KUXLAKOʼON JEʼEX CRISTOEʼ
Maas maʼalobkíint a kaʼansaj: Kaʼans a j-xoknáal u líiʼsuba
BAʼAXTEN KʼAʼANAʼAN: Wa ku líiʼskuba le j-xoknáaloʼ séeb ken u naʼat yéetel ken u kʼaʼajs le baʼax ku kanikoʼ. Leloʼ yaan u beetik u maas tsʼáaik u yóol u meyajt Dios. Kéen tsʼoʼokok xan u yokjaʼeʼ, utiaʼal ‹maʼ u wenel› wa u chúukpajal u yóoleʼ, kʼaʼabéet u líiʼskuba utiaʼal le muchʼtáambaloʼob yéetel le kʼaʼaytajoʼ (Mt 25:13). U jóoʼsik tiempo utiaʼal u xookeʼ yaan u taasik utsiloʼob tiʼ tuláakal u kuxtal. Desde tu káajbaleʼ unaj k-kaʼansiktiʼ kʼaʼabéet u líiʼskuba yéetel baʼax ken k-xok tu yéeteloʼ.
BIX JEʼEL A BEETKEʼ:
-
Líiʼsaba yéetel baʼax ken a kaʼanse (Ro 2:21). Kéen a beeteʼ tuukulnen tiʼ le j-xoknáaloʼ (km 11/15 t.j. 3). Eʼestiʼ bix a marcartmil a libro.
-
Aʼaltiʼ ka u líiʼsuba. Kéen u chʼaʼ bej le xookoʼ aʼaltiʼ baʼaxten kʼaʼabéet u líiʼskuba yéetel aʼaltiʼ táakaʼan ichil le xookoʼ. Áant u yil tiʼ baʼax súutukil jeʼel u líiʼskubaeʼ. Yaan sukuʼunoʼobeʼ tu yorail le xookoʼ ku majáantik u libroʼob tiʼ le j-xoknáal utiaʼal ka u yil maas chéen chʼaʼabil u kaxtaʼal u núukil le kʼáatchiʼob wa u marcartmoʼ. Felicitart kéen u líiʼsuba.
-
Eʼestiʼ bix jeʼel u líiʼskubaeʼ. Jujuntúul sukuʼunoʼobeʼ, utiaʼal u kaʼansik u j-xoknáaloʼobeʼ, suuk u múul líiʼskubaʼob le yáax kéen xooknakoʼoboʼ.