Proverbios 7:1-27
7 In paal, beet baʼax kin waʼaliktech,yaabilt* in mandamientoʼob.+
2 Tsʼoʼokbes in mandamientoʼob, beyoʼ yaʼab años kan kuxtal,+kanáant baʼax kin kaʼansiktech* jeʼex a kanáantik u neekʼ a wicheʼ.
3 Kʼaxoʼob ta dedos,tsʼíibtoʼob ta puksiʼikʼal.+
4 Aʼal tiʼ le naʼatoʼ: «In kiikech»,yéetel tiʼ le baʼax ka kanikoʼ aʼaltiʼ: «In láakʼtsilech».
5 Letiʼob túuneʼ yaan u kanáantkechoʼob tiʼ le x-kʼasaʼan koʼoleloʼ,+tiʼ le koʼolel minaʼan u suʼtaloʼ* yéetel tiʼ u chʼujuk tʼaanoʼob.*+
6 Desde tu ventanail in wotocheʼ paakatnajen kabal,desde tu yáamiloʼob le ventanaoʼ
7 tin wilaj baʼax ku beetik le máaxoʼob maʼ jach yaan u naʼatoʼoboʼ,tin wileʼ ichil le táankelmoʼoboʼ yaan juntúul maʼ maʼalob bix u tuukuliʼ.*+
8 Máan teʼ calleoʼ, naatsʼ tiʼ le esquina tuʼux yaan le koʼoleloʼ,tsʼoʼoleʼ ka bin tu tojil u yotoch le koʼoleloʼ,
9 bin le táan kaʼach u yéeʼsameʼental yéetel le táan u tʼúubul kʼiinoʼ,+le taʼaytak kaʼach u yáakʼabtal yéetel u yéeʼjochʼeʼentaloʼ.
10 Teen túuneʼ tin wilaj jóokʼ chʼaʼabil u beel tumen juntúul koʼolel,u nookʼ le koʼoleloʼ bey jeʼex u nookʼ juntúul x-prostitutaeʼ,+ jóokʼ yéetel junpʼéel kʼaakʼas tuukul.
11 Letiʼeʼ maʼ tu makik u chiʼ, yéetel baʼax u kʼáajtiʼ baʼax ku tuklik u maasil,+juntúul koʼolel maʼatech u pʼáatal* tu yotoch.
12 Le koʼolelaʼ junsúutukeʼ tiaʼan calleeʼ, junsúutukeʼ tiaʼan teʼ kʼíiwikoʼoboʼ,tiaʼan naatsʼ tiʼ cada esquina utiaʼal u chʼúuktik u máan wa máax.+
13 Le koʼoleloʼ tu machaj le xiʼipaloʼ ka tu tsʼuʼutsʼaj,chíikaʼan tu yich minaʼan u suʼtal ka tu yaʼalaj tiʼ le xiʼipaloʼ:
14 «Yanchaj in kʼubik ofrendaʼob utiaʼal múul janal.*+
Bejlaʼa tin beetaj le baʼax tin prometertoʼ.
15 Le oʼolal jóokʼen in chʼaʼ a beel, jóokʼen in kaxtech,¡yaaske tin wilech!
16 Tu yóokʼol in camaeʼ tsʼoʼok in jayik kiʼichkelem nookʼoʼob,tsʼoʼok in jayik lino de jejeláas coloroʼob Egipto u taaloʼob.+
17 Tsʼoʼok in kiʼibokkíintik in cama yéetel mirra,* áloeʼob bey xan yéetel canela.+
18 Koʼoten utiaʼal k-múul disfrutartik le yaabilaj tak ken sáasakoʼ,koʼox múul kiʼikiʼ óoltik le yaabilajoʼ,
19 tumen in wíichameʼ minaʼan tin wotoch,bijaʼan viaje, náach tuʼux bijaʼan.
20 Tu bisaj junpʼéel bolsa taakʼin,maʼ kun jáan suut, yaan u suut hasta tu kʼiinil luna llena».
21 Ku tusik le xiʼipal yéetel u jatsʼutsil u tʼaanoʼ,+ku táabsik yéetel u chʼujuk tʼaanoʼob.
22 Le xiʼipal túunoʼ tsáay tu paach le koʼoleloʼ, bin bey juntúul wakax nukaʼaj kíimsbileʼ,bey juntúul j-maʼ naʼat ku bin utiaʼal u castigartaʼal tiʼ junpʼéel cepoeʼ,*+
23 tak ken táatsʼmáansaʼak u táamnel tumen junpʼéel flecha,bey juntúul chʼíichʼ ku jáan jupkuba tiʼ junpʼéel trampaeʼ, letiʼeʼ maʼ u yojel wa yaan u perdertik u kuxtaliʼ.+
24 In paal, chʼenxikinten beoraaʼ,jach uʼuy le baʼaxoʼob kin waʼalikoʼ.
25 Maʼ a chaʼik u kʼéechel a puksiʼikʼal utiaʼal u bin tu beeloʼob le koʼoleloʼ.
Maʼ a kʼéechel utiaʼal a bin teʼ bejoʼob tuʼux ku máanoʼ.+
26 Tumen le koʼoleloʼ yaʼab máakoʼob tsʼoʼok u beetik u kíimil,+jach yaʼab máakoʼob tsʼoʼok u kíimsik.+
27 U yotocheʼ ku bisik máak teʼ Muknaloʼ,*ku bisik máak tak teʼ tuʼux yaan le kimenoʼoboʼ.
Notas
^ Wa «kanáant bey junpʼéel tesoro».
^ Wa «in ley».
^ Wa «juntúul koʼolel maʼatech u kuxtal jeʼex uts tu tʼaan Dioseʼ».
^ Wa «tiʼ le baʼaxoʼob ku yaʼalik utiaʼal u táabsikechoʼ».
^ Ich hebreoeʼ ku yaʼalaʼal kaʼach «minaʼan u puksiʼikʼal».
^ Ich hebreoeʼ ku yaʼalaʼal kaʼach «u yookoʼobeʼ mix juntéen ku pʼáatal».
^ Ilawil «Ofrendail múul janal», página 2574.
^ Ilawil página 2571.
^ Lelaʼ junpʼéel nuʼukul tuʼux ku kʼaʼalal kaʼach u kʼaboʼob, u yookoʼob yéetel u kaal máak utiaʼal u castigartaʼal.
^ Ilawil página 2572.
