Romanos 15:1-33
15 Bey túunoʼ, toʼon muʼukʼaʼan k-fejeʼ unaj k-áantik le máaxoʼob maʼ muʼukʼaʼan u fejoʼob utiaʼal u aguantarkoʼob le baʼaxoʼob ku aktáantkoʼoboʼ,+ yéetel maʼ unaj k-kaxtik chéen k-utsiliʼ.+
2 Cada juntúul tiʼ toʼoneʼ unaj u yilik u kiʼimakkúuntik u yóol u yéet máakil yéetel unaj u beetik baʼax maʼalob utiaʼal u líiʼsik u yóol.+
3 Tumen mix Cristo tu kaxtaj chéen u yutsil,+ baʼaxeʼ jeʼex tsʼíibtaʼanilaʼ: «Tsʼoʼok u lúubul tin wóokʼol tuláakal le baʼaloʼob kʼaastak ku yaʼalaʼaltechoʼ».+
4 Tumen tuláakal le baʼaxoʼob tsʼíibtaʼaboʼob úuchjeakiloʼ tsʼíibtaʼaboʼob utiaʼal k-kaanbal,+ utiaʼal beyoʼ ikil u chúukpajal k-óol+ yéetel ikil u líiʼsaʼal k-óol tumen u Tʼaan Dioseʼ ka k-páaʼt le baʼax ken u tsʼáatoʼon Diosoʼ.+
5 Beora túunaʼ, le Dios áantkoʼon utiaʼal ka chúukpajak k-óol yéetel ku líiʼsik k-óoloʼ, letiʼ ka u tsʼáa tiʼ tuláakleʼex u páajtalil u yantalteʼex le tuukul yanchaj tiʼ Cristo Jesúsoʼ.
6 Bey túunoʼ yéetel junpʼéeliliʼ voz ka a múuchʼ alabarteʼex+ u Dios yéetel u Taata k-Yuumtsil Jesucristo.
7 Jeʼex úuchik u kʼamkoʼon Cristo yéetel kiʼimak óolaleʼ,+ teʼex xaneʼ unaj a kʼamkabaʼex yéetel kiʼimak óolal ta baatsileʼex+ utiaʼal u alabartaʼal Dios.
8 Tumen teneʼ kin waʼalikteʼexeʼ Cristoeʼ jach tu jaajil kʼuch u meyajt le máaxoʼob circuncidartaʼanoʼoboʼ*+ utiaʼal u yeʼesik jach jaaj baʼax ku yaʼalik Dios, utiaʼal u yeʼesik yaan u béeykuntik Dios le baʼax u yaʼalmaj tiʼ u úuchben láakʼtsiloʼob le máakoʼobaʼ+
9 yéetel utiaʼal ka alabartaʼak Dios tumen le j-táanxel luʼumiloʼob yoʼolal u chʼaʼ óotsilaloʼ.+ Jeʼex tsʼíibtaʼanilaʼ: «Yoʼolal lelaʼ yaan in waʼalik in kʼaj óolech tu táan le j-táanxel luʼumiloʼoboʼ yéetel yaan in alabartik a kʼaabaʼ yéetel kʼaayoʼob».+
10 Aʼalaʼab xan: «Nacióneʼex, kiʼimakchajak a wóoleʼex junmúuchʼ yéetel u kaajal».+
11 Uláakʼ tsʼíibeʼ ku yaʼalik: «Alabartaʼak Jéeoba tumen tuláakal le naciónoʼoboʼ, yéetel alabartaʼak xan tumen tuláakal le kaajoʼoboʼ».+
12 Tiʼ uláakʼ tsʼíibeʼ Isaíaseʼ ku yaʼalik: «Yaan u chíikpajal u moots Jesé,+ yéetel yaan juntúul máax kun líikʼil utiaʼal u gobernart le kaajoʼoboʼ;+ tiʼ letiʼ kun páaʼtaj le j-táanxel luʼumiloʼoboʼ».+
13 Le Dios áantkoʼon k-páaʼt le baʼax ku taal u kʼiinoʼ ka u beet u sen kiʼimaktal a wóoleʼex yéetel ka u beet u jach yantalteʼex jeetsʼelil tu yoʼolal a fejeʼex tiʼ letiʼ; le páajtalil ku tsʼáaikteʼex le espíritu santooʼ letiʼ ka u yáanteʼex a páaʼteʼex yéetel tuláakal a puksiʼikʼaleʼex.+
14 Beora xanaʼ, in sukuʼuneʼex, jach in wojleʼ chuupeʼex yéetel utsil bey xan yéetel kʼaj óolalil, yéetel jach in wojleʼ teʼexeʼ jeʼel u páajtal a tsolnuʼuktikabaʼex ta baatsileʼexeʼ.
15 Chéen baʼaleʼ yéetel u jaajil in wóol kin tsʼíibtikteʼex le baʼaloʼobaʼ utiaʼal in kʼaʼajsikteʼex tu kaʼatéen. Lelaʼ kin beetik yoʼolal le u nojoch utsil Dios tsʼaʼab tiʼ tenaʼ:
16 in beetkinba esclavoil tiʼ Cristo Jesús utiaʼal in wáantik le j-táanxel luʼumiloʼoboʼ.+ Teneʼ in kʼubmaj in wóol tiʼ junpʼéel meyaj santo, lelaʼ letiʼe u máan tsikbaltbil le maʼalob baʼaloʼob ku taal tiʼ Diosoʼ,+ utiaʼal beyoʼ le j-táanxel luʼumiloʼoboʼ ka pʼáatkoʼob bey junpʼéel ofrenda kʼambeʼen yéetel santificartaʼan yéetel espíritu santoeʼ.
17 Teneʼ kiʼimak in wóol tumen u discípuloen Cristo Jesús bey xan tu yoʼolal le meyaj u tsʼaamajten Diosoʼ.
18 Tumen maʼ tin táabal in waʼal mix baʼal wa maʼ chéen le baʼaxoʼob tu beetaj Cristo utiaʼal u yuʼubik tʼaan le j-táanxel luʼumiloʼoboʼ. Utiaʼal u beetik lelaʼ, tiʼ Cristoeʼ meyajnaj le baʼaxoʼob tin waʼalaj yéetel tin beetoʼ,
19 bey xan señaloʼob, milagroʼob+ yéetel u páajtalil le espíritu santooʼ; bey túunoʼ desde Jerusalén tak tu maas náachil u luʼumil Ilírico bey xan tiʼ tuláakal le bejoʼob yaan tu baʼpachoʼ, tsʼoʼok in tsʼáaik kʼaj óoltbil tuláakal tuʼux le maʼalob baʼaloʼob yaan yil yéetel Cristooʼ.+
20 Bey túunoʼ tin chʼaʼtuklaj maʼ in tʼaan tiʼ Cristo teʼ tuʼux tsʼoʼok u yúuchul tsikbal tiʼ letiʼoʼ, utiaʼal maʼ in líiʼsik junpʼéel naj yóokʼol junpʼéel cimiento yaanal máax beetmil.
21 Teneʼ bey úuchik in beetkoʼ tumen u Tʼaan Dioseʼ ku yaʼalik: «Le máaxoʼob maʼ tsʼaʼabak u yojéeltoʼob mix baʼal tu yoʼolaleʼ yaan u yilkoʼob, yéetel le máaxoʼob maʼ u yuʼuboʼob mix baʼal tu yoʼolaleʼ yaan u kʼuchul u naʼatoʼob».+
22 Tu yoʼolal xan lelaʼ yaʼab u téenel maʼ chaʼab in kʼuchul ta wiknaleʼexiʼ.
23 Chéen baʼaleʼ beoraaʼ tsʼoʼok in tsʼáaik kʼaj óoltbil tiʼ tuláakal le kaajoʼobaʼ yéetel tsʼoʼok u máan yaʼab* años taakchajak in bin ta wiknaleʼex.
24 Le oʼolaleʼ le kéen xiʼiken Españaeʼ kin páaʼtik ka páajchajak in wilkeʼex, yéetel le kéen tsʼoʼokok u kiʼimaktal in wóol ikil in wantal ta wéeteleʼex kex chéen u chan súutukeʼ ka a láakʼinteneʼex tiʼ junjaats le bejoʼ.
25 Chéen baʼaleʼ beoraaʼ jach taʼaytak in bin Jerusalén utiaʼal in meyajt* le máaxoʼob santoʼoboʼ.+
26 Tumen le sukuʼunoʼob yanoʼob Macedonia yéetel Acayaoʼ yéetel kiʼimak óolal tu síiajoʼob le baʼaloʼob yaantiʼob utiaʼal ka tsʼaʼabak tiʼ le máaxoʼob santoʼob óotsiltakoʼob yanoʼob Jerusalénoʼ.+
27 U jaajileʼ letiʼobeʼ tu beetoʼob yéetel kiʼimak óolal, chéen baʼaleʼ lelaʼ u pʼaxmiliʼob tiʼ le máaxoʼob santoʼoboʼ; tumen wa le j-táanxel luʼumiloʼob tsʼoʼok u jóoʼskoʼob utsil tiʼ le baʼaloʼob ku taal tiʼ Dios yaan tiʼ le máaxoʼob santoʼoboʼ, unaj xan u tsʼáaikoʼob le baʼaxoʼob ku kʼaʼabéettal tiʼ letiʼob sáamsamaloʼ.+
28 Beoraaʼ teneʼ táan in bisik Jerusalén le baʼaloʼob tu síijoʼoboʼ, le kéen tsʼoʼokok in wilik ka kʼuʼubuk tiʼ le máaxoʼob santoʼoboʼ yaan in máan in wileʼex le kéen xiʼiken Españaoʼ.
29 Tsʼoʼoleʼ in wojleʼ kéen xiʼiken ta wiknaleʼexeʼ, yaan in kʼuchul chuupen yéetel u nojoch utsil Cristo.
30 Beora túunaʼ, sukuʼuneʼex, kin jach aʼalikteʼex yoʼolal k-Yuumtsil Jesucristo bey xan yoʼolal le yaabilaj ku taal tiʼ le espíritu santooʼ, ka a tsʼáa a wóoleʼex orar tiʼ Dios tin woʼolal jeʼex in beetik tenoʼ.+
31 Orarneneʼex utiaʼal ka kanáantaʼaken+ tiʼ le máaxoʼob yanoʼob Judea maʼatech u creerkoʼob Diosoʼ yéetel utiaʼal ka kʼaʼamak tumen le máaxoʼob santoʼob+ le meyaj ken in beet tu yoʼolal u kaajil Jerusalénoʼ.
32 Yéetel wa Dios u kʼáateʼ ka kʼuchken yéetel kiʼimak óolal ta wiknaleʼex utiaʼal ka muʼukʼaʼanchajak k-óoleʼex.
33 Le Dios ku tsʼáaik jeetsʼeliloʼ ka yanak yéetel tuláakleʼex.+ Ka béeyak.*
Notas
^ Ilawil página 2559.
^ Uláakʼ bix u traducirtaʼaleʼ «jujunpʼéel».
^ Wa «in wáant».
^ Wa «Amén».
