Tito 3:1-15
3 Seguernak a kʼaʼajsik tiʼ le sukuʼunoʼob ka yanakoʼob yáanal u páajtalil le máaxoʼob ku gobernaroʼoboʼ bey xan yáanal u páajtalil le máaxoʼob yaan autoridad tiʼoboʼ.+ Aʼaltiʼob ka u yuʼuboʼob u tʼaanoʼob yéetel ka u listokíintubaʼob utiaʼal tuláakal maʼalob meyaj.
2 Kʼaʼajstiʼob xaneʼ maʼ unaj u tʼaanoʼob kʼaas tiʼ mix máakiʼ yéetel maʼ unaj u kaxtikoʼob baʼateliʼ, baʼaxeʼ kʼaʼabéet uts u puksiʼikʼaloʼob*+ yéetel maʼ unaj u séeb kʼuuxiloʼob yéetel mix máakiʼ.+
3 Tumen úuchjeakileʼ tak toʼon minaʼan k-naʼat, maʼatech k-uʼuyik tʼaan, tusaʼanoʼon, k-chaʼik jíiltaʼal tumen jejeláas tsʼíibolaloʼob yéetel chéen chʼiikiloʼon k-kiʼimakkúunt k-óol, k-beetik baʼaloʼob kʼaastak yéetel k-tsʼíiboltik baʼax yaan tiʼ u maasil, jach kʼasaʼanoʼon yéetel k-paklan pʼektikba kaʼachi.
4 Chéen baʼaleʼ Dios, le k-Salvadoroʼ,+ tu yeʼesaj u yutsil bey xan u yaabilaj tu yoʼolal wíinik.
5 (Lelaʼ tu beetaj maʼ tumen wa yaan baʼaxoʼob maʼalobtak k-beetmiʼ,+ baʼaxeʼ tumen tu chʼaʼajtoʼon óotsilil).+ Letiʼeʼ tu salvartoʼon úuchik u yisíinskoʼon yéetel le jaʼ ku tsʼáaik kuxtaloʼ+ bey xan úuchik u túumbenkuntkoʼon yéetel u espíritu santo.*+
6 Dioseʼ tu yoʼolal Jesucristo k-Salvadoreʼ tu wekaj t-óokʼol yaʼab tiʼ le espíritu santoaʼ,+
7 utiaʼal beyoʼ le kéen tsʼoʼokok u yaʼalaʼal toj k-kuxtal yoʼolal u nojoch utsileʼ+ ka kʼuchkoʼon k-tiaʼalint le baʼax aʼalaʼan u tsʼaʼabaltoʼonoʼ,+ lelaʼ letiʼe kuxtal minaʼan u xuul táan k-páaʼtikoʼ.+
8 Le baʼaloʼobaʼ jach unaj u creertaʼal, yéetel in kʼáat ka seguernak a tʼaan tu yoʼolaloʼob, utiaʼal beyoʼ le máaxoʼob tsʼoʼok u tsʼáaik u fejoʼob tiʼ Diosoʼ ka chʼíikik u beetoʼob maʼalob meyajoʼob. Le baʼaloʼobaʼ jach maʼalobtak utiaʼal le máakoʼoboʼ yéetel jeʼel u taasik utsil tiʼobeʼ.
9 Chéen baʼaleʼ maʼ a woksikaba tiʼ sakachtʼaanoʼob, mix tiʼ u xakʼaltaʼal máax u yúuchben láakʼtsil máakiʼ, mix tiʼ baʼateloʼob, mix xan tiʼ baʼateltʼaanoʼob yaan yil yéetel le Leyoʼ, tumen mix baʼal u biilaloʼob.+
10 Wa juntúul máak maʼ tu xuʼulul u kaʼansik yaanal baʼaloʼob+ kex tsʼoʼok kaʼatéen a tsolik u nuʼuk tiʼeʼ+ xuʼuluk a biskaba tu yéetel.+
11 Techeʼ a wojleʼ le máakoʼ tsʼoʼok u kʼéechel tiʼ le bejoʼ, táan u kʼebantal yéetel tsʼoʼok u náajmatik ka castigartaʼak.
12 Le kéen in túuxt Ártemas wa Tíquico+ ta wiknaleʼ beet tuláakal le ku páajtal utiaʼal a taal tin wiknal tu kaajil Nicópolis, tumen teʼeloʼ tiʼ tsʼoʼok in chʼaʼtuklik in máansik u kʼiiniloʼob keʼeliʼ.
13 Utiaʼal le viaje ken u beet Apolos yéetel Zenas, le máax jach u kʼaj óol baʼax ku yaʼalik le Leyoʼ, jach ilawil a tsʼáaik tuláakal baʼax kʼaʼabéettiʼob.+
14 Le u maasil k-sukuʼunoʼoboʼ unaj u kanik u beetoʼob maʼalob meyajoʼob utiaʼal ka páajchajak u yáantajoʼob le kéen kʼaʼabéetchajak,+ bey túunoʼ yaan u yantal u yich u meyajoʼob.+
15 Tuláakal le máaxoʼob yanoʼob tin wéeteloʼ ku túuxtikoʼobtech saludos. Tsʼáa xan in saludos tiʼ tuláakal le sukuʼunoʼob ku yeʼeskoʼobtoʼon yaabilajoʼ.
Ka u yeʼes Dios u nojoch utsil tiʼ tuláakleʼex.
Notas
^ Wa «maʼ unaj u pechkubaʼob tiʼ baʼax u kʼáatoʼobiʼ».
^ Ilawil «Espíritu santo», página 2562.
