Le jaats «Eʼesajiloʼob» yaan teʼ yáax táan juʼun tiʼ U juʼunil xook utiaʼal u muchʼtáambalil Kuxtal yéetel Meyaj jeʼex Cristoeʼ, káaj u jóokʼol enero tiʼ 2018. ¿Bix unaj u meyajtoʼon?

Teʼ jaatsoʼob ku tsʼaʼabaltech teʼ muchʼtáambaloʼ. Unaj u meyajtoʼon le kʼáatchiʼoʼ, le tekstooʼ yéetel le kʼáatchiʼ utiaʼal k-suutoʼ. Baʼaleʼ maʼ jach kʼaʼabéet k-kanik de memoriail le bix u yeʼesaʼal teʼ videoʼoboʼ. Jeʼel u páajtal k-kʼexik bix ken k-máansil, bix ken k-káajsil wa bix ken k-aʼalil u maasiloʼ. Tsʼoʼoleʼ kex u juʼunil xook maʼatech u yaʼalikeʼ jeʼel xan u páajtal u meyajtoʼon junpʼéel publicación tiʼ le nuʼukuloʼob tsʼaʼan utiaʼal kaʼansajoʼ.

Teʼ kʼaʼaytajoʼ. Le eʼesajiloʼoboʼ ku yáantkoʼon utiaʼal k-tuklik tiʼ baʼax jeʼel u páajtal k-tʼaan teʼ kʼaʼaytajoʼ. Wa u yuumil naj ku yeʼesik taak u maas kaanbaleʼ jeʼel u páajtal k-seguertik le tsikbaloʼ yéetel maʼ xaaneʼ u meyajtoʼon xan u tuukulil le revisitaoʼ. Jeʼel xan u páajtal k-kʼexik baʼax ken k-tsikbalt yéetel u yuumil najeʼ. Teʼ tuʼux k-kʼaʼaytajoʼ, ¿maas wa jeʼel k-uʼuyaʼal wa ku meyajtoʼon junpʼéel eʼesajil tsʼoʼok u yáax jóokʼol wa uláakʼ tekstoeʼ? ¿Yaan wa baʼax uchaʼan teʼ territorio jeʼel u meyajtoʼon utiaʼal k-káajsik k-tsikbaleʼ? Toʼon unaj k-ilik bix maas maʼalob ka meyajnaktoʼon le eʼesajiloʼoboʼ. Chéen baʼaleʼ maʼ unaj u tuʼubultoʼoneʼ táan k-beetik tuláakal utiaʼal k-tsikbaltik tiʼ uláakʼ máakoʼob le utsiloʼob ken u taas Diosoʼ (1Co 9:22, 23).