A sen tʼaan. Maʼ a tuklik wa teech kan láaj tsolik. Jesuseʼ tu beetaj kʼáatchiʼob utiaʼal u yáantik máak u naʼat le baʼax ku kaʼansikoʼ (Mt 17:24-27). Le kʼáatchiʼoboʼ ku yáantaj utiaʼal maʼ u nak óoltal le xookoʼ; jeʼel u yeʼesiktech xan baʼax ku naʼatik le j-xoknáaloʼ yéetel baʼax ku creertik (be t.j. 253 § 2, 3). Ken a beet junpʼéel kʼáatchiʼeʼ páaʼt u núukaʼal tumen le j-xoknáaloʼ. Wa maʼ u yojel u núukileʼ maʼ a waʼaliktiʼ; beet uláakʼ kʼáatchiʼob tiʼ tak ken u núuk tubeel le baʼax ka kʼáatiktiʼoʼ (be t.j. 238 § 1, 2). Utiaʼal u naʼatik a j-xoknáal le baʼaxoʼob túumbentak ka tsoliktiʼoʼ maʼ a tʼaan jach séebaʼan (be t.j. 230 § 4).

A tsolik yaʼab baʼal. Kex taak a láaj tsolik le baʼax a wojloʼ, chéen tsol le baʼax maas kʼaʼanaʼan ku yaʼalik le xóotʼoloʼ (Jn 16:12; be t.j. 226 § 4, 5). Wa ka tsolik yaʼab baʼaloʼobeʼ, kex jeʼel bukaʼaj jatsʼutsileʼ, yaan a satik le j-xoknáaloʼ (be t.j. 235 § 3). Desde ken a wil tsʼoʼok u naʼatikeʼ máanen tuláakʼ xóotʼoloʼ.

A jáajan xook. Baʼax k-kaxtikeʼ k-kʼuchul tu puksiʼikʼal le j-xoknáaloʼ, maʼ k-jáajan tsʼoʼoksik le xookoʼ (Lu 24:32). Utiaʼal u meyaj le páajtalil yaan tiʼ u Tʼaan Diosoʼ xok chéen le tekstoʼob maas kʼaʼanaʼantakoʼ (2Co 10:4; Heb 4:12; be t.j. 144 § 1-3). Meyajnaktech kettʼaanoʼob séeb u naʼataʼal (be t.j. 245 § 1-3). Utiaʼal a wojéeltik bix jeʼel a tsʼáaik xook tiʼ cada j-xoknáaleʼ, tuukulnen tiʼ bix kuxlik yéetel baʼax ku creertik. Kʼáattiʼ: «¿Bix a wilik le baʼax ta kanaj bejlaʼoʼ? ¿Baʼax ku kaʼansiktoʼon yoʼolal Jéeoba? ¿Bix a tuklik jeʼel u bintech wa ka beetik le baʼax ta kanoʼ?» (be t.j. 238 § 3-5; t.j. 259 § 1).