4 Xookil

 Bix jeʼel u páajtal a kʼaj óoltik Dioseʼ

Wa ka xokik le Bibliaoʼ yaan a kʼaj óoltik Dios. Úuchjeakileʼ, Dioseʼ tu yéeyaj jujuntúul máakoʼob utiaʼal ka u tsʼíibtoʼob le baʼaxoʼob u kʼáat ka ojéeltaʼakoʼ. Le baʼaxoʼob tu tsʼíibtoʼoboʼ tiaʼan teʼ Bibliaoʼ. Le oʼolaleʼ wa ka xokikeʼ yaan a kʼaj óoltik Dios. Le Bibliaoʼ u Tʼaan Dios tumen le baʼaxoʼob ku yaʼalikoʼ tiʼ Dios u taal. Jeʼel u páajtal k-creertik baʼax ku yaʼalikeʼ tumen Jéeobaeʼ maʼatech u tuus. Le Bibliaoʼ ku yaʼalik: «Jajal Dioseʼ maʼ tu páajtal u tuus.» (Hebreob 6:18.) Lelaʼ ku yeʼesiktoʼoneʼ le baʼax ku kaʼansik le Bibliaoʼ letiʼe u jaajiloʼ (Juan 17:17).

Le Bibliaoʼ upʼéel tiʼ le siibaloʼob maas jatsʼutstak u tsʼaamajtoʼon Diosoʼ. Bey upʼéel carta ku túuxtik utúul taatatsil tiʼ u paalaloʼob tumen jach u yaabiltmoʼobeʼ. Le Bibliaoʼ ku yaʼalikeʼ Dioseʼ yaan u sutik Paraísoi le Luʼum utiaʼal u kuxtal wíinikoʼ. Ku yaʼaliktoʼon xan baʼax tu beetaj Dios úuchi, baʼax ku beetik bejlaʼeʼ yéetel baʼax ken u beet maʼ kun xáantal tu yoʼolal u paalaloʼoboʼ. Le Bibliaoʼ ku yaʼaliktoʼon xan bix jeʼel k-aktáantik le talamiloʼoboʼ yéetel bix jeʼel u yantaltoʼon kiʼimak óolaleʼ (2 Timoteo 3:16, 17).

 U j-jaajkunajoʼob Jéeobaeʼ u amigoʼob Dios; letiʼobeʼ jeʼel u yáantkechoʼob a kʼaj óolt baʼax ku kaʼansik le Bibliaoʼ. Chéen kʼaʼabéet a waʼaliktiʼob a kʼáat a kan baʼax ku yaʼalik le Bibliaoʼ. Maʼ ken a boʼot a kaʼansaʼaliʼ (Mateo 10:8). Tsʼoʼoleʼ, jeʼel u páajtal a láakʼintkoʼob teʼ kúuchiloʼob tuʼux ku muchʼkubaʼoboʼ. U kʼaabaʼ le kúuchiloʼobaʼ u Najiloʼob Reino. Wa ka bin teʼ muchʼtáambaloʼoboʼ maas séeb ken a kʼaj óolt Dios.

Jeʼel u páajtal a kʼaj óoltik Dios ken tuukulnakech tiʼ le baʼaxoʼob u beetmoʼ. Le Bibliaoʼ ku yaʼalikeʼ Dioseʼ «tu beetaj kaʼanoʼob yéetel luʼum» (Génesis 1:1). Ka tu beetaj Jéeoba le kaʼanoʼoboʼ, tu beetaj xan le Kʼiinoʼ. ¿Baʼax ku kaʼansiktoʼon lelaʼ? Ku kaʼansiktoʼoneʼ Jéeobaeʼ jach yaan u muukʼ. Chéen letiʼ páajchaj u beetik upʼéel baʼax jach nojoch jeʼex le Kʼiinoʼ. Ku yeʼesik xan toʼoneʼ Jéeobaeʼ jach yaan u naʼat, tumen kʼaʼabéetchaj naʼat tiʼ utiaʼal u beetik le Kʼiinoʼ, le baʼax tsʼáaik sáasil mantatsʼ tiʼ le Luʼumoʼ.

Le baʼaxoʼob u beetmaj Jéeobaoʼ ku yeʼesik u yaabiltmoʼon. Tuukulnen tiʼ bukaʼaj u jejeláasil u yich cheʼ yaan way Luʼumeʼ. Wa Jéeoba u kʼáat kaʼacheʼ bejlaʼa maʼ tu tsʼáaiktoʼon mix upʼéel u yich cheʼiʼ. Baʼaleʼ u tsʼaamajtoʼon u jejeláasil, yaneʼeʼ nuuktak, mejentak, chʼujuktak, suʼutsʼtak yéetel jejeláas u coloriloʼob. Lelaʼ ku yeʼesikeʼ Jéeobaeʼ jach u yaabiltmoʼon yéetel jach uts t-éetel (Salmo 104:24).