Chéen tukult bix tu yuʼubiluba Jesús le ka tu yuʼubaj u tʼaan u Taataoʼ. Leloʼ le áant utiaʼal u chúukpajal u yóol u aktáant tuláakal le baʼax tu muʼyajtoʼ. Lelaʼ tu yáantaj Pedro, Santiago yéetel Juan utiaʼal u creertikoʼob Jesuseʼ letiʼe Mesíasoʼ yéetel unaj u beetkoʼob baʼax ku yaʼalik. Óoliʼ 32 años úuchuk lelaʼ, Pedroeʼ tu kaʼa kʼaʼajsaj yéetel tu yaʼaleʼ le baʼax tu yilaʼ tu beetaj u maas creertik le baʼaxoʼob u yaʼalmaj Dios yéetel u yáantaj le profetaʼoboʼ (2Pe 1:16-19).
Toʼoneʼ kex maʼ t-ilaj u nojbeʼenil Jesús jeʼex le apostoloʼoboʼ, táan k-ilik bix u béeychajal le baʼax tu yiloʼoboʼ. Bejlaʼeʼ Jesuseʼ juntúul Rey jach yaan u páajtalil yéetel maʼ kun xáantal ken u xuʼuls u enemigoʼob utiaʼal ka u tsʼáa junpʼéel túumben luʼum tuʼux kun antal justiciaiʼ (Ap 6:2).
¿Bix tsʼoʼok u yáantkech a wilik u béeychajal le profecíaʼob yaan teʼ Bibliaoʼ?
