Salmos 55:1-23
Utiaʼal máax ku nuʼuktaj: u paaxileʼ unaj u beetaʼal yéetel u nuʼukuliloʼob paax yaan u cuerdailoʼob. Maskil. Le kʼaayaʼ David tsʼíibte.
55 In Dios, uʼuy in oración,+táan in kʼáatiktech ka a chʼaʼten óotsilil, maʼ a beetik bey maʼ ta wuʼuyikeneʼ.*+
2 Chʼenxikinteniʼ, núuk in oración.+
Jach yaachajaʼan in wóol yoʼolal baʼax ku yúuchulten.+
Jach lubaʼan in wóol
3 tu yoʼolal baʼax ku yaʼalik le máax pʼekmilenoʼ,bey xan tu yoʼolal baʼax ku beetik le kʼasaʼan máakoʼ.
Ku nikkúuntikoʼob problemas tin wóokʼol,tumen jach pʼujaʼanoʼobeʼ taak u beetkoʼobten loob.+
4 Jach táan u muʼyaj in puksiʼikʼal,+jach saajken tiʼ le kíimiloʼ.+
5 Táaj saajken, táan in kikilankil,hasta tsʼoʼok tak u káajal in tíitaʼal.
6 Kin waʼalik: «¡Wa ka yanak in xiikʼoʼob jeʼex le palomaoʼ!
Jeʼel in xikʼnal utiaʼal in bin tiʼ junpʼéel lugar seguroeʼ.
7 U jaajileʼ jeʼel in bin náach utiaʼal in púutsʼuleʼ,+jeʼel in bin kajtal teʼ desiertooʼ.+ (Séla)
8 Séebaʼan jeʼel in bin tiʼ junpʼéel lugar seguroeʼ,jeʼel in náachtal tiʼ le baʼaloʼob beyoʼob junpʼéel kʼaʼamkach iikʼ wa junpʼéel ciclónoʼ».
9 Jéeoba Dios, beet u confundir le kʼasaʼan máakoʼoboʼ, maʼ a chaʼik u jóokʼloʼob yéetel baʼax ku tuklik u beetkoʼob,+tumen tsʼoʼok in wilik bix u beetkoʼob loob yéetel bix u baʼateloʼob teʼ kaajoʼ.
10 Bul kʼiin yéetel bul áakʼab táan u xíimbaloʼob tu yóokʼol le pakʼoʼob yaan tu baʼpach le kaajoʼ.
Jach ku beetaʼal baʼax kʼaas ichil le kaajoʼ yéetel jach yaan problemasiʼ.+
11 Maʼ tu xuʼulul u beetaʼal baʼax kʼaasiʼ.
Mantatsʼ táan u tuʼusul yéetel u pechʼ óoltaʼal máak teʼ tuʼux ku muchʼkuba u kajnáaliloʼob le kaajoʼ.+
12 Wa ka aʼalaʼakten baʼal tumen juntúul in enemigoeʼ+bejlaʼa maʼ kun yaatal in wóoleʼ.
Chéen baʼaleʼ maʼ in enemigo líikʼ tin contraiʼ,tumen wa letiʼeʼ tsʼoʼok kaʼach in taʼakikinbaeʼ.
13 Baʼaxeʼ teech traicionarten, juntúul máax ku respetartaʼal kaʼach jeʼex teneʼ,+kex úuch in kʼaj óoltech yéetel kex jach kin biskinba kaʼach ta wéetel.+
14 Jach maʼalob k-bisikba kaʼachi.
Ta wéetel kin bin kaʼach tu yotoch Dios junmúuchʼ yéetel yaʼabkach máakoʼob.
15 ¡Kexiʼ ka xuʼulsaʼak tiʼ tuláakal in enemigoʼobeʼ!+
¡Kexiʼ láayliʼ kuxaʼanoʼob ka xiʼikoʼob yáanal luʼumeʼ!
Tumen chéen baʼax kʼaas ku beetkoʼob yéetel chéen le yaan tu puksiʼikʼaloʼob.
16 Pero teneʼ yaan in kʼáatik áantaj tiʼ Jéeoba,letiʼ túuneʼ yaan u salvarken.+
17 Desde ken sáasak tak ken áakʼabchajkeʼ táan in muʼyaj, táan in wáakam,+Dios túuneʼ ku yuʼubik in oración.+
18 Letiʼeʼ yaan u salvarken, yaan u beetik u xuʼulul u líikʼil máakoʼob tin contra,tumen u jaajileʼ yaʼab máakoʼob ku taaloʼob tin contra.+
19 Dios, le máax desde úuch kulak tu tronooʼ,+yaan u yuʼubik in oración,+ yaan u líikʼil tu contraʼob. (Séla)
Kex beyoʼ le máaxoʼob maʼatech u respetarkoʼob Diosoʼ+maʼ ken u yóot u kʼex u tuukuloʼob.
20 Aitofeleʼ tu atacartaj le máaxoʼob ku biskubaʼob kaʼach tu yéeteloʼ,+maʼ tu cumplirtaj baʼax u yaʼalmiʼ.+
21 Le baʼax ku yaʼalik kaʼachoʼ bey mantequillaeʼ,+pero u puksiʼikʼaleʼ táan kaʼach u kaxtik baʼateʼel.
Le baʼax ku yaʼalik kaʼachoʼ bey aceiteeʼ,pero u jaajileʼ beyoʼob espadaʼob yaan u yejoʼobeʼ.+
22 Pʼat a kuuch tiʼ Jéeoba,+letiʼ túuneʼ yaan u yáantkech.+
Letiʼeʼ mix bikʼin ken u chaʼa u lúubul le máax utsoʼ.+
23 Chéen baʼaleʼ, in Dios, in wojel yaan a beetik u bin le kʼasaʼan máakoʼob tu maas taamil le luʼumoʼ.+
Le asesinoʼob yéetel le máaxoʼob ku tuusoʼoboʼ maʼ kun kuxtaloʼob mix chúumuk tiʼ le bukaʼaj años unaj u kuxtaloʼoboʼ.+
Le oʼolal teneʼ yaan in confiar tiʼ teech.
Notas
^ Wa «maʼ a taʼakikaba le kéen in kʼáattech áantaj».
