BAʼAXTEN KʼAʼANAʼAN: U tsʼíibil 1 Corintoiloʼobeʼ chéen junpʼéel tiʼ le 14 cartaʼob tu túuxtaj apóstol Pablo utiaʼal u líiʼsik u yóol le sukuʼunoʼoboʼ. U maʼalobil u tsʼíibtaʼal junpʼéel cartaeʼ tumen ku páajtal u tuklik máak baʼax ken u yaʼale yéetel yaʼab u téenel jeʼel u xoʼokol tumen le máax kʼamkoʼ. Maʼalob xan utiaʼal u kʼaʼaytaj máak tiʼ u láakʼtsiloʼob, tiʼ máaxoʼob u kʼaj óol bey xan tiʼ uláakʼ máakoʼob taak u maas kaanbaloʼob, le maʼatech k-ilkoʼob tu yotochoʼoboʼ wa le kajaʼanoʼob tuʼux maʼ tu jáan chaʼabal u yokol máakoʼ. ¿Baʼax unaj k-chʼaʼik en cuenta táanil tiʼ k-tsʼíibtik junpʼéel carta tiʼ máax maʼ k-kʼaj óoliʼ?

BIX JEʼEL A BEETKEʼ:

• Tsʼíibt teʼ carta le baʼaxoʼob jeʼel a waʼalik wa ka tsikbalnakech tu yéetel u yuumil najoʼ. Aʼal bix a kʼaabaʼ yéetel baʼax oʼolal ka túuxtik le cartaoʼ. Maʼ xaaneʼ jeʼel u páajtal a kʼáatiktiʼ junpʼéel baʼal utiaʼal u kaxtik u núukil teʼ sitio yaantoʼon ich Internetoʼ. Aʼal xan bix u tsʼaʼabal xook tiʼ máak tu yotoch wa ich Internet (lelaʼ maʼ káajak u meyaj ich mayaiʼ). Jeʼel u páajtal xan a chʼaʼchiʼitik junpʼéel xook suuk u meyajtoʼon utiaʼal k-áantik le máakoʼoboʼ. Ichil le sobre ken a túuxtoʼ jeʼel u páajtal a tsʼáaik junpʼéel chan tarjeta utiaʼal u yokol teʼ sitiooʼ, junpʼéel invitación wa junpʼéel tratado.

• Maʼ u sen yaʼabtal baʼaxoʼob a tsʼíibte. Wa ku sen chowaktal le cartaoʼ, maʼ xaaneʼ maʼ tun láaj xokbil (teʼ táan juʼun 8, jeʼel u páajtal a wilik bix u beetaʼal junpʼéel cartaeʼ).

• Tsʼíib tubeel le tʼaanoʼoboʼ yéetel ilawil ka séeb naʼataʼak; eʼes tsiikil yéetel ilawil maʼ u yuʼubaʼal bey táan a kʼeyajeʼ. Wa yaan a túuxtik le cartaoʼ, kʼáat bajux u bisaʼal yéetel boʼote.