KʼÁATCHIʼ 10
¿Jeʼel wa u yáantken le Bibliaoʼ?
¿BAʼAX JEʼEL A BEETKEʼ?
Tukulte: Davideʼ táan u bin tu coche tiʼ junpʼéel tuʼux maʼ u kʼaj óoliʼ. Ken u yil u kʼaabaʼ le bejoʼob bey xan le najoʼob yanoʼ, ku tsʼáaik cuenta maʼ tiʼ ku bin kaʼachiʼ. Tsʼoʼok u saʼatal. Maʼ tu tsʼáaj cuenta baʼax hora ka tu chʼaʼaj yaanal bejiʼ.
Wa teech Davideʼ, ¿baʼax jeʼel a beetkeʼ?
¡JEʼELKECH A TUKULTE!
Jeʼel u páajtal a beetik jejeláas baʼaloʼobeʼ:
-
A kʼáatik tiʼ wa máax bix jeʼel a kʼuchul teʼ tuʼux ka binoʼ.
-
A kaxtik tiʼ junpʼéel mapa wa u meyajtech GPS.
-
A seguertik a bin utiaʼal a wilik wa ka kaxtik le tuʼux unaj a bin kaʼachoʼ.
Le u yóoxpʼéeloʼ letiʼe maas maʼ maʼaloboʼ.
Le u kaʼapʼéeloʼ maas maʼalob tiʼ le yáaxoʼ. Tumen le GPS wa le mapaoʼ jeʼel u yáantkech utiaʼal kaxtik le tuʼux unaj a binoʼ.
Le Bibliaoʼ óoliʼ xan bey jeʼel u yáantkechoʼ.
Le jatsʼuts libroaʼ:
-
Jeʼel u yáantkech le ken yanaktech problemaʼobeʼ.
-
Jeʼel u nuʼuktikech tubeel yéetel jeʼel u yáantkech a weʼes jatsʼuts modoseʼ.
-
Jeʼel u yáantkech a bis junpʼéel maʼalob kuxtaleʼ.
U NÚUKIL LE PREGUNTAʼOB KU BEETIK MÁAKOʼ
Desde ken káajak k-tʼaaneʼ ku káajal k-beetik kʼáatchiʼob:
-
¿Baʼaxten azul le kaʼanoʼ?
-
¿Bix beetaʼanil le estrellaʼoboʼ?
Tsʼoʼoleʼ ken nuukchajkoʼoneʼ ku joʼopʼol k-tuklik:
-
¿Baʼaxten ku kíimil máak?
¿A wojel wa le Bibliaoʼ ku núukik le preguntaʼobaʼ?
Yaʼab máakoʼobeʼ ku yaʼalikoʼobeʼ teʼ Bibliaoʼ chéen tuusoʼob yaniʼ, maʼ tu yáantik máak bejlaʼeʼ yéetel talam u naʼataʼal. Chéen baʼaleʼ, ¿jaaj wa le baʼax ku yaʼalikoʼoboʼ? ¿Jaaj wa le baʼax aʼalaʼantiʼob yoʼolal le Bibliaoʼ?
Yaʼab máakoʼobeʼ ku yaʼalikoʼobeʼ Dios gobernartik le yóokʼol kaabaʼ, tumen ku tuklikoʼob bey u yaʼalik le Bibliaoʼ. Chéen baʼaleʼ, ¿jaaj wa le baʼax ku yaʼalikoʼoboʼ? Le yóokʼol kaabaʼ chuup yéetel muʼyajiloʼob, kʼojaʼaniloʼob, kíimil, óotsilil yéetel nukuch loobiloʼob. Wa u yaabiltmoʼon Dioseʼ, ¿jeʼel wa u beetik u yúuchul le baʼaloʼobaʼ?
¿A kʼáat wa a wojéelt máax jach tu jaajil gobernartik le yóokʼol kaabaʼ? Ilawil baʼax ku yaʼalik le Biblia tu yoʼolaloʼ.
Maʼ xaaneʼ tsʼoʼok a wilkeʼ tuláakal le baʼaxoʼob ku kaʼansik le folletoaʼ tiʼ chʼaʼabaʼan teʼ Bibliaoʼ. U j-jaajkunajoʼob Jéeobaeʼ ku creertikoʼobeʼ jeʼel u yáantik máak le Bibliaoʼ, tumen «Dios tsʼáa tu tuukul máak utiaʼal ka tsʼíibtaʼak, maʼalob utiaʼal kaʼansaj, utiaʼal u yaʼalaʼal u nuʼuk tiʼ máak, utiaʼal tojkíinaj» (2 Timoteo 3:16, 17). Ilawil a kʼaj óoltik le baʼax ku yaʼalik le jatsʼuts libroaʼ.