Romanos 3:1-31
3 ¿Baʼax utsil ku kʼamik juntúul judío? Wa ¿baʼax utsil ku taasik le circuncisiónoʼ?
2 U jaajileʼ jach yaʼab utsiloʼob. Yáaxeʼ Dioseʼ tiʼ le judíoʼob tu kʼubéentaj le Tsʼíiboʼob santoʼoboʼ.+
3 ¿Baʼax túun jeʼel u páajtal u yaʼalaʼal yoʼolal jujuntúul tiʼ letiʼob maʼ tu yeʼesoʼob fejeʼ? Tumen minaʼan u fejoʼobeʼ, ¿yaan wa u beetkoʼob u pʼáatal chéen kunel u chúukaʼan óolal Dios?
4 ¡Jach junpuliʼ maʼ! Baʼaxeʼ mantatsʼ ka ilaʼak jach jaaj baʼax ku yaʼalik Dios,+ kex ka ilaʼak tuláakal máakeʼ ku tuus,+ jeʼex tsʼíibtaʼanilaʼ: «Utiaʼal ka ilaʼak justoech yoʼolal baʼax ka waʼalik yéetel ka xiʼiktech maʼalobil kéen joʼopʼok a juzgartaʼal».+
5 Chéen baʼaleʼ wa letiʼe baʼaloʼob maʼ maʼalobtak k-beetik ku meyaj utiaʼal u chíikbesaʼal toj baʼax ku beetik Diosoʼ, ¿baʼax túun ken k-aʼale? ¿Máasaʼ Dioseʼ maʼatech u beetik baʼax maʼ maʼalob kéen u yeʼes u pʼujaʼaniliʼ? (Táan in tʼaan jeʼex u tʼaan le wíinikoʼoboʼ).
6 ¡Jach junpuliʼ maʼ! Wa maʼeʼ, ¿bix túun kun juzgarbil le yóokʼol kaab tumen Diosoʼ?+
7 Chéen baʼaleʼ wa ikil in tuus ku maas chíikpajal jaaj baʼax ku yaʼalik Dios yéetel ku alabartaʼaleʼ, ¿baʼaxten túun láayliʼ táan in juzgartaʼal bey juntúul kʼeban máakeʼ?
8 Wa beyoʼ, ¿baʼaxten túun maʼ t-aʼalik lelaʼ: «Koʼoneʼex beetik baʼaloʼob kʼaastak utiaʼal ka yanak baʼaloʼob maʼalobtak»? Lelaʼ letiʼe baʼaloʼob maʼ jaajtak ku yaʼalik jujuntúul máakoʼob táan k-aʼalik binoʼ. Le juicio kun taal tu yóokʼoloʼoboʼ jach letiʼe unaj u tsʼaʼabaltiʼoboʼ.+
9 ¿Baʼax túun ken k-aʼale? ¿Maas wa maʼalob yaniloʼon tiʼ letiʼob? ¡Junpuliʼ maʼ beyoʼ! Tumen tu káajbaleʼ tsʼoʼok k-eʼesikeʼ le judíoʼob bey xan le griegoʼoboʼ j-kʼeban máakoʼob;+
10 jeʼex tsʼíibtaʼanilaʼ: «Minaʼan máax toj u kuxtal, jach mix juntúul;+
11 mix máak yaan u naʼat, mix tak chéen junpʼíit, mix máak xan kaxtik Dios.
12 Tuláakal máak tsʼoʼok u xuʼulul u beetik baʼax maʼalob, tuláakloʼob tsʼoʼok u pʼáatloʼob mix baʼal u biilaloʼob; mix máak beetik baʼax uts, jach mix juntúul».+
13 «U chiʼobeʼ bey junpʼéel jool tuʼux ku muʼukul máakeʼ, tsʼoʼok u tuusoʼob yéetel u yaakʼoʼob».+ «U chiʼobeʼ chuup yéetel u veneno kaanoʼob».+
14 «U chiʼobeʼ maʼatech u xuʼulul u maldeciroʼob yéetel maʼatech u xuʼulul u kʼaakʼas tʼaanoʼob».+
15 «U yookoʼobeʼ séebaʼan u binoʼob utiaʼal u wekikoʼob kʼiʼikʼ».+
16 «Xuʼulsajil yéetel kʼaskúunajil yaan tu beeloʼob,
17 yéetel maʼ u kʼaj óoltoʼob u bejil jeetsʼeliliʼ».+
18 «Letiʼobeʼ junpuliʼ maʼatech u respetarkoʼob Dios».+
19 Chéen baʼaleʼ k-ojleʼ tuláakal le baʼaxoʼob tsʼíibtaʼan teʼ Leyoʼ tsʼaʼan utiaʼal tuláakal le máaxoʼob yanoʼob yáanal le Leyoʼ utiaʼal ka u mak u chiʼ tuláakal máak, beyoʼ tuláakal máak kun chíikpajal yaan u kʼeban tu táan Dios.+
20 Bey túunoʼ mix máak jeʼel u páajtal u yaʼalaʼal toj u kuxtal tu táan Dios chéen tumen ku tsʼoʼokbesik le baʼax ku yaʼalik le leyoʼ,+ tumen le leyoʼ chéen ku beetik k-tsʼáaik cuenta j-kʼeban máakoʼon.+
21 Chéen baʼaleʼ beoraaʼ maʼ chéen yoʼolal le ley tsʼoʼok u chíikbesaʼal u justicia Dios+ jeʼex u yeʼesaʼal tumen le Ley yéetel tumen le Profetaʼoboʼ;+
22 jach beyoʼ, u justicia Dioseʼ tsʼoʼok u chíikbesaʼal yoʼolal le fe ku tsʼaʼabal tiʼ Jesucristooʼ, utiaʼal u yáantaʼal tuláakal le máaxoʼob yaan u fejoʼoboʼ. Tumen Dioseʼ mix máak jelaʼan u paktik.+
23 Tuláakloʼob kʼebanchajaʼanoʼob yéetel maʼ tu páajtal u yeʼeskoʼob u jatsʼuts modos Dios.+
24 Chéen baʼaleʼ Dioseʼ tsʼoʼok u tsʼáaik junpʼéel siibal+ tiʼ le máaxoʼob yaan u fejoʼoboʼ, tumen yoʼolal u nojoch utsileʼ+ tsʼoʼok u yaʼalik toj u kuxtaloʼob; lelaʼ tu beetaj úuchik u jáalkʼabtaʼaloʼob tiʼ le kʼeban yoʼolal le boʼol tu beetaj Cristo Jesúsoʼ.+
25 Dioseʼ tu kʼubaj Cristo bey juntúul kíimsbil baʼalcheʼ utiaʼal ka u kaʼa bisuba máak yéetel Dios+ yoʼolal le fe ku tsʼáaikoʼob tiʼ le u kʼiʼikʼel Cristooʼ.+ Lelaʼ Dioseʼ tu beetaj utiaʼal u yeʼesik u justicia, tumen letiʼeʼ chúukpaj u yóol u perdonart le kʼebanoʼob beetaʼab úuchjeakil tumen le máakoʼoboʼ.
26 Letiʼeʼ tu beetaj xan utiaʼal u yeʼesik u justicia+ teʼ kʼiinoʼobaʼ, beyoʼ letiʼeʼ yaan u chíikpajal maʼalob baʼax ku beetik tak ken u yaʼal toj u kuxtal le máax ku tsʼáaik u fe tiʼ Jesúsoʼ.+
27 Wa beyoʼ, ¿tuʼux túun u taal u maas maʼalobil juntúul máak tiʼ uláakʼ máak? Leloʼ tsʼoʼok u pʼáatal minaʼan. ¿Yoʼolal baʼax leyil? ¿Yoʼolal wa u leyil baʼaxoʼob ku beetik máak?+ Maʼ, maʼ beyiʼ, baʼaxeʼ yoʼolal u leyil le fejoʼ.
28 Tumen k-tuklikeʼ juntúul máakeʼ ku yaʼalaʼal toj u kuxtal tu táan Dios yoʼolal le fejoʼ, maʼ chéen ikil u beetik le baʼax ku yaʼalik le leyoʼ.+
29 Dioseʼ ¿chéen wa u Dios le judíoʼoboʼ?+ ¿Maʼ wa u Dios xan le j-táanxel luʼumiloʼoboʼ?+ Jach beyoʼ, láayliʼ u Dios le j-táanxel luʼumiloʼoboʼ.+
30 U jaajileʼ chéen juntúuliliʼ Dios yaan,+ lelaʼ letiʼe máax aʼalik toj u kuxtal tuláakal le máaxoʼob yaan u fejoʼoboʼ, kex circuncidartaʼanoʼob wa maʼ.+
31 Le oʼolaleʼ, ¿k-luʼsik wa le ley yoʼolal k-fejoʼ? ¡Jach junpuliʼ maʼ! Baʼaxeʼ k-eʼesik yaan ley.+
