Kex tu kʼiiniloʼob Jacob maʼ tsʼaʼabak junpʼéel ley ku tʼaan tiʼ le imagenoʼoboʼ, letiʼeʼ u yojel kaʼacheʼ chéen Jéeoba unaj u adorartaʼal (Éx 20:3-5). Le oʼolaleʼ le ka aʼalaʼabtiʼ tumen Jéeoba ka suunak Beteleʼ, Jacobeʼ tu yaʼalaj tiʼ u láakʼtsiloʼob yéetel tiʼ le máaxoʼob yanoʼob tu yotochoʼ ka u juntartoʼob u imagenoʼob. Jacob túuneʼ tu mukaj tuláakal le imagenoʼob yéetel le tuupoʼob maʼ xaan ku meyajtiʼob bey amuletoʼoboʼ (Gé 35:1-4). Jéeobaeʼ jach maʼalob tu yilil le baʼax tu beetaj Jacoboʼ.

Teʼ kʼiinoʼobaʼ, ¿bix jeʼel u páajtal k-adorartik chéen Jéeobaeʼ? Yáaxeʼ maʼ unaj u yantaltoʼon mix baʼal yaan yil yéetel imagenoʼob, espiritismo wa uláakʼ baʼaloʼob beyaʼ. Lelaʼ u kʼáat u yaʼaleʼ maʼ unaj u yantaltoʼon mix baʼal yaan yil yéetel le baʼaloʼobaʼ, tsʼoʼoleʼ unaj k-ilik wa maʼalob le baʼax yéetel k-náaysik k-óoloʼ. Tukle: «¿Kin xokik wa libroʼob wa kin wilik películaʼob tuʼux ku chíikpajal vampiroʼob, zombiʼob wa uláakʼ baʼaloʼob beyaʼ? ¿Kin náaysik wa in wóol yéetel baʼaloʼob yaan yil yéetel magia, j-meenil wa u beetaʼal kʼaas tiʼ máak tumen juntúul j-meen?». U jaajileʼ kʼaʼabéet k-náachtal tiʼ tuláakal baʼax u pʼekmaj Jéeoba (Sl 97:10).

CHAʼANT LE VIDEO «TSʼÁABAʼEX TU CONTRA LE KʼAASILBAʼALOʼ», TSʼOʼOLEʼ NÚUK LE KʼÁATCHIʼOBAʼ:

• ¿Baʼax tu aktáantaj Palesa, juntúul koʼolel ku xokik le Bibliaoʼ?

• ¿Baʼaxten maʼalob ka k-kʼáat u yáantaj le ancianoʼob wa táan k-aktáantik wa baʼax yaan yil yéetel j-meenil wa yéetel le demonioʼoboʼ?

• ¿Baʼax maʼ unaj u yantaltoʼon wa k-kʼáat ka u kanáantoʼon Jéeobaeʼ?

• ¿Baʼax tu chʼaʼtuklaj u beetik Palesa?

• Ta wotocheʼ, ¿baʼax jeʼel a beetik utiaʼal a náachkuntikaba tiʼ le demonioʼoboʼ?