Kex minaʼanoʼon yáanal u Ley Moiseseʼ, Dioseʼ láayliʼ ku kʼáatiktoʼon ka k-tsʼoʼokbes le kaʼapʼéel nojoch Leyoʼoboʼ: K-yaabiltik letiʼ yéetel k-éet máakil (Mt 22:37-39). Le yaabilajaʼ maʼ chéen bey u yantaloʼ. ¿Bix jeʼel u yantaltoʼoneʼ? Yáaxeʼ unaj k-xokik sáamsamal le Bibliaoʼ. Kéen tuukulnakoʼon tiʼ le baʼax k-xokikoʼ, k-ilik u jatsʼuts modos Jéeoba yéetel bukaʼaj utsil t-éetel (Sl 27:4). Lelaʼ ku yáantkoʼon k-yaabilte, k-tuukul jeʼex letiʼeʼ, k-beetik baʼax ku yaʼalik yéetel k-eʼesik xan yaabilaj (Jn 13:34, 35; 1Jn 5:3). Koʼox ilik óoxpʼéel baʼaxoʼob jeʼel u beetik u jatsʼutstal k-ilik u xookil le Bibliaoʼ.

• Máans ta tuukul. Kéen xooknakecheʼ beet cuenta tiaʼanech teʼ tuʼux ku yaʼalik le tsikbaloʼ. ¿Baʼax ka wilkiʼ? ¿Baʼax ka wuʼuyikiʼ? ¿Bix u book le baʼaxoʼob yanoʼ? ¿Bix wal tu yuʼubiluba le máaxoʼob ku chʼaʼchiʼitaʼaloʼoboʼ?

• Xok le Biblia jejeláas bixoʼ. Jeʼel u páajtal k-xok kʼaʼameʼ wa jeʼel u páajtal k-seguertik u xookil le táan k-uʼuyik u grabacioniloʼ. Tu lugar a xokik le Biblia desde tu káajbaloʼ, maʼ xaaneʼ jeʼel u páajtal a xokik u kuxtal juntúul máax meyajt Dios úuchjeakileʼ, wa a xakʼaltik junpʼéel baʼax taak a maas naʼatik. Wa taak a maas kaanbal tiʼ Jesuseʼ, xok le jaats 4 wa 16 tiʼ le folleto Áantaj utiaʼal a xakʼalxoktik u Tʼaan Diosoʼ. Jeʼel u páajtal xan a xokik le capítulo tuʼux chʼaʼab u tekstoil le kʼiinoʼ wa u libroiloʼob le Biblia jeʼel bix binik u tsʼoʼoksaʼaloʼoboʼ.

• Ilawil a naʼatik. Maas maʼalob ka a naʼat u xookil junpʼéel capítulo sáamsamal, tu lugar a jáajan xokik yaʼab capituloʼob. Ilawil tiʼ baʼax ku yúuchul tʼaan. Naʼat tak le baʼaxoʼob ka tuklik maʼ jach kʼaʼanaʼantakoʼ. Meyajnaktech le mapaʼob yéetel le referenciaʼob ku taaskoʼ. Yéetel kaxt kex chéen junpʼéel tiʼ le baʼaxoʼob maʼ ta naʼatoʼ. Wa ku páajtaleʼ le bukaʼaj tiempo ka xookoʼ láayliʼ letiʼe bukaʼaj unaj a jóoʼsik utiaʼal a tuukul tu yoʼolaloʼ.