Romanos 12:1-21
12 Le oʼolaleʼ, sukuʼuneʼex, kin kʼáat óoltikteʼex tu yoʼolal u chʼaʼ óotsilal Dioseʼ ka a kʼub a wíinklileʼex+ yéetel a kuxtaleʼex tiʼ Dios, kʼubeʼex bey junpʼéel sacrificio santo+ yéetel kʼambeʼen tu táaneʼ. Beyoʼ yaan a meyajtikeʼex Dios yéetel tuláakal a tuukuleʼex.+
2 Xuʼuluk xan a kuxtaleʼex jeʼex u máakiloʼob le yóokʼol kaabaʼ,* baʼaxeʼ kʼex a tuukuleʼex utiaʼal ka páajchajak a kʼexik a kuxtaleʼex.+ Beyoʼ ta juunaleʼex ken a wileʼexeʼ+ le baʼax u kʼáat Diosoʼ uts, kʼambeʼen yéetel jach chúukaʼan.
3 Tumen yoʼolal le nojoch utsil eʼesaʼabtenoʼ kin waʼalik tiʼ cada juntúul tiʼ teʼexeʼ maʼ unaj u tuklik u maasil tiʼ le unaj u tuklik tu yoʼolaloʼ,+ baʼaxeʼ u tukult chéen le bukaʼaj unajeʼ. Lelaʼ cada juntúul tiʼ teʼexeʼ unaj u beetik yéetel le bukaʼaj fe tsʼaʼantiʼ tumen Diosoʼ.+
4 Tumen jeʼex junpʼéel wíinklil yaʼab u xéexetʼal,+ chéen baʼaleʼ maʼ junpʼéeliliʼ bix u meyaj tuláakal le u xéexetʼaloʼ,
5 toʼon xaneʼ kex yaʼaboʼoneʼ láaj táakpajaʼanoʼon tiʼ junpʼéeliliʼ wíinklil junmúuchʼ yéetel Cristo, chéen baʼaleʼ cada juntúul tiʼ toʼoneʼ beyoʼon jeʼex u xéexetʼal junpʼéel wíinklil ku paklan áantkubaʼobeʼ.+
6 Dios túuneʼ jejeláas meyajoʼob u tsʼaamajtoʼon tu yoʼolal u nojoch utsil.+ Le oʼolaleʼ wa u tsʼaamajtoʼon u páajtalil k-profetizareʼ, profetizarnakoʼon yéetel le bukaʼaj fe tsʼaʼantoʼonoʼ;
7 wa u tsʼaamajtoʼon u páajtalil k-meyajtik uláakʼ máakoʼobeʼ, koʼoneʼex meyajtikoʼob; wa yaan máax tsʼaʼantiʼ u páajtalil u kaʼansajeʼ, kaʼansajnak;+
8 le máax ku líiʼsaj óoloʼ,* u tsʼáa u yóol u líiʼs u yóol* u maasil;+ le máax ku tʼoxik* wa baʼaxoʼ, u beet yéetel tuláakal u puksiʼikʼal;+ le máax ku nuʼuktajoʼ, u jach tsʼáa u yóol u beete;+ le máax ku chʼaʼ óotsilileʼ, u beet yéetel kiʼimak óolal.+
9 Yaabiltabaʼex yéetel x-maʼ kaʼapʼéel ichil.+ Sen pʼekteʼex le kʼaasoʼ,+ chʼíikik a beeteʼex baʼax uts.
10 Eʼeseʼex nojoch yaabilaj ta baatsileʼex jeʼex le yaabilaj yaan ichil sukuʼuntsiloʼoboʼ. Respetartabaʼex ta baatsileʼex, lelaʼ teʼex unaj a yáax eʼeskeʼex tiʼ u maasil.+
11 Tsʼáa a wóoleʼex meyaj, maʼ a maʼakʼóoltaleʼex.+ Chuʼupkeʼex yéetel espíritu santo.+ Beetabaʼex u esclavo Jéeoba.+
12 Kiʼimakchajak a wóoleʼex tu yoʼolal le maʼalob baʼaloʼob ka páaʼtkeʼexoʼ. Chúukpajak a wóoleʼex kéen joʼopʼok a muʼyajeʼex.+ Maʼ u xuʼulul a orareʼex.+
13 Tsʼáaʼex tiʼ le máaxoʼob santoʼob le baʼaxoʼob kʼaʼabéettiʼoboʼ.+ Maʼ u xuʼulul a kʼamkeʼex maʼalob le uʼulaboʼoboʼ.+
14 Maʼ u xuʼulul a kʼáatkeʼex tiʼ Dios ka u bendecirt le máaxoʼob chʼaʼpachtikeʼexoʼ.+ Maʼ a tʼaaneʼex kʼaas tiʼ le máakoʼoboʼ, baʼaxeʼ kʼáateʼex tiʼ Dios ka u bendecirtoʼob.+
15 Kiʼimakchajak a wóoleʼex yéetel le máaxoʼob kiʼimak u yóoloʼoboʼ; okʼolneneʼex yéetel le máaxoʼob ku yokʼoloʼoboʼ.
16 Le baʼax jeʼel a beetkeʼex ta woʼolaleʼexeʼ beeteʼex xan tu yoʼolal u maasil. Maʼ a nojbaʼalkúuntkabaʼex,* baʼaxeʼ ilawil u yantalteʼex kabal óolal.+ Maʼ a taaskabaʼex bey jach yaan a naʼateʼexeʼ.+
17 Maʼ a boʼotkeʼex kʼaas yéetel kʼaas tiʼ mix máak.+ Chʼaʼex en cuenta baʼax maʼalob u yilaʼal tumen tuláakal máak.
18 Wa ku béeytaleʼ, tak tuʼux ku páajtal a beetkeʼexeʼ, beeteʼex baʼax kʼaʼabéet utiaʼal ka yanakteʼex jeetsʼelil yéetel tuláakal máak.+
19 In sukuʼuneʼex, maʼ a sutkeʼex u jeel le kʼaas ku beetaʼalteʼexoʼ, baʼaxeʼ pʼateʼex tu kʼab Dios, letiʼ ken u yeʼes u pʼujaʼanil;+ tumen tsʼíibtaʼan: «‹Teen kin vengartik le baʼax ku beetkoʼoboʼ, teen ken in tsʼáa baʼax ku náajmatikoʼob›, ku yaʼalik Jéeoba».+
20 Le oʼolaleʼ «wa wiʼij a enemigoeʼ tsʼáa baʼal u jaante; wa ukʼajeʼ tsʼáa baʼal u yukʼe, tumen kéen a beet beyoʼ táan a nikkúuntik chakjoleʼen chúukoʼob yóokʼol u pool».*+
21 Maʼ a chaʼik u tsʼáanchaʼatkech le kʼaasoʼ, baʼaxeʼ seguernak a tsʼáanchaʼatik le kʼaas yéetel le baʼax utsoʼ.+
Notas
^ Wa «jeʼex le máakoʼob kuxaʼanoʼob teʼ kʼiinoʼobaʼ».
^ Wa «ku tsolnuʼukoʼ».
^ Wa «u tsolnuʼukt».
^ Wa «tsʼáaik».
^ Wa «Maʼ a tsʼáaik a tuukuleʼex tiʼ baʼaloʼob nuuktak».
^ Lelaʼ u kʼáat u yaʼaleʼ u yáantaʼal juntúul máak chich u puksiʼikʼal utiaʼal ka u yeʼes jatsʼuts modos.
