel teʼ Muknaloʼ.*+
25 Jéeobaeʼ yaan u xuʼulsik tiʼ u yotoch le máax ku taaskuba nojbaʼaliloʼ,+pero yaan u kanáantik u baʼpach u yotoch le viudaoʼ.+
26 Jéeobaeʼ jach u pʼekmaj le baʼax ku chʼaʼtuklik u beetik le kʼasaʼan máakoʼ,+pero le jatsʼuts tʼaanoʼoboʼ ku lúubul utsil tiʼ letiʼ.+
27 Le máax maʼ maʼalob bix u náajaltik le baʼaxoʼob yaantiʼoʼ ku taasik problemas* tu yotoch,+pero le máax maʼ tu chaʼik u maʼanloʼ yaan u seguer u kuxtal.+
28 U puksiʼikʼal le utsul máakoʼ ku tuklik tubeel baʼax ken u núuke,*+pero tu chiʼ le kʼasaʼan máakoʼoboʼ ku jóokʼol baʼaloʼob maʼ maʼalobtakiʼ.
29 Jéeobaeʼ jach náach yanil tiʼ le kʼasaʼan máakoʼoboʼ,pero ku yuʼubik u oración le utsul máakoʼoboʼ.+
30 Máakeʼ ku kiʼimaktal u yóol u puksiʼikʼal kéen paktaʼak yéetel kiʼimak óolal.
Le baʼax maʼalob ku tsʼaʼabal ojéeltbiloʼ ku beetik u yantal u muukʼ* máak.+
31 Le máax ku yuʼubik le consejo ku tsʼáaik kuxtaloʼtiaʼan ichil le máaxoʼob yaan u naʼatoʼoboʼ.+
32 Le máax maʼ tu chaʼik u tsoʼolol u nuʼuk tiʼoʼ u pʼekmaj u kuxtal,+pero tuláakal le máax ku chaʼik u tsoʼolol u nuʼuk tiʼeʼ ku yantal u naʼat.*+
33 Le máax ku respetartik Jéeobaeʼ táan u kanik u yeʼes naʼat.+
Utiaʼal ka nojbaʼalkúuntaʼak máakeʼ táanil kʼaʼabéet u yeʼesik kabal óolal.*+
Notas
^ Wa «Junpʼéel aakʼ ku tsʼakik máakeʼ».
^ Wa «corregirtaʼal».
^ Wa «le boʼol ken u kʼam».
^ Wa «jach yaj».
^ Ilawil página 2572.
^ Wa «bey xan le Abadónoʼ».
^ Wa «corregirkoʼ».
^ Wa «máax ku burlareʼ».
^ Wa «ku bin tu paach».
^ Wa «uts».
^ Wa «pero maʼ tu kaxtik baʼax u beete».
^ Ich hebreoeʼ ku yaʼalaʼal kaʼach «minaʼan u puksiʼikʼaloʼ».
^ Ilawil página 2572.
^ Wa «suʼtsilil».
^ Wa «ku jach tuklik tubeel bix ken u núukil junpʼéel baʼal, antes u tʼaaneʼ ku tuklik baʼax ken u yaʼale».
^ Ich hebreoeʼ ku yaʼalaʼal kaʼach «ku beetik u poloktal u baakel».
^ Ich hebreoeʼ ku yaʼalaʼal kaʼach «u puksiʼikʼal».
^ Wa «humildad».
