12 Xookil

 ¿Baʼax ku yúuchul tiʼ máak ken kíimik?

Ken kíimik máakeʼ xuʼulul ku beetik u kuxtal. Ken kíimik máakeʼ bey ka tʼúubuk u weenleʼ (Juan 11:11-14). Le kimenoʼoboʼ maʼ tu páajtal u yuʼubikoʼob mix baʼal, mix u tʼaanoʼob mix u tuukuloʼob (Eclesiastés 9:5, 10). Le religionoʼob maʼatech u kaʼanskoʼob u jaajiloʼ ku yaʼalikoʼobeʼ ken kíimik máakeʼ u pixaneʼ ku bin tuʼux yaan u láakʼtsiloʼob tsʼoʼok u kíimloʼoboʼ. Baʼaleʼ lelaʼ maʼ letiʼe baʼax ku kaʼansik le Bibliaoʼ.

Le máaxoʼob tsʼoʼok u kíimloʼoboʼ maʼ tu páajtal u yáantkoʼob máak mix u beetkoʼob kʼaas tiʼ. Bejlaʼeʼ le máakoʼoboʼ yaʼab baʼaloʼob suuk u beetkoʼob, tumen ku tuklikoʼobeʼ láayliʼ kuxaʼan le kimenoʼoboʼ. Baʼaleʼ Dioseʼ maʼ utstutʼaan ka beetaʼak le baʼaloʼobaʼ tumen lelaʼ upʼéel bix u tusik Satanás le máakoʼoboʼ. Le baʼaloʼob suuk u beetaʼalaʼ chéen kuneloʼob, tumen le máaxoʼob tsʼoʼok u kíimloʼoboʼ maʼ tu páajtal u yilkoʼob. Le oʼolaleʼ maʼ unaj k-chʼaʼik saajkil tiʼ le kimenoʼoboʼ mix k-adorarkoʼobiʼ. Chéen Dios unaj k-adorartik (Mateo 4:10).

Le máaxoʼob tsʼoʼok u kíimloʼoboʼ yaan u kaʼa kuxtaloʼob. Maʼ kun xáantaleʼ, Jéeobaeʼ yaan u kaʼa kuxkíintik le máaxoʼob tsʼoʼok u kíimloʼob utiaʼal ka yanakoʼob tiʼ upʼéel Paraíso way Luʼumeʼ (Juan 5:28, 29; Beetaʼanoʼob [Hechos] 24:15). Jeʼex toʼon jeʼel u páajtal k-ajsik utúul máak táan u weenleʼ, Jéeobaeʼ jeʼel u páajtal u yajsik le máaxoʼob tsʼoʼok u kíimloʼoboʼ (Marcos 5:22, 23, 41, 42).

Satanaseʼ ku beetik u creertaʼal yaan baʼax ku pʼáatal kuxaʼanil tiʼ máak ken kíimik. Satanás yéetel u kʼasaʼan angeloʼobeʼ ku beetkoʼob u creertaʼaleʼ u pixan le kimenoʼoboʼ jeʼel u beetkoʼob u kʼojaʼantal máakeʼ yéetel jeʼel u beetkoʼob uláakʼ baʼaloʼob kʼaastakeʼ. Utiaʼal u tusik máakeʼ Satanaseʼ yaan kʼiineʼ ku beetik u yilaʼal le máaxoʼob tsʼoʼok u kíimloʼoboʼ. Le beetikeʼ Jéeobaeʼ ku yaʼalik maʼ maʼalob ka tʼaanak máak yéetel le kimenoʼoboʼ (Deuteronomio 18:10-12).