Utiaʼal u biskuba máak yéetel Jéeobaeʼ kʼaʼabéet u xuʼulul u beetik baʼaloʼob kʼaastak (1Pe 1:14-16). Jeʼex kéen u pʼat máak junpʼéel vicioeʼ maʼ xaaneʼ yaan u biskuba maas maʼalob yéetel u familia, maʼ kun jach kʼojaʼantal yéetel maas yaan u yantaltiʼ junpʼíit taakʼin.

Kéen tsʼoʼokok a waʼalik tiʼ le j-xoknáaloʼob baʼax u kʼáat Jéeoba ka u beet máakoʼ, aʼaltiʼob baʼaxten ku yaʼalik yéetel baʼax utsiloʼob ku taasik. Áant le j-xoknáaloʼob u kʼex bix u tuukuloʼoboʼ, le kéen tsʼoʼokkeʼ letiʼobeʼ jeʼel xan u kʼexkoʼob baʼaxoʼob ku beetkoʼobeʼ (Ef 4:22-24). Aʼaltiʼobeʼ yéetel u yáantaj Jéeobaeʼ jeʼel u xuʼulul u beetkoʼob jeʼel baʼaxak maʼ maʼalob suuk u beetkoʼobeʼ (Flp 4:13). Kaʼanstiʼobeʼ kʼaʼabéet tu séebaʼanil ka u kʼáatoʼob áantaj tiʼ Jéeoba kéen u yuʼuboʼob taak u beetkoʼob baʼax maʼ maʼalobiʼ. Áant u yiloʼob bey baʼaxoʼob jeʼel u léenchʼintikoʼob u beetoʼob baʼax maʼ maʼalobeʼ yéetel áantoʼob utiaʼal u suuktal u beetkoʼob baʼaloʼob maʼalobtak. Jach yaan u kiʼimaktal a wóol kéen a wil bix u kʼexik u kuxtaloʼob yéetel u yáantaj Jéeoba.

KÉEN TSʼOʼOKOK A CHAʼANTIK LE VIDEO ÁANT A J-XOKNÁAL UTIAʼAL U PʼATIK LE BAʼALOʼOB U PʼEKMAJ JÉEOBAOʼ, NÚUK LE KʼÁATCHIʼOBAʼ:

• ¿Baʼax tu beetaj Rita yéetel le ancianoʼob le ka tu yojéeltoʼob ku tsʼuʼutsʼik marihuana Coraloʼ?

• ¿Baʼax tu beetaj Rita utiaʼal u yáantik Coral?

• ¿Baʼax tu beetaj Coral utiaʼal u yáantaʼal tumen Jéeoba?