Salmos 69:1-36
Utiaʼal máax ku nuʼuktaj. Unaj u paʼaxal jeʼex le kʼaay ku kʼaabaʼtik «Lirioʼob». Le kʼaayaʼ David tsʼíibte.
69 In Dios, salvarteniʼ, le jaʼoʼ tsʼoʼok u kaʼantal, taʼaytak in búulul.+
2 Tsʼoʼok in bin ich luukʼ, minaʼan tuʼux in waʼatal utiaʼal maʼ in búulul.+
Tsʼoʼok in bin tak tu taamil le jaʼoʼ,táan u bisken u corrienteil le jaʼoʼ.+
3 Tsʼoʼok in kaʼanal ikil in sen kʼáatik áantaj.+
Tsʼoʼok u maʼastal* in kaal.
Tsʼoʼok u kaʼanal in wichoʼob ikil in páaʼtik u taal Dios u yáanten.+
4 Le máaxoʼob pʼekmilen kex minaʼan baʼax oʼolaloʼ+maas yaʼaboʼob ke u tsoʼotsel in pool.
Le máaxoʼob pʼekmilen kex minaʼan baʼax oʼolaloʼ,tsʼoʼok u sen yaʼabtaloʼob, taak u xuʼulskoʼobten.
Beetaʼab in sutik tak le baʼaloʼob maʼ teen okoltmiloʼ.
5 In Dios, techeʼ a wojel maʼ jach yaan in naʼatiʼ,chíikaʼan a wilik le baʼax maʼ maʼalob kin beetkoʼ.
6 Jéeoba, in wojel teech gobernartik le ángeloʼoboʼ, teech le máax yaan tuláakal autoridad tiʼoʼ,maʼ a chaʼik u máanskoʼob suʼtsilil le máaxoʼob ku confiaroʼob tiʼ teech chéen yoʼolal baʼax kin beetkoʼ.
U Dios u kaajil Israel,maʼ a chaʼik u mixbaʼalkúuntaʼal le máaxoʼob meyajtikech* yoʼolal baʼax kin beetkoʼ.
7 Ta woʼolaleʼ táan u yaʼalaʼalten baʼal.+
Jach tsʼoʼok in mixbaʼalkúuntaʼal.+
8 In sukuʼunoʼobeʼ bey maʼ u kʼaj óolenoʼobeʼ,hasta bey j-táanxel luʼumil u yilkenoʼobeʼ.+
9 Le yaabilaj kin wuʼuyik tu yoʼolal a wotochoʼ bey junpʼéel kʼáakʼ ku tóochʼbal ichil tiʼ teneʼ.+
Tsʼoʼok u lúubul tin wóokʼol tuláakal le baʼaloʼob kʼaastak ku yaʼalaʼaltechoʼ.+
10 Ka joʼopʼ in sen okʼol yéetel ka pʼáat mix janal kin beetkeʼ,sen aʼalaʼabten baʼal.
11 Le ka tin búukintaj le nookʼ ku tsʼáaik le máaxoʼob yaachajaʼan u yóoloʼoboʼjoʼopʼ u yaʼalaʼalten baʼal.
12 Chéen tiʼ teen ku tʼaan le máaxoʼob ku kutaloʼob tu joonajil le kaajoʼ,bey xan u beetik le kalaʼanoʼob yéetel le kʼaayoʼob ku beetkoʼoboʼ.
13 Jéeoba Dios,kexiʼ wa tiʼ junpʼéel maʼalob súutuk ka kʼuchuk in oración ta wiknaleʼ.+
In Dios, tumen jach nojoch a yaabilajeʼ,núuk in oración, salvarteniʼ.+
14 Salvarteniʼ,maʼ a chaʼik in búulul ichil le luukʼoʼ.
Maʼ a pʼatken tu kʼab le máaxoʼob pʼekmilenoʼ,salvarten tiʼ le taamkach jaʼoʼ.+
15 Maʼ a chaʼik u bisken u corrienteil le jaʼoʼ+mix a chaʼik u lukʼken le kʼáaʼnáaboʼmix ka u lukʼen le taamkach jooloʼ.+
16 Jéeoba Dios, techeʼ jach a yaabiltmen, uʼuy in oración.+
Tumen jach ka chʼaʼik óotsilileʼ beet in cuentail,+
17 maʼ a taʼakikaba tiʼ teen.+
Áanten tu séebaʼanil tumen jach táan in muʼyaj.+
18 Koʼoten a salvarteniʼ.
Maʼ a pʼatken tu kʼab in enemigoʼob.
19 Tsʼoʼok a wilik bix u yaʼalaʼalten baʼal yéetel bix in mixbaʼalkúuntaʼal.+
Chíikaʼan a wilik tuláakal baʼax ku beetik le máaxoʼob pʼekmilenoʼ.
20 Tsʼoʼok u loobiltaʼal in puksiʼikʼal ikil u yaʼalaʼalten baʼal, maʼ tu páajtal u yutstal.
Táan kaʼach in páaʼtik u chʼaʼabalten óotsilil, pero mix máak beete,+táan kaʼach in páaʼtik máax líiʼsik in wóol, pero mix máak taali.+
21 Tu lugar u tsʼáaikoʼob baʼal in jaanteʼ, tu tsʼáajoʼobten veneno,*+ka ukʼajchajeneʼ tu tsʼáajoʼobten vinagre.+
22 Pʼáatak bey junpʼéel trampa le fiestaʼob* ku beetkoʼoboʼ.
Pʼáatak xan bey junpʼéel trampa le bukaʼaj baʼaloʼob yaantiʼoboʼ.+
23 Ka lukʼuk u sáasilil u yichoʼob utiaʼal maʼ u paakatoʼob,beet u kikilankil u yookoʼob.
24 Wek a pʼujaʼanil tu yóokʼoloʼob,nakpachtaʼakoʼob* tumen a pʼujaʼanil.+
25 Xuʼulsaʼak le tuʼux kajaʼanoʼoboʼ.
Pʼáatak mix máak kajaʼan tu yotochoʼob.+
26 Tumen taak u seguer u beetkoʼob kʼaas tiʼ le máax tsʼoʼok a beetik u muʼyajoʼ,maʼ tu xuʼulul u tsikbaltikoʼob bix u muʼyaj le máax a loobiltmoʼ.
27 Taalak castigo tu yóokʼoloʼob tu yoʼolal le baʼax u beetmoʼoboʼ,maʼ a wilkoʼob bey máakoʼob toj u kuxtaloʼobeʼ.
28 Tuʼupuk u kʼaabaʼob tu libroil le kuxtaloʼ,+maʼ u tsʼíibtaʼal u kʼaabaʼob ichil le máaxoʼob ku beetkoʼob baʼax maʼaloboʼ.+
29 Teneʼ táan in muʼyaj.+
In Dios, kanáanteniʼ, salvarten yéetel a poder.
30 Yaan in kʼaay utiaʼal in alabartik u kʼaabaʼ Dios,yaan in alabartik yéetel yaan in tsʼáaik gracias tiʼ.
31 Leloʼ maas maʼalob ken u yilil Jéeoba ke ka in kʼubtiʼ juntúul toro,maas maʼalob ke juntúul táankelem toro yaan u baakoʼob bey xan u maay.+
32 Le utsul máakoʼoboʼ kéen u yiloʼob baʼax ku beetik Dioseʼ yaan u kiʼimaktal u yóoloʼob.
Teʼex táan a kaxtikeʼex Dioseʼ, kiʼimakchajak u yóol a puksiʼikʼaleʼex.
33 Jéeobaeʼ ku yuʼubik u oración le óotsiloʼoboʼ.+
U yaabiltmaj xan u kaajal bisaʼan táanxel luʼumiloʼ.+
34 Alabartaʼak tumen le kaʼanoʼ bey xan tumen le luʼumoʼ.+
Alabartaʼak tumen le kʼáaʼnáaboʼ bey xan tumen tuláakal baʼax yaan ichil.
35 Tumen Dioseʼ yaan u salvartik u kaajil Sión.+
Yaan xan u jel líiʼsik u kaajiloʼob Judá,tiʼ kun kajtal u kaajaliʼ, tiʼ letiʼob kun pʼáatal.
36 Yaan u pʼáatal tiʼ u paalal le máaxoʼob meyajtik Diosoʼ,+tiʼ kun kajtal xan le máaxoʼob yaabiltmil u kʼaabaʼoʼ.+
Notas
^ Wa «u yaatal».
^ Ich hebreoeʼ ku yaʼalaʼal kaʼach «kaxtikech».
^ Wa «junkúul xíiw jeʼel u kíimsik máakeʼ».
^ Ich hebreoeʼ ku yaʼalaʼal kaʼach «mesa».
^ Wa «chukpachtaʼakoʼob».
