Romanos 8:1-39
-
Le espíritu santooʼ ku tsʼáaik kuxtal yéetel jáalkʼabil (1-11)
-
Espíritu santo eʼesik u paalaloʼob Dios (12-17)
-
Táan u páaʼtkoʼob u jáalkʼabtaʼal u paalal Dios (18-25)
-
«Le espíritu santooʼ ku tʼaan t-oʼolal» (26, 27)
-
Yéeyaʼaniliʼob tumen Dioseʼ (28-30)
-
K-tsʼáanchaʼatik baʼaloʼob yoʼolal u yaabilaj Dios (31-39)
8 Le oʼolaleʼ le máaxoʼob junmúuchʼ yaniloʼob yéetel Cristo Jesúsoʼ maʼ kun aʼalbil wa unaj u kíimloʼob.
2 Tumen le espíritu santo ku tsʼáaik kuxtal junmúuchʼ yéetel Cristo Jesúsoʼ tsʼoʼok u jáalkʼabtikech+ tiʼ u leyil le kʼebanoʼ bey xan tiʼ le kíimiloʼ.
3 Chéen baʼaleʼ le baʼax maʼ páajchaj u beetik le Ley+ tumen minaʼan u muukʼ+ le kʼeban wíinkliloʼ béeykuntaʼab tumen Dios le ka tu túuxtaj u Paal+ bey juntúul kʼeban máak+ utiaʼal ka u luʼs le kʼebanoʼ. Yéetel le baʼax tu beetaʼ tu xotʼaj u kʼiiniloʼob le kʼeban yaan tu wíinklil máakoʼ,
4 utiaʼal beyoʼ le maʼalob tsolnuʼukoʼob yaan ichil le Leyoʼ ka béeychajkoʼob tiʼ toʼon,+ máaxoʼon táan k-máan jeʼex u nuʼuktik le espíritu santooʼ maʼ jeʼex u nuʼuktik k-kʼeban wíinklileʼ.+
5 Tumen le máaxoʼob kuxaʼanoʼob jeʼex u kʼáat u kʼeban wíinkliloʼoboʼ chéen ku tuukuloʼob tiʼ baʼaloʼob yaan yil yéetel u kʼeban wíinkliloʼob,+ chéen baʼaleʼ le máaxoʼob kuxaʼanoʼob jeʼex u kʼáat le espíritu santooʼ chéen ku tuukuloʼob tiʼ baʼaloʼob yaan yil yéetel le espíritu santooʼ.+
6 Tumen u tsʼáaik u tuukul máak tiʼ baʼaloʼob yaan yil yéetel le kʼeban wíinkliloʼ ku taasik kíimil,+ chéen baʼaleʼ u tsʼáaik u tuukul máak tiʼ baʼaloʼob yaan yil yéetel le espíritu santooʼ ku taasik kuxtal yéetel jeetsʼelil;+
7 tumen u tsʼáaik u tuukul máak tiʼ baʼaloʼob yaan yil yéetel le wíinkliloʼ ku beetik u xuʼulul u biskuba yéetel Dios,+ tumen lelaʼ minaʼan yáanal u ley Dios yéetel mix tu páajtal u yantaliʼ.
8 Le oʼolaleʼ, le máaxoʼob ku beetkoʼob le baʼaxoʼob yaan yil yéetel u tsʼíibolal u kʼeban wíinkliloʼoboʼ, maʼ tu páajtal u lúubloʼob utsil tiʼ Dios.
9 Chéen baʼaleʼ teʼexeʼ maʼ táan a tsʼoʼokbeskeʼex u tsʼíibolal a kʼeban wíinklileʼexiʼ, baʼaxeʼ táan a nuʼuktikabaʼex yéetel espíritu santo;+ lelaʼ ku páajtal a beetkeʼex wa jach tu jaajil yaanteʼex u espíritu santo Dios. Chéen baʼaleʼ le máax minaʼan u tuukul Cristo tiʼeʼ maʼ tiaʼalintaʼan tumen Cristoiʼ.
10 Chéen baʼaleʼ wa junmúuchʼ yanil Cristo ta wéeteleʼexeʼ,+ u jaajileʼ a wíinklileʼexeʼ kimen yanil yoʼolal le kʼebanoʼ, chéen baʼaleʼ le espíritu santooʼ yoʼolal le justiciaoʼ ku tsʼáaik kuxtal.
11 Le oʼolaleʼ wa yaanteʼex u espíritu santo le máax líiʼs Jesús ichil le kimenoʼoboʼ, le máax xan líiʼs Cristo Jesús ichil le kimenoʼoboʼ+ yaan u kuxkíintik le a wíinklileʼex ku kíimiloʼ.+ Lelaʼ yaan u béeytal yoʼolal u espíritu santo yaan tiʼ teʼexoʼ.
12 Bey túunoʼ, sukuʼuneʼex, toʼoneʼ maʼ táan k-obligartaʼal kuxtal jeʼex u yaʼalik le k-kʼeban wíinkliloʼ mix ka k-tsʼoʼokbes u tsʼíibolal.+
13 Tumen wa teʼex ka kuxtaleʼex jeʼex u yaʼalik a kʼeban wíinklileʼexoʼ u jaajileʼ yaan a kíimleʼex, chéen baʼaleʼ wa yoʼolal le espíritu santo ka kíimskeʼex u tsʼíibolal a wíinklileʼexoʼ+ yaan a kuxtaleʼex.+
14 Tumen tuláakal le máaxoʼob ku nuʼuktaʼaloʼob tumen u espíritu santo Diosoʼ u paalaloʼob Dios.+
15 Tumen u espíritu santo Dioseʼ maʼ tu beetaj a wuʼuyikabaʼex bey esclavoʼex utiaʼal ka a chʼaʼex saajkil tu kaʼatéeniʼ, baʼaxeʼ ta kʼameʼex le espíritu santo utiaʼal ka máataʼakeʼex bey u paalaloʼob Dioseʼ; tu yoʼolal u espíritu santo Dioseʼ k-aʼalik tiʼ letiʼ: «¡Abá,* Papá!».+
16 Le espíritu santoaʼ,+ junmúuchʼ yéetel k-puksiʼikʼaleʼ, ku yeʼeskoʼobtoʼon u paalaloʼon Dios.+
17 Tumen wa u paalaloʼoneʼ yaan xan k-kʼamik le herenciaoʼ. Le herencia ku tsʼáaik Dios tiʼ Cristooʼ yaan xan u tsʼáaiktoʼon.+ Wa k-muʼyaj jeʼex Cristoeʼ+ yaan xan k-kʼamik junpʼéel nojoch puesto jeʼex le yaantiʼoʼ.+
18 Le oʼolaleʼ kin wilkeʼ le baʼaxoʼob k-muʼyajtik teʼ kʼiinoʼobaʼ jach mix baʼal wa ka keʼetek yéetel le nojoch puesto kun tsʼaabiltoʼonoʼ.+
19 Tumen tuláakal le baʼaloʼob beetaʼanoʼob tumen Diosoʼ táan u yaayamtikoʼob ka kʼuchuk u kʼiinil u chíikbesaʼal u paalal Dios.+
20 Tumen tuláakal le baʼaloʼob beetaʼanoʼoboʼ tsʼaʼaboʼob tiʼ junpʼéel kuxtal minaʼan u biilal.+ Chéen baʼaleʼ lelaʼ maʼ úuch tumen bey tu yóotilakoʼoboʼ, baʼaxeʼ tumen bey tu yóotilak Dios, le máax tsʼáaʼob tiʼ le kuxtalaʼ; chéen baʼaleʼ le ka tu beetaj lelaʼ tu tsʼáaj xan le esperanzaaʼ:
21 le baʼaloʼob beetaʼanoʼoboʼ maʼ kun seguer u esclavizartaʼaloʼob+ tumen le kʼeban yéetel le kíimiloʼ, baʼaxeʼ yaan u yantaltiʼob u kiʼichkelem jáalkʼabtajil u paalal Dios.
22 Tumen k-ojleʼ, tuláakal le baʼaloʼob beetaʼanoʼoboʼ táan u múul áakamoʼob yéetel táan u múul muʼyajoʼob tak beoraaʼ.
23 Chéen baʼaleʼ maʼ chéen letiʼobiʼ, tak toʼon le máaxoʼon tsʼoʼok k-kʼamik le espíritu santooʼ, le u yáax jaats tiʼ le baʼaloʼob aʼalaʼan u tsʼaʼabaltoʼonoʼ. Toʼoneʼ táan k-áakam ichil k-puksiʼikʼal+ le táan k-jach yaayamtik ka máataʼakoʼon tumen Dios bey u paalaloʼoneʼ;+ lelaʼ u kʼáat u yaʼaleʼ yaan u boʼotaʼal k-jáalkʼabtaʼal tiʼ le k-luʼumkabil wíinklilaʼ.
24 Tumen toʼoneʼ salvartaʼaboʼon yoʼolal le esperanzaaʼ. Chéen baʼaleʼ wa le baʼax ku páaʼtaʼal tsʼoʼok u béeychajloʼ leloʼ maʼ esperanzaiʼ, tumen mix máak ku seguer u páaʼtik junpʼéel baʼax tsʼoʼok u yilik.
25 Chéen baʼaleʼ wa toʼon táan k-páaʼtik+ le baʼax maʼ t-ilkoʼ,+ yaan u chúukpajal k-óol k-páaʼte.+
26 Bey túun xanoʼ, wa lubaʼan k-muukʼeʼ le espíritu santooʼ ku yáantkoʼon.+ Tumen wa maʼ k-ojel baʼax jeʼel k-kʼáatik ich oracióneʼ, le espíritu santooʼ ku tʼaan t-oʼolal tu yoʼolal le baʼaxoʼob k-muʼyajtik, pero maʼ tu páajtal k-aʼalikoʼ.
27 Chéen baʼaleʼ Dios, le máax xakʼaltik baʼax yaan tu puksiʼikʼal máakoʼ,+ u yojel baʼax táan u kʼáatik le espíritu santo tu yoʼolal le máaxoʼob santoʼoboʼ, tumen le baʼax ku kʼáatkoʼ táakaʼan ichil le baʼax u kʼáat Diosoʼ.
28 Toʼoneʼ k-ojleʼ Dioseʼ ku beetik u múul meyaj tuláakal le baʼaloʼob u beetmoʼ, lelaʼ ku beetik utiaʼal u yutsil le máaxoʼob yaabiltmiloʼ, máaxoʼob tʼanaʼanoʼob utiaʼal u beetkoʼob baʼax u kʼáat.+
29 Desde tu káajbaleʼ letiʼeʼ u yojel máaxoʼob ken u yéeye yéetel tu chʼaʼtuklaj u pʼáatloʼob chíikaʼanoʼob tiʼ u Paal,+ beyoʼ le u Paaloʼ yaan u beetkuba yáax paalil+ ichil yaʼab sukuʼuntsiloʼob.+
30 Tsʼoʼoleʼ tu tʼanaj xan le máaxoʼob u yéeymiliʼoʼ,+ le máaxoʼob tu tʼanoʼ+ tu yaʼalaj toj u kuxtaloʼob; le máaxoʼob tʼaʼanoʼobaʼ aʼalaʼab xan toj u kuxtaloʼob tumen Dios.+ Tu tsʼookeʼ le máaxoʼob aʼalaʼab toj u kuxtaloʼobaʼ, nojbaʼalkúuntaʼaboʼob xan tumen Dios.+
31 ¿Baʼax túun ken k-aʼal yoʼolal le baʼaloʼobaʼ? Wa tiʼ yaan Dios t-éeteleʼ, ¿máax jeʼel u yantal t-contraeʼ?+
32 Dioseʼ maʼ tu yaʼalaj wa maʼ tu tsʼáaiktoʼon u Paaliʼ, baʼaxeʼ tu kʼubaj utiaʼal ka kíimik t-oʼolaleʼex.+ Le oʼolaleʼ, letiʼ yéetel u Paaleʼ, ¿maʼ wa túun jeʼel xan u kiʼimaktal u yóoloʼob u tsʼáaikoʼobtoʼon le u maasil baʼaloʼoboʼ?
33 Wa Dios aʼalik toj u kuxtal le máaxoʼob u yéeymoʼ, ¿máax túun jeʼel u takik u pooloʼobeʼ?+
34 ¿Máax jeʼel u páajtal u condenarkoʼobeʼ? Cristo Jesúseʼ letiʼe máax kíimoʼ, u jaajileʼ letiʼe máax xan líiʼsaʼaboʼ; letiʼeʼ tiaʼan tu x-noʼoj kʼab Dioseʼ+ yéetel ku tʼaan t-oʼolal tu táan Dios.+
35 ¿Máax jeʼel u náachkuntkoʼon tiʼ u yaabilaj Cristoeʼ?+ ¿Le yaayaj óolaloʼ, le muʼyajiloʼ, le chʼaʼpachtajiloʼ, le wiʼijiloʼ, le x-maʼ nookʼiloʼ, le sajbeʼentsiloʼ, wa le u yaʼalaʼal yaan k-kíimsaʼaloʼ?+
36 Jach jeʼex tsʼíibtaʼanilaʼ: «Ikil k-meyajtikecheʼ bul kʼiin tiaʼanoʼon tu táan kíimileʼ. K-ilaʼal bey tamanoʼon utiaʼal kíimsbileʼ».+
37 Chéen baʼaleʼ yoʼolal le máax yaabiltoʼonoʼ táan k-tsʼáanchaʼatik tuláakal le baʼaloʼobaʼ.+
38 Tumen jach in wojleʼ mix kíimil, mix kuxtal, mix ángeloʼob, mix gobiernoʼob, mix le baʼaloʼob yanoʼob bejlaʼeʼ, mix le baʼaloʼob ku taal u kʼiinoʼ, mix páajtaliloʼob,+
39 mix kaʼanlil, mix taamil, mix junpʼéel tiʼ le baʼaloʼob beetaʼanoʼob jeʼel u náachkuntkoʼon tiʼ u yaabilaj Dios ku yeʼesaʼal tumen Cristo Jesús, k-Yuumtsiloʼ.
Notas
^ Ich hebreo wa ich arameoeʼ u kʼáat u yaʼal «¡Papá!».
