Le xookoʼob yéetel le videoʼob yaan tu káajbal le sitio jw.org, beetaʼan utiaʼal u yáantaʼal le máaxoʼob jach tu jaajil taak u náatsʼloʼob tiʼ Diosoʼ (Hch 13:48). Teʼeloʼ suuk u jóokʼol le baʼaxoʼob ku yaʼalaʼal teʼ noticiaʼoboʼ wa le baʼaxoʼob chiʼichnakkúuntik máakoʼ.

¿Bix jeʼel u meyajtech u káajbal le sitio utiaʼal a kʼaʼaytajoʼ?

• Ooken a wil mantatsʼ baʼax ku tsʼaʼabal teʼ sitiooʼ. Kéen a wil le xook ku chíikpajal tu káajbal le sitiooʼ tukult bix jeʼel u meyajtech teʼ kʼaʼaytajoʼ (utiaʼal a wilik le xookoʼob tsʼoʼok u jóokʼloʼoboʼ tsʼáankʼabt tuʼux ku yaʼalik «Ilawil u maasil»). Le xookoʼobaʼ jach jeʼel u yáantkech kéen kʼaʼaytajnakecheʼ.

• Meyajnaktech le xookoʼob yéetel le videoʼob yaan tu káajbal le sitio utiaʼal a tsikbal yéetel le máakoʼoboʼ. Le baʼaxoʼob ku taaskoʼ jeʼel u yáantkech a wil baʼax chiʼichnakkúuntikoʼobeʼ.

• Eʼes u káajbal le sitiooʼ. Ilawil a weʼesik jujunpʼéel baʼaxoʼob ku taasik yéetel bix jeʼel u kaxtaʼal informacióneʼ.

• Túuxt junpʼéel enlace. Yaan máakoʼobeʼ kex maʼ uts tu tʼaan ka k-xíimbaltoʼobeʼ, uts tu tʼaan u yookloʼob teʼ sitio jw.org. Le beetkeʼ wa k-ilik yaan máax taak u kaanbaleʼ jeʼel u páajtal k-túuxtiktiʼ u enlaceil le baʼax ku chíikpajal tu káajbal le sitiooʼ, junpʼéel xook wa junpʼéel video.