Jach kʼaʼabéet k-kʼaʼaytaj tumen taʼaytak u káajal le nojoch muʼyajiloʼ (Pr 24:11, 12, 20). Utiaʼal k-áantik le máakoʼob u xokoʼob le Biblia yéetel ka ookkoʼob teʼ kúuchil yaantoʼon ich Internetoʼ, maʼalob ka meyajnaktoʼon le mejen tarjetaʼoboʼ. Tu paachoʼobeʼ ku taaskoʼob junpʼéel código ku jeʼekʼabtik le video ¿Baʼaxten unaj a xokik le Bibliaoʼ? Ku invitartik xan máak u kan u maasil wa u kʼáatik ka tsʼaʼabak xook tiʼ yéetel le Bibliaoʼ. Jujuntúul máakoʼobeʼ maʼ tu yóotik u kʼamoʼob le publicacionoʼoboʼ, pero jeʼel u yóotkoʼob okol teʼ jw.org. Ken a wil beyoʼ tsʼáa le tarjeta tiʼoboʼ. Chéen baʼaleʼ maʼ unaj a tsʼáaik tiʼ le máakoʼob maʼ taak u kaanbaloʼoboʼ.

Le tarjetaaʼ jeʼel u meyajtech tiʼ jeʼel baʼaxak súutukileʼ. Utiaʼal u chʼaʼabaleʼ jeʼel u páajtal a waʼalikeʼ: «In kʼáat in tsʼáatech le chan tarjetaaʼ. Ku yeʼesik bix jeʼel a wokol Internet utiaʼal a xokik publicacionoʼob yéetel a chaʼantik videoʼob yoʼolal jejeláas temaʼobeʼ. Gratis» (Jn 4:7). Tumen mejentak le tarjetaʼobaʼ jeʼel u páajtal a bisik wa jaypʼéel utiaʼal a pʼatik tiʼ wa máax taak u kaanbaleʼ.