¿Úuch wa káajak a páaʼtik u Reino Dios? ¿Táan wa a páaʼtik yéetel paciencia kex jejeláas talamiloʼob ka aktáantik? (Ro 8:25). Jujuntúul sukuʼunoʼobeʼ ku pʼektaʼaloʼob, ku jaʼajatsʼaʼaloʼob, ku kʼaʼalaloʼob cárcel yéetel yaneʼ ku yaʼalaʼal tak u kíimsaʼaloʼob. Uláakʼoʼobeʼ táan u muʼyajoʼob tumen jach kʼojaʼanoʼob wa tumen tsʼoʼok u chʼíijloʼob.

¿Baʼax unaj k-beetik utiaʼal u seguer u chúukpajal k-óol kex jeʼel baʼaxak ka úuchkeʼ? Utiaʼal k-muʼukʼaʼankúuntik k-fejeʼ sáamsamal unaj k-xokik le Bibliaoʼ, k-tuukul tiʼ baʼax ku yaʼalik yéetel maʼ unaj u tuʼubultoʼon le jatsʼuts esperanza yaantoʼonoʼ (2Co 4:16-18; Heb 12:2). Tsʼoʼoleʼ unaj k-kʼáatik u yáantaj Jéeoba bey xan u kiliʼich muukʼ (Lu 11:10, 13; Heb 5:7). Letiʼeʼ jach u yaabiltmoʼon yéetel yaan u yáantkoʼon utiaʼal ka yanaktoʼon «chowak óolal bey xan kiʼimak óolal» (Col 1:11).

CHAʼANT LE VIDEO UNAJ U CHÚUKPAJAL K-ÓOL ÁALKAB: JACH CREERT YAAN A GANAR, TSʼOʼOLEʼ NÚUK LE KʼÁATCHIʼOBAʼ:

• ¿Baʼaxoʼob jeʼel u jáan úuchul tiʼ máak ichil u kuxtaleʼ? (Ec 9:11)

• Le oracionoʼ, ¿bix u yáantik máak u aktáant le baʼax ku yúuchultiʼoʼ?

• Wa maʼ tu páajtal k-meyajtik Jéeoba jeʼex kaʼacheʼ, ¿baʼaxten maʼalob ka kiʼimakchajak k-óol yéetel le bukaʼaj ku páajtal k-beetkoʼ?

• ¿Baʼax áantkech a wil yaan a tiaʼalintik le promesa u beetmaj Jéeobaoʼ?