Taʼaytak u xuʼulsaʼal u paciencia Jéeoba tumen le kʼasaʼan yóokʼol kaabaʼ. Teʼ kʼiin jeʼeloʼ yaan u xuʼulsaʼal tiʼ le religiónoʼob maʼatech u kaʼanskoʼob u jaajiloʼ, junmúuchʼ kaajoʼobeʼ yaan u líikʼloʼob tu contra u kaajal Jéeoba yéetel letiʼeʼ yaan u xuʼulsik tiʼ tuláakal la kʼasaʼan máakoʼob teʼ Armagedónoʼ. ¿Máasaʼ jach taak k-ilik u béeytal leloʼ?

U jaajileʼ yaʼab baʼaloʼob maʼ k-ojel yoʼolal le nojoch muʼyajiloʼ. Por ejemploeʼ maʼ k-ojel jach baʼax hora ken káajakiʼ, baʼax kun péeksik le gobiernoʼob utiaʼal u líikʼloʼob tu contra le religiónoʼoboʼ, bukaʼaj tiempo kun atacarbil u kaajal Dios, bix kun atacarbil yéetel baʼax ken u beet Jéeoba utiaʼal u xuʼulsik tiʼ le kʼasaʼan máakoʼob teʼ Armagedónoʼ.

Chéen baʼaleʼ maʼ unaj k-sajaktaliʼ, tumen le Bibliaoʼ u yaʼalmajtoʼon baʼax kʼaʼabéet k-ojéeltik. Por ejemploeʼ k-ojel kuxaʼanoʼon tu yalab u «tsʼook kʼiinoʼob» (2Ti 3:1). K-ojel utiaʼal maʼ u saʼatal le jaajil religiónoʼ yaan u «pʼíitkuntaʼal le kʼiinoʼob» kun atacarbil le religiónoʼoboʼ (Mt 24:22). K-ojel Jéeobaeʼ yaan u salvartik u kaajal (2Pe 2:9). Tsʼoʼoleʼ k-ojel Jéeobaeʼ tsʼoʼok u yéeyik juntúul máax yaan u poder yéetel ku beetik baʼax toj utiaʼal u xuʼulsik tiʼ le kʼasaʼan máakoʼoboʼ bey xan utiaʼal u salvartik le yaʼabkach máakoʼob teʼ Armagedónoʼ (Ap 19:11, 15, 16).

Le kéen úuchuk le baʼaloʼobaʼ «le máakoʼoboʼ yaan u desmayaroʼob tumen jach saajkoʼob» (Lu 21:26). Chéen baʼaleʼ toʼoneʼ maʼ ken k-sajaktal. Wa k-tuukul tiʼ bix úuchik u salvartik u kaajal Jéeoba úuchjeakil bey xan tiʼ le baʼaxoʼob tsʼoʼok u tsʼáaik k-ojéeltoʼ, yaan k-beetik le baʼax ku yaʼalik Lucas 21:28: «Toj waʼaleneʼex yéetel líiʼs a pooleʼex, tumen tsʼoʼok u náatsʼal u kʼiinil a jáalkʼabtaʼaleʼex».