2 Xookil

 Dioseʼ letiʼe maas maʼalob amigo jeʼel u yantaltechoʼ

A beetkaba u amigo Dioseʼ letiʼe baʼax maas maʼalob jeʼel u páajtal a beetkoʼ. Dioseʼ yaan u yeʼesiktech bix jeʼel u yantaltech kiʼimak óolaleʼ, yaan u yáantkech utiaʼal ka a náachkuntaba tiʼ kaʼansajoʼob maʼ jaajtakoʼobiʼ bey xan tiʼ baʼaloʼob jeʼel u beetkoʼobtech loobeʼ. Yaan u yuʼubik le oracionoʼob ka beetkoʼ. Yaan u tsʼáaiktech jeetsʼelil yéetel yaan u yáantkech utiaʼal ka jóokʼok maʼalob le baʼaxoʼob ka chʼaʼatuklik a beetkoʼ (Salmo 71:5; 73:28). Ken yanaktech talamiloʼobeʼ, letiʼeʼ yaan u yáantkech (Salmo 18:18). Tsʼoʼoleʼ, Dioseʼ ku yaʼalik u tsʼáaiktech kuxtal minaʼan u xuul (Romailoʼob 6:23).

Ken a beetaba u amigo Dioseʼ ka natsʼkaba xan tu yiknal le máaxoʼob u amigoʼoboʼ. U amigoʼob Dioseʼ yaan u beetkubaʼob xan a amigoʼob. Yaan a wilkoʼob bey a láakʼtsiloʼobeʼ. Yaan u líiʼskoʼob a wóol yéetel yaan u yáantkechoʼob a maas kʼaj óolt Dios.

Maʼ tu páajtal u ketikuba máak yéetel Dios. Ken káajak a biskaba yéetel Dioseʼ yaan upʼéel baʼal kʼaʼabéet a kʼaʼajsik: maʼ tu páajtal a ketkaba tu yéetel. Letiʼeʼ maas yaan u jaʼabil, maas nojoch u naʼat bey xan u páajtalil. Chéen letiʼ unaj u gobernarkoʼon. Le oʼolaleʼ utiaʼal a beetkaba u amigo Dioseʼ kʼaʼabéet a beetik baʼax utstutʼaan. Wa ka beetik baʼax ku yaʼalikeʼ yaan u bintech utsil mantatsʼ (Isaías 48:18).