Wa yaantech 23 tak 65 años, precursorech, toj a wóol yéetel jeʼel a wóotik bin áantaj tuʼux maas kʼaʼabéeteʼ jeʼel u páajtal a chupik junpʼéel solicitud utiaʼal le Escuela utiaʼal Máaxoʼob Kʼaʼaytik le Reinooʼ. Desde ka káaj le escuelaaʼ u milesil sukuʼunoʼob yéetel kiikoʼob tsʼokaʼan u beeloʼob bey xan maʼ tsʼokaʼan u beeloʼob tsʼoʼok u yoksik u solicitudoʼob utiaʼal u binoʼobiʼ. Chéen baʼaleʼ láayliʼ jach kʼaʼabéet u yáantaj xiiboʼob maʼ tsʼokaʼan u beeloʼobiʼ. Le oʼolaleʼ kʼáat tiʼ Jéeoba ka u yáantech utiaʼal ka taakak a maas meyajtik jeʼex úuchik u beetik Jesúsoʼ (Sl 40:8; Mt 20:28; Heb 10:7). Kéen tsʼoʼokkeʼ ilawil baʼax jeʼel u páajtal a kʼexik ichil a meyaj bey xan ichil a kuxtal utiaʼal u páajtal a biniʼ.

¿Baʼax tsʼoʼok u yúuchul yéetel le sukuʼunoʼob tsʼoʼok u binoʼob teʼ escuelaaʼ? Yanoʼobeʼ tsʼoʼok u túuxtaʼaloʼob áantaj tuʼux ku tʼaʼanal yaanal idioma. Uláakʼoʼobeʼ tsʼoʼok u túuxtaʼaloʼob tiʼ nukuch kaajoʼob utiaʼal u yáantajoʼob teʼ kʼaʼaytaj ku beetaʼal tuʼux yaʼab u máan máakoʼ. Kéen máanak kʼiineʼ yaan tiʼ le sukuʼunoʼobaʼ ku beetik u sustitutoiloʼob, uláakʼoʼobeʼ ku beetik u superintendenteiloʼob tiʼ circuito yéetel yanoʼobeʼ ku beetik u misioneroiloʼob. Le táan a tuklik baʼax jeʼel a beetik utiaʼal a maas meyajtik Jéeobaeʼ tuukulnen jeʼex le profeta Isaíasaʼ: «¡Way yaneneʼ! ¡Túuxteniʼ!» (Isa 6:8).

CHAʼANT LE VIDEO LE MISIONEROʼOBOʼ JACH KU YÁANTAJOʼOB TEʼ JOOCH TÁAN U BEETAʼALOʼ, TSʼOʼOLEʼ NÚUK LE KʼÁATCHIʼOBAʼ:

• ¿Bix u yéeyaʼal le misioneroʼob kun túuxtbiloʼob áantajoʼ?

• ¿Bukaʼaj áantaj ku tsʼáaik le misioneroʼoboʼ?

• ¿Baʼax bendicióniloʼob ku kʼamik le misioneroʼoboʼ?