BAʼAXTEN KʼAʼANAʼAN: Utiaʼal a «tsikbaltik tubeel tiʼ tuláakal máak u nojoch utsil Diosoʼ» jach maʼalob ka kʼaʼaytajnakech tiʼ teléfono (Hch 20:24). * Wa k-beetkeʼ yaan u páajtal k-tsikbal yéetel máaxoʼob maʼ tu páajtal k-xíimbaltikoʼob tu yotochoʼoboʼ.

BIX JEʼEL A BEETKEʼ:

• Preparartaba. Yéey tiʼ baʼax kan tʼaan, yéey junpʼéel baʼax jeʼel u taaktal u yuʼubaʼaleʼ. Tsʼoʼoleʼ beet a chan bosquejo. Maʼ xaaneʼ jeʼel u páajtal a tuklik baʼax jeʼel a waʼalik wa ku yokol le contestadora wa buzónoʼ. Maʼalob xan ka a tsʼáa naatsʼ tiʼ teech a bosquejo bey xan le uláakʼ baʼaloʼob kun kʼaʼabéettaltechoʼ, jeʼex a tablet wa a celular tuʼux a jeʼekʼabtmaj JW Library^® wa jw.org^®.

• Maʼ a jach nerviosotal. Tʼaanen jeʼex suukil a beetkeʼ. Chan cheʼejnen yéetel beet cuenta bey aktáan yaniktech le máax yéetel ka tʼaanoʼ. Maʼ u jáawal a tʼaan jach yaʼab tiempo wa maʼ kʼaʼabéetiʼ. Maʼalob xan ka láakʼintaʼakech tumen uláakʼ sukuʼun. Wa le máax ka tʼanik ku beetik junpʼéel preguntaeʼ kaʼa aʼal le preguntaoʼ beyoʼ le sukuʼun láakʼintikechoʼ jeʼel u páajtal u yáantkech a kaxt u núukileʼ.

• Pʼat u chuunpakʼil le revisitaoʼ. Wa le máax ka tʼanik bey jeʼel u yóotik u yuʼub u maasileʼ beettiʼ junpʼéel pregunta utiaʼal a núukiktiʼ kéen a kaʼa tʼane. Jeʼel u páajtal a waʼaliktiʼ wa u kʼáateʼ jeʼel a túuxtiktiʼ junpʼéel publicación tiʼ correoeʼ, tiʼ Internet wa jeʼel xan a bin a kʼub tiʼeʼ. Jeʼel xan u páajtal a túuxtiktiʼ tu celular wa tu correo electrónico junpʼéel video wa junpʼéel xookeʼ. Wa ka wilik maʼalobeʼ jeʼel u páajtal a waʼaliktiʼ ka okok u yil wa baʼax teʼ sitio yaantoʼon ich Internetoʼ.