Le libro What Can the Bible Teach Us? óoliʼ jeʼex le libro ¿Baʼax ku kaʼansik le Bibliaoʼ? Maʼ tun xáantaleʼ yaan u jóoʼsaʼal ich yaʼab idiomaʼob. Tu kaʼapʼéelaleʼ junpʼéeliliʼ bix u bin u tsolkoʼob le baʼaxoʼob ku kaʼansik le Bibliaoʼ. Baʼaleʼ le túumbenoʼ maas séeb u naʼataʼal. Beetaʼan utiaʼal máaxoʼob istikyaj u naʼatkoʼob le libro ¿Baʼax ku kaʼansik le Bibliaoʼ? Tu lugar le Tipʼaʼaniloʼ tu tsʼoʼokbaleʼ ku taasik u tsolajil jujunpʼéel tʼaanoʼob wa uláakʼ baʼaloʼob. Tsoʼoleʼ tu káajbal le xookoʼoboʼ minaʼan kʼáatchiʼobiʼ mix tu taasik u cuadroil kʼaʼajsaj, baʼaleʼ tu tsʼoʼokbal cada xookeʼ tiaʼan u nooy le kaʼansajoʼob tsoʼol teʼ xookoʼ. Jeʼex le libro ¿Baʼax ku kaʼansik le Bibliaoʼ?, le túumben libroaʼ jeʼel u páajtal u kʼaʼaytaʼal jeʼel baʼaxak mesileʼ. ¿Bix jeʼel u meyajtoʼon le jejeláas baʼaxoʼob ku taaskoʼ?

U NOOY: Yaʼab máakeʼ maʼalob u kaanbaloʼob ken k-tsʼáa xook tiʼob jeʼex suukileʼ: ku xokikoʼob u xóotʼoliloʼob le libro ¿Baʼax ku kaʼansik le Bibliaoʼ?, tsʼoʼoleʼ k-beetik le kʼáatchiʼoboʼ. Baʼaleʼ ¿kux túun wa yaan juntúul j-xoknáal maʼ u jach ojel le idiomaoʼ? ¿Kux túun wa maʼ u jach ojel xookiʼ? Wa beyoʼ jeʼel u páajtal u meyajtech le túumben librooʼ. Xok tu yéetel chéen u nooy le kaʼansajoʼ; aʼaltiʼ ka u xok tu juunal u túulisil le xookoʼ. Tak chéen 15 minutos ka xooknak ta wéeteleʼ jeʼel u kanik junpʼéel u jaajileʼ. Líiʼsaba maʼalob yéetel tukult baʼax unaj a maas tsolik, tumen chéen u nooy le kaʼansaj ken a xakʼalteʼexoʼ. Baʼaleʼ wa ka xokikeʼex le xóotʼoloʼoboʼ, jeʼel u meyajtech u nooy utiaʼal a wilik baʼax tu kanaj le j-xoknáaloʼ.

TSOLAJIL: Tu tsʼoʼokbal le librooʼ ku tsoʼolol jujunpʼéel tʼaanoʼob yéetel uláakʼ baʼaloʼob; tu tsoolol yanil jeʼex u bin u chíikpajal teʼ xóotʼoloʼoboʼ. Letiʼe máax ku kaʼansaj ken u yil wa maʼalob ka u xokoʼob tu yorail le xookoʼ.