Santiago 1:1-27
1 Teneʼ Santiagoen,+ u esclavoen Dios yéetel u esclavoen Yuumtsil Jesucristo. Le tsʼíibaʼ táan in túuxtik tiʼ le 12 tribuʼob kʼiʼitpajaʼanoʼoboʼ:
¡Kin túuxtikteʼex saludos!
2 In sukuʼuneʼex, kiʼimakchajak a wóoleʼex le kéen probartaʼakeʼex jejeláas bixi,+
3 tumen a wojleʼexeʼ le kéen tsʼoʼokok u probartaʼal a fejeʼex beyaʼ yaan u páajtal a aktáantkeʼex jeʼel baʼalak ka úuchukteʼexeʼ.+
4 Wa mantatsʼ ka aktáantkeʼex baʼax ku yúuchulteʼexeʼ yaan a pʼáatleʼex preparadoil utiaʼal tuláakal baʼal, yaan a chúukaʼanchajleʼex, yaan a beetkeʼex tubeel tuláakal baʼal yéetel mix baʼal ken u binelt tiʼ teʼex.+
5 Le oʼolaleʼ wa yaan tiʼ teʼex ku bineltik naʼat tiʼeʼ seguernak u kʼáatik tiʼ Dios,+ bey túunoʼ yaan u tsʼaʼabaltiʼ,+ tumen Dioseʼ uts tu tʼaan u síik baʼaloʼob tiʼ tuláakal máak yéetel maʼatech u chʼinik tu yich máak.+
6 Chéen baʼaleʼ seguernak u kʼáatik yéetel fe,+ yéetel maʼ u kaʼapʼéeltal u tuukul,+ tumen le máax ku kaʼapʼéeltal u tuukuleʼ bey jeʼex junpʼéel u olail kʼáaʼnáab ku líiʼsaʼal tumen le iikʼoʼ yéetel ku suʼusutaʼal jejeláas tuʼux.
7 Juntúul máak beyaʼ maʼ unaj u páaʼtik u tsʼaʼabal wa baʼax tiʼ tumen Jéeobaiʼ,*
8 tumen kaʼapʼéel u yóol+ yéetel maʼ tu jetsʼik u tuukul tiʼ mix baʼal.
9 Chéen baʼaleʼ le sukuʼunoʼob óotsiloʼoboʼ unaj u kiʼimaktal u yóoloʼob tumen maʼalob yaniloʼob tu táan Dios.+
10 Le sukuʼunoʼob ayikʼaloʼoboʼ unaj xan u kiʼimaktal u yóoloʼob ikil u kanik u beetubaʼob máakoʼob humildeʼob,+ tumen máax ayikʼaleʼ yaan u kíimil jeʼex u kíimil le lool yaan teʼ kʼáaxoʼ.
11 Tumen le kéen jóokʼok Kʼiin yéetel kéen sen chokochajkeʼ ku tijil le xíiwoʼ, ku júutul u lool yéetel ku pʼáatal maʼ jatsʼuts u yilaʼaliʼ. Bey xan kun úuchul tiʼ le ayikʼal máak chʼiikil u kaxt ayikʼaliloʼ.+
12 Kiʼimak u yóol le máax ku chúukpajal u yóol muʼyaj* le kéen probartaʼakoʼ,+ tumen le kéen kʼaʼamak tumen Dioseʼ yaan u kʼuʼubultiʼ u coronail le kuxtal+ u yaʼalmaj Jéeoba u tsʼáaik tiʼ le máaxoʼob maʼ tu xuʼulul u yaabiltikoʼoboʼ.+
13 Le kéen probartaʼak máakeʼ maʼ unaj u yaʼalikiʼ: «Dios probarken». Tumen Dioseʼ maʼ tu páajtal u probartaʼal yéetel baʼaloʼob kʼaastak, mix letiʼ ku probartik máak.
14 Baʼaxeʼ cada juntúuleʼ ku probartaʼal kéen jíiltaʼak yéetel kéen táabsaʼak tumen u tsʼíibolal.+
15 Le tsʼíibolal túunoʼ kéen táabak tu puksiʼikʼal máak yéetel kéen u chʼaʼ u muukʼeʼ ku síijsik le kʼebanoʼ, tu tsʼook túuneʼ le kʼebanoʼ ku taasik kíimil.+
16 Maʼ a tuskabaʼex, in yaabilaj sukuʼuneʼex.
17 Tuláakal le baʼaloʼob maʼalobtak yéetel chúukaʼantak ku siʼibiltoʼonoʼ teʼ kaʼan u taaloʼoboʼ.+ Ku lukʼloʼob yiknal u Taatail le sáasiloʼob yaan teʼ kaʼanoʼ.+ Letiʼeʼ maʼ tu jelpajal mix tu kʼexpajal jeʼex u yúuchul yéetel le boʼoyoʼ.+
18 Dioseʼ letiʼ beet k-síijil úuchik u kaʼansiktoʼon u jaajil,+ utiaʼal beyoʼ tiʼ tuláakal le baʼaloʼob kuxaʼanoʼob u beetmoʼ ka kʼuchkoʼon k-beetba le yáax máakoʼob yéeyaʼanoʼoboʼ.+
19 In sukuʼuneʼex, maʼ u tuʼubulteʼex baʼax kin waʼalik. Cada juntúuleʼ kʼaʼabéet u séeb uʼuyik baʼax ku yaʼalaʼaltiʼ, chéen baʼaleʼ maʼ unaj u séeb tʼaaniʼ+ mix unaj u séeb pʼuʼujuliʼ.+
20 Tumen máax ku pʼuʼujuleʼ maʼ tu beetik baʼax maʼalob tu táan Dios.+
21 Le oʼolaleʼ náachkuntabaʼex tiʼ tuláakal baʼal jeʼel u kʼaskúuntik a kuxtaleʼexeʼ bey xan tiʼ le baʼaloʼob kʼaastak ku beetaʼaloʼ.+ Chaʼex u pakʼik u tʼaan Dios ta puksiʼikʼaleʼex, tumen leloʼ jeʼel u salvartik a kuxtaleʼexeʼ.
22 Chéen baʼaleʼ unaj a beetkeʼex baʼax ku yaʼalik u tʼaan Dios,+ maʼ chéen ka a wuʼuyeʼexiʼ. Maʼ a tuskabaʼex yéetel tuukuloʼob maʼ jaajtakiʼ.
23 Tumen wa yaan máax chéen suuk u yuʼubik u tʼaan Dios chéen baʼaleʼ maʼ tu beetkeʼ,+ jeʼel u páajtal u keʼetel yéetel juntúul máak ku paktik u yich tiʼ junpʼéel néeneʼ.
24 Le kéen tsʼoʼokok u néentikubaeʼ bin ku beetik, yéetel tu séebaʼanil ku tuʼubultiʼ bix letiʼ.
25 Chéen baʼaleʼ le máax ku néentikuba tiʼ le ley jach chúukaʼan+ yéetel ku jáalkʼabtik máakoʼ ku beetik baʼax ku yaʼalik le leyoʼ yéetel maʼ tu tuʼubsik le baʼax ku yuʼubikoʼ. Juntúul máak beyaʼ ku beetik baʼax kʼubéentaʼantiʼ tumen Dios yéetel ku kiʼimaktal u yóol ikil u beetik beyoʼ.+
26 Wa juntúul máak ku tuklik táan u adorartik Dios, chéen baʼaleʼ maʼ tu controlartik u yaakʼeʼ+ táan u tusik u puksiʼikʼal, yéetel chéen kunel le bix u adoraroʼ.
27 Yaan junpʼéel clase adoración* limpio yéetel kʼamaʼan tumen Dios k-Taata. Le máaxoʼob yaantiʼob le adoración jeʼelaʼ unaj u beetkoʼob lelaʼ: unaj u kanáantkoʼob le paalaloʼob kimen u taataʼoboʼ+ bey xan le viudaʼob+ táan u muʼyajoʼoboʼ,+ yéetel unaj u náachkuntkubaʼob tiʼ le baʼaloʼob kʼaastak ku beetaʼal teʼ yóokʼol kaabaʼ.+
