Jéeobaeʼ u kʼáat ka u tsʼoʼokbes máak le baʼax tu prometertaj le ka tsʼoʼok u beeloʼ. Letiʼeʼ maʼ u kʼáat ka u pʼatuba le máaxoʼob tsʼokaʼan u beeloʼoboʼ (Mt 19:5, 6). Ichil u kaajal Jéeobaeʼ le máaxoʼob tsʼokaʼan u beeloʼoboʼ kiʼimak u yóoloʼob. Pero u jaajileʼ deporsi ku yantal problemas ichil le tsʼokaʼan u beeloʼoboʼ. Kex ka yanaktoʼon problemas yéetel k-núupeʼ maʼ unaj k-jáan tuklik k-pʼatikba wa k-divorciartikbaiʼ. ¿Baʼax unaj k-beetik utiaʼal ka yanaktoʼon kiʼimak óolal?

Koʼox ilik cinco baʼaloʼob unaj u beetik máak.

1. Kanáant a puksiʼikʼal. Maʼ a coquetear mix a chaʼantik baʼaloʼob maʼ maʼalobtakiʼ, le baʼaloʼobaʼ jeʼel u beetkoʼob a náachtal tiʼ a núupeʼ (Mt 5:28; 2Pe 2:14).

2. Ilawil a maas natsʼkaba tiʼ Jéeoba, ilawil a beetik baʼax uts tu tʼaan (Sl 97:10).

3. Ilawil a maas eʼesik le jatsʼuts modos ku taal tiʼ Diosoʼ, yéetel ilawil a wáantik a núup tak tiʼ baʼaloʼob mejentak utiaʼal a weʼesik a yaabilaj tiʼ (Col 3:8-10, 12-14).

4. Tsikbalnen mantatsʼ tu yéetel a núup yéetel respetarte (Col 4:6).

5. Kʼaʼabéet a weʼesik yaabilaj tak tiʼ baʼaxoʼob yaan yil yéetel le núupchitaloʼ (1Co 7:3, 4; 10:24).

Wa le máaxoʼob tsʼokaʼan u beeloʼob ku beetkoʼob le baʼax tsʼoʼok u yaʼalaʼalaʼ táan u yeʼeskoʼob ku respetarkoʼob Jéeoba, le máax beet u yantal le tsʼoʼokol beeloʼ.

CHAʼANT LE VIDEO UNAJ U CHÚUKPAJAL K-ÓOL ÁALKAB: UNAJ A WÁALKAB JEʼEX U YAʼALIK JÉEOBAOʼ, TSʼOʼOLEʼ NÚUK LE KʼÁATCHIʼOBAʼ:

• Kex tu káajbal maʼalob u bin tiʼ le máaxoʼob tsʼokaʼan u beeloʼoboʼ, ¿bey baʼax problemas jeʼel u yantaltiʼobeʼ?

• Le Bibliaoʼ, ¿bix jeʼel u yáantik le máaxoʼob ku yuʼubikoʼob tsʼoʼok u xuʼulul u yaabiltikubaʼoboʼ?

• ¿Baʼax ku yaʼalik Jéeoba tiʼ le tsʼokaʼan u beeloʼoboʼ?

• ¿Baʼax unaj u beetik le íichamtsil yéetel le atantsil utiaʼal ka yanak kiʼimak óolal tiʼoboʼ?