Le muchʼtáambal ku beetaʼal utiaʼal k-jóokʼol kʼaʼaytajoʼ junpʼéel regalo ku taal tiʼ Jéeoba, tumen ku yáantkoʼon utiaʼal k-eʼesik yaabilaj yéetel utiaʼal k-beetik baʼax maʼalob (Heb 10:24, 25). Le muchʼtáambalaʼ unaj u xáantal 5 wa 7 minutos, ichil le tiempoaʼ tiaʼan u jóoʼsaʼal le grupooʼ, u tsʼaʼabal le territoriooʼ yéetel u beetaʼal le oraciónoʼ. Wa ku beetaʼal kéen tsʼoʼokok junpʼéel muchʼtáambaleʼ maas maʼ unaj u xáantaliʼ. Le máax ken u nuʼuktoʼ unaj u tʼaan tiʼ baʼaxoʼob jeʼel u yáantik le sukuʼunoʼob kun kʼaʼaytajoʼob teʼ kʼiinoʼ. Jeʼex tu kʼiinil sábadoeʼ como maases ku jóokʼol yaʼab sukuʼunoʼob maʼ jóokʼoʼob yáam semanaeʼ jeʼel u páajtal u xakʼaltaʼal baʼax jeʼel u yaʼalik máak kéen kʼaʼaytajnakeʼ. ¿Baʼax uláakʼ jeʼel u páajtal u xakʼaltaʼal teʼ muchʼtáambalaʼ?

• Le jaats «Bix jeʼel a káajsik a tsikbaleʼ», lelaʼ ku jóokʼol tiʼ U juʼunil xook utiaʼal u muchʼtáambalil Kuxtal yéetel Meyaj jeʼex Cristoeʼ.

• Bix jeʼel u meyaj junpʼéel noticia wa junpʼéel baʼax uchaʼan utiaʼal u káajsik máak u tsikbaleʼ.

• Baʼax jeʼel u yaʼalik máak tiʼ máax maʼ u kʼáat u yuʼub le kʼaʼaytajoʼ.

• Baʼax jeʼel u yaʼalik máak tiʼ juntúul máax maʼ tu creertik Dios, juntúul máax ku creertik le evoluciónoʼ, juntúul máax ku tʼanik uláakʼ idioma wa juntúul máax yaan junpʼéel religión tiʼ maʼ jach kʼaj óolaʼaniʼ.

• Bix jeʼel u usartaʼal le sitio jw.org, JW Library^® wa le Bibliaoʼ.

• Bix jeʼel u meyaj junpʼéel tiʼ le publicaciónoʼob tsʼaʼan utiaʼal k-kaʼansajoʼ.

• Bix jeʼel u kʼaʼaytaj máak tiʼ teléfono, tiʼ carta, teʼ tuʼuxoʼob yaʼab u máan máakoʼ, bix jeʼel u beetaʼal revisitaʼobeʼ wa bix jeʼel u tsʼaʼabal xookeʼ.

• Bix jeʼel u kanáantkuba máak kéen kʼaʼaytajnakeʼ, bix jeʼel u yeʼesik jatsʼuts modoseʼ wa uláakʼ baʼaloʼob beyaʼ.

• Junpʼéel xook wa junpʼéel video tiʼ le folleto Tsʼáa a wóol xook yéetel kaʼansaj.

• Bix jeʼel k-líiʼsik u yóol le máax ku kʼaʼaytaj t-éeteloʼ.

• Junpʼéel teksto ku tʼaan tiʼ u kaʼansaʼal máak wa junpʼéel jatsʼuts experiencia.