Tukulte: Timeʼ táan u báaxal yéetel u amigoʼob, le ku beetkoʼobeʼ ka tu paʼajoʼob u parabrisail u coche u vecino.

Wa teech Timeʼ, ¿baʼax jeʼel a beetkeʼ?

ÓOXPʼÉEL BAʼAX JEʼEL U PÁAJTAL A BEETKEʼ:

1. A púutsʼul.

2. A waʼalik yaanal máax beete.

3. A waʼalik tiʼ a vecino baʼax ta beetaj yéetel a wilik a boʼotiktiʼ.

Maʼ xaaneʼ jeʼel u taaktal a yéeyik le Yáaxoʼ. Chéen baʼaleʼ u maas maʼalobileʼ letiʼe ka a waʼal baʼax maʼ maʼalob tsʼoʼok a beetkoʼ.

1. Letiʼe u maas maʼalobiloʼ.

   Le Bibliaoʼ ku yaʼalik: «K-kʼáat k-beet tuláakal baʼal tu nuʼuk bey xan yéetel x-maʼ tuusil» (Hebreoʼob 13:18).

2. Wa ka reconocertik baʼax maʼ maʼalob a beetmeʼ, maas jeʼel a perdonartaʼaleʼ.

   Le Bibliaoʼ ku yaʼalik: «Máax ku muklik kʼebaneʼ, maʼ bíin xiʼik utsil tiʼiʼ; baʼaleʼ máax ku [yaʼalik] yéetel ku pʼatkeʼ bíin [perdonartaʼak]» (Proverbios 28:13).

3. U maas kʼaʼanaʼanileʼ yaan a kiʼimakkúuntik u yóol Dios.

   Le Bibliaoʼ ku yaʼalik: «Kʼaas u lúubul tiʼ Yuumtsil le loolob máakoʼoboʼ, baʼaleʼ tiʼ le utsil máakoʼoboʼ ku tsʼáaik u yoksaj óolal» (Proverbios 3:32).

Karina, yaan 20 años tiʼeʼ, tu taʼakaj tiʼ u papá multartaʼab tumen jach chich u máan yéetel u coche, kex beyoʼ u papaeʼ tu yojéeltaj. Karinaeʼ ku yaʼalik: «Kex junpʼéel año úuchuk lelaʼ, in papaeʼ tu yilaj u reciboil le multa tsʼaʼabtenoʼ. ¡Lelaʼ jach tu taasajten yaʼab problemaʼob!».

¿Baʼax ku kaʼansiktoʼon lelaʼ? Karinaeʼ ku yaʼalik: «U taʼakik máak junpʼéel baʼax maʼ maʼalob ku beetkeʼ mix junpʼéel utsil ku taasik. Tumen yaan u kʼuchul u kʼiinil u boʼotik máak baʼax u beetmaj».

Le Bibliaoʼ ku yaʼalik: «Tuláakloʼon k-tʼóochpajal yaʼab u téenel» (Santiago 3:2). Wa k-reconocertik le baʼax maʼ maʼalob k-beetkoʼ, ku yeʼesik kabal k-óol yéetel kʼanchajaʼan k-tuukul.

Uláakʼ baʼax unaj a beetkeʼ a kaanbal tiʼ le baʼaxoʼob maʼ maʼalobtak ka beetkoʼ. Juntúul x-chʼúupal ku kʼaabaʼtik Veraeʼ ku yaʼalik: «Kin wilik in kaanbal tiʼ le baʼaxoʼob maʼ maʼalobtak kin beetkoʼ. Cada junpʼéeleʼ ku yáantken in maas kanáant baʼaxoʼob kin beetik. Beyoʼ tuláakʼ ken úuchukteneʼ in wojel baʼax ken in beete». ¿Baʼax jeʼel a beetik wa ka úuchuktech junpʼéel tiʼ le baʼaloʼobaʼ?

¿Baʼax jeʼel a beetik wa ka kʼaskúuntik u bicicleta a papaeʼ?

• Maʼ ken in waʼaltiʼ, maʼ xaaneʼ maʼ ken u tsʼáa cuenta.

• Yaan in waʼaliktiʼ jach baʼax úuchi.

• Yaan in waʼaliktiʼ baʼax úuchi, chéen baʼaleʼ yaan in waʼalik yaanal máax beete.

¿Baʼax jeʼel a beetik wa maʼ ta máansaj a examen tumen maʼ xooknajechiʼ?

• Yaan in waʼalik jach difícil le examenoʼ.

• Yaan in waʼalik in culpa tumen maʼ xooknajeniʼ.

• Yaan in waʼalik chéen u pʼekmen le profesoroʼ.

 Beoraaʼ tukult bix jeʼel a wuʼuyikaba wa teech 1) le taatatsil bey xan wa teech 2) le profesoroʼ. ¿Baʼax jeʼel u tuklikoʼob ta woʼolal wa ka reconocertik juntaatsʼ le baʼax ta beetoʼ? ¿Baʼax jeʼel u tuklikoʼob ta woʼolal wa ka taʼakikeʼ?

Beoraaʼ kʼaʼajs baʼax maʼ maʼalob ta beetaj teʼ año máanik utiaʼal a núukik le kʼáatchiʼobaʼ:

¿Baʼax maʼ maʼalob ta beetiʼ? ¿Baʼax ta beetaj yoʼolal le baʼax úuchoʼ?

• Tin wilaj in taʼakik.

• Tin waʼalaj yaanal máax beete.

• Tin waʼalaj tu séebaʼanil.

¿Bix ta wuʼuyilaba wa maʼ ta reconocertaj baʼax maʼ maʼalob ta beetiʼ?

• Jach maʼalob, jóokʼen yéetel baʼax tin tuklaj.

• Maʼ maʼalobiʼ. Unaj in waʼalik u jaajil kaʼachi.

¿Baʼax maas maʼalob ka a beet kaʼachi?

¿Baʼax tsʼoʼok a kanik tiʼ le baʼax maʼ maʼalob ta beetoʼ?

¿Baʼaxten yaan horaeʼ maʼ chéen chʼaʼabil u reconocertik máak yaan baʼax maʼ maʼalob u beetmiʼ?

¿Baʼax jeʼel u tuklik u maasil ta woʼolal wa mantatsʼ ka taʼakik baʼax maʼ maʼalob ka beetkeʼ? Chéen baʼaleʼ ¿baʼax jeʼel u tuklikoʼob wa ka reconocertikeʼ? (Lucas 16:10).