Le yaabilajoʼ jach kʼaʼabéet ichil le familiaoʼ, tumen wa minaʼan yaabilajeʼ maʼ tu páajtal u biskubaʼob mix u múul meyajoʼob. ¿Bix jeʼel u páajtal u yeʼesik yaabilaj le íichamtsil, le atantsil wa le taatatsiloʼoboʼ?

Juntúul íichamtsil ku yeʼesik yaabilajeʼ ku chʼaʼik en cuenta bix u yuʼubikuba u yatan yéetel baʼax ku tuklik (Ef 5:28, 29). Tsʼoʼoleʼ wa taatatsileʼ yaan u yilik u tsʼáaik baʼax kʼaʼabéet tiʼ u paalal yéetel u beetik le Adoración ich Familiaoʼ (1Ti 5:8). Le atantsil ku yeʼesik yaabilaj xanoʼ ku tsʼáaikuba yáanal u autoridad u yíicham yéetel ku yeʼesik tiʼ nojoch respeto (Ef 5:22, 33; 1Pe 3:1-6). Le íichamtsil yéetel le atantsiloʼ kʼaʼabéet u kanik u perdonartubaʼob (Ef 4:32). Le maʼalob taatatsiloʼoboʼ ku kanáantik u paalaloʼob yéetel ku kaʼanskoʼobtiʼob u yaabiltoʼob Jéeoba (Dt 6:6, 7; Ef 6:4). Tsʼoʼoleʼ ku chʼaʼikoʼob en cuenta baʼax problemasil ku aktáantik u paalaloʼob escuela yéetel bix u chúukpajal u yóoloʼob kex táan u túulchʼintaʼaloʼob u beetoʼob baʼax kʼaas. Wa tuláakal le familia ku yeʼesik yaabilajoʼ yaan u yantaltiʼob kiʼimak óolal.

CHAʼANT LE VIDEO MAʼ U XUʼULUL A WEʼESIK YAABILAJ ICHIL A FAMILIA, TSʼOʼOLEʼ NÚUK LE KʼÁATCHIʼOBAʼ:

• Juntúul maʼalob íichamtsileʼ, ¿bix u yeʼesik u yaabiltmaj u yatan?

• Juntúul maʼalob atantsileʼ, ¿bix u yeʼesik jach ku respetartik u yíicham?

• Le taatatsiloʼoboʼ, ¿bix jeʼel u kaʼansik u paalaloʼob u yaabiltoʼob Jéeobaeʼ?