1 Xookil

 Dioseʼ ku invitarkech utiaʼal ka a beetaba u amigo

Dioseʼ u kʼáat ka a beetaba u amigo. Techeʼ ¿a wojel wa jeʼel u páajtal a beetkaba u amigo Dios, le Máax beet tuláakal baʼaloʼ? Abraham, utúul máak kuxlaj úuchjeakileʼ, kʼuch kʼaj óoltbil bey u amigo Dioseʼ (Santiago 2:23). Le Bibliaoʼ ku tʼaan tiʼ uláakʼ máakoʼob tu bisubaʼob yéetel Dios yéetel jach bin utsiltiʼob. Teʼ kʼiinoʼobaʼ, yaʼab máakoʼob tsʼoʼok u kʼuchul u beetubaʼob u amigoʼob Dios. Techeʼ jeʼel u páajtal xan a beetkaba u amigoeʼ.

K-bisikba yéetel Dioseʼ maas maʼalob tiʼ k-bisikba yéetel k-éet máakil. Dioseʼ maʼatech u pʼatik kʼaasil le máaxoʼob jach u amigoʼoboʼ (Hebreob 13:5, 6). K-bisikba yéetel Dioseʼ maas maʼalob tiʼ u yantaltoʼon ayikʼalil. Tumen ken kíimik le máakoʼob ayikʼaloʼoboʼ yaanal máakoʼob xupik u taakʼinoʼob. Baʼaleʼ máax ku biskuba yéetel Dioseʼ ku yantal upʼéel baʼax jach koʼoj u tojol tiʼ yéetel mix máak jeʼel u páajtal u luʼsiktiʼeʼ (Mateo 6:19).

Maʼ xaaneʼ yaan máaxoʼob maʼ u kʼáatoʼob ka maas kaambalnakech tiʼ Diosiʼ. Maʼ xaaneʼ jujuntúul tiʼ le máakoʼobaʼ a amigoʼob wa a láakʼtsiloʼob (Mateo 10:36, 37). Wa yaan máax ku pʼaʼaskech wa ku yaʼalik u beetiktech loobeʼ, tukult lelaʼ: «¿Máax tiʼ in kʼáat lúubul utsil, tiʼ máakoʼob wa tiʼ Dios?». Tukult xan lelaʼ: Wa ka aʼalaʼaktech ka a pʼat a jaanleʼ, ¿jeʼel wa a beetkeʼ? ¿Máasaʼ maʼatan? Utiaʼal maʼ u kíimil máakeʼ kʼaʼabéet u janal. Bey túun xanoʼ, wa a kʼáat ka yanaktech le kuxtal minaʼan u xuul ku tsʼáaik Diosoʼ, kʼaʼabéet u seguer a kanik bix jeʼel u páajtal a beetkaba u amigoeʼ yéetel maʼ a chaʼik tiʼ mix máak ka u beet a pʼatik (Juan 17:3).