Rut 3:1-18
3 Noemíeʼ tu yaʼalaj tiʼ Rut, u yilib: «In paal, teneʼ kʼaʼabéet in kaxtik juntúul máax yéetel u tsʼoʼokol a beel*+ utiaʼal u bintech utsil.
2 Boaz, le máax tu chaʼaj a múul meyaj yéetel u x-meyajoʼoboʼ, juntúul k-láakʼtsil.+ Teʼ áakʼabaʼ letiʼeʼ yaan u saltik le cebada teʼ tuʼux ku jóoʼsaʼal u neekʼoʼ.
3 Ichkíilnen yéetel choʼo kiʼibok aceite ta wíinklil. Le kéen tsʼoʼokkeʼ ka jelik a nookʼeʼ ka bin teʼ tuʼux ku jóoʼsaʼal u neekʼ le cebadaoʼ. Hasta ken tsʼoʼokok u janal yéetel u yukʼik vino Boazeʼ ka chaʼik u yilkech.
4 Le kéen horachajak u bin chitaleʼ jach ilawil tuʼux kun bin chital, le kéen tsʼoʼokkeʼ ka bin tu yiknaleʼ ka síilik u yookoʼob, kéen tsʼoʼokkeʼ ka chital naatsʼ tiʼ u yookoʼob. Letiʼ ken u yaʼaltech baʼax unaj a beetik».
5 Ka tsʼoʼokeʼ Ruteʼ tu yaʼalaj: «Yaan in beetik tuláakal le baʼax ka waʼaliktenoʼ».
6 Rut túuneʼ bin teʼ tuʼux ku jóoʼsaʼal u neekʼ le cebadaoʼ ka tu beetaj tuláakal le baʼax aʼalaʼabtiʼ tumen u suegraoʼ.
7 Boazeʼ jaani, tu yukʼaj vino, yéetel jach kiʼimak u yóol kaʼachi. Ka tsʼoʼokeʼ bin chital teʼ tuʼux nikikbal u neekʼ le cebadaoʼ. Rut túuneʼ chaambel kʼuch teʼ tuʼux yanoʼ ka tu síilaj u yookoʼob Boazeʼ ka chilaj naatsʼ tiʼ u yookoʼob.
8 Chúumuk áakʼabeʼ káaj u tíitaʼal Boaz tumen le keʼeloʼ. Letiʼ túuneʼ kulajeʼ ka tu yilaj yaan juntúul koʼolel chilikbal naatsʼ tiʼ u yookoʼob.
9 Boaz túuneʼ tu yaʼalaj: «¿Máaxechiʼ?». Rut túuneʼ tu yaʼalaj: «Teen Rut, a x-meyaj. Unaj a jayik a nookʼ tin wóokʼol tumen techeʼ yaantech u derechoil u tsʼoʼokol a beel tin wéetel».*+
10 Boazeʼ tu yaʼalaj: «X-chʼúupal, ka u bendecirtech Jéeoba. Maas tsʼoʼok a weʼesik nojoch yaabilaj yéetel le baʼax tsʼoʼok a beetik beoraaʼ ke yéetel le baʼaxoʼob tsʼoʼok a yáax beetkoʼ,+ tumen maʼ binech tu paach le táankelmoʼoboʼ, kex ayikʼaloʼob wa kex óotsiloʼob.
11 Beoraaʼ, x-chʼúupal, maʼ a sajaktal, ta woʼolaleʼ yaan in beetik tuláakal le baʼax tsʼoʼok a waʼalikoʼ,+ tumen tuláakal u kajnáaliloʼob le kaajaʼ u yojloʼob de ke techeʼ juntúul koʼolelech jach jatsʼuts a modos.
12 Kex jach tu jaajil yaanten u derechoil in manikeʼexeʼ,+ yaan juntúul a láakʼtsileʼex maas yaan derecho tiʼ u manikeʼex.+
13 Teʼ áakʼabaʼ pʼáatkech wayeʼ. Wa le kéen sáasak ku manikecheʼ, ¡jach maʼalob! Jach maʼalob ka u beete. Pero wa maʼ u kʼáat u manecheʼ, teen túuneʼ yaan in manikech.+ Lelaʼ kin jurartiktech tu kʼaabaʼ Jéeoba, le Dios kuxaʼanoʼ. Pʼáatkech chital wayeʼ, páaʼt u sáastal».
14 Rut túuneʼ chilaj naatsʼ tiʼ u yookoʼob Boaz tak ka joʼopʼ u taal u sáastal. Ruteʼ líikʼ todavía maʼ jach píikʼikiʼ, teʼ hora maʼ tu páajtal u jáan kʼaj óoltaʼal máakoʼ. Boaz xaneʼ tu yaʼalaj: «Maʼ unaj u yojéeltaʼal wa taal juntúul koʼolel teʼ tuʼux ku jóoʼsaʼal u neekʼ le cebadaaʼ».
15 Boazeʼ tu yaʼalaj tiʼ Rut: «Taas le nookʼ a bóochʼintmoʼ ka a jaye». Rut túuneʼ tu jayaj le nookʼoʼ. Ka tsʼoʼokeʼ Boazeʼ tu láalaj seis medidas* cebadaiʼ, tsʼoʼoleʼ ka tu tsʼáaj u kuche. Ka tsʼoʼok túuneʼ Boazeʼ bin teʼ kaajoʼ.
16 Ruteʼ suunaj tuʼux yaan u suegra, ka kʼucheʼ aʼalaʼabtiʼ: «In paal, ¿bix biniktech?».* Rut túuneʼ tu yaʼalajtiʼ tuláakal le baʼax tu beetaj Boaz tu yoʼolaloʼ.
17 Ruteʼ tu yaʼalaj xan: «Letiʼeʼ tu tsʼáajten le seis medidas cebadaaʼ ka tu yaʼalajten: ‹Maʼ unaj a bin yiknal a suegra wa mix baʼal ka biskiʼ›».
18 Ka tsʼoʼokeʼ Noemíeʼ tu yaʼalaj: «In paal, pʼáatkech wayeʼ. Páaʼt a wilik baʼax kun úuchul, tumen le máakoʼ maʼ kun jeʼelel sin ke u resolvertik le asunto teʼ kʼiinaʼ».
Notas
^ Wa «junpʼéel a wotoch».
^ Wa «a manikoʼon».
^ Maʼ xaaneʼ seis medidas sea, lelaʼ letiʼe bukaʼaj ku bisik junpʼéel nuʼukul de óoliʼ 44 litrosoʼ. Ilawil «Sea», página 2579.
^ Ich hebreoeʼ ku yaʼalaʼal kaʼach «¿máaxechiʼ?».
