6 Xookil

 ¡Jach natsʼaʼan u kʼiinil u yantal upʼéel Paraíso!

Le baʼaloʼob kʼaastak ku yúuchul way yóokʼol kaabeʼ ku yeʼeskoʼob jach natsʼaʼan u kʼiinil u yantal upʼéel Paraíso. Le Bibliaoʼ úuch u yaʼal yaan u yilaʼal talam kʼiinoʼob táanil tiʼ u suʼutul paraísoi le Luʼumaʼ. Bejlaʼeʼ kuxaʼanoʼon teʼ talam kʼiinoʼoboʼ. Koʼox ilik jujumpʼéel tiʼ le baʼaxoʼob aʼalaʼan kun ilbiloʼ.

Nukuch baʼateloʼob. «Jumpʼéel kaajeʼ yaan u bin [...] baʼateʼel tiʼ uláakʼ kaaj.» (Mateo 24:7.) Le baʼax ku yaʼalik le Bibliaaʼ tsʼoʼok u béeytal. Desde tu jaʼabil 1914 tsʼoʼok u yantal kaʼapʼéel nukuch baʼateloʼob yéetel tsʼoʼok xan u yantal yaʼab uláakʼ baʼateloʼob. Teʼ baʼateloʼobaʼ yaʼab máakoʼob tsʼoʼok u kíimsaʼaloʼobiʼ.

Kʼaakʼas kʼojaʼaniloʼob. Yaan u yantal «kʼojaʼaniloʼob tiʼ jejeláas [tuʼuxoʼob]» (Lucas 21:11). ¿Táan wa u béeytal lelaʼ? Táan. Le canceroʼ, le kʼojaʼaniloʼob ku yantal tu puksiʼikʼal máakoʼ, le tuberculosisoʼ, le paludismooʼ, le sida yéetel uláakʼ kʼojaʼaniloʼoboʼ tsʼoʼok u kíimskoʼob u millonesi máakoʼob.

Wiʼijil. Tiʼ tuláakal yóokʼol kaabeʼ yaʼab máakoʼob táan u máanskoʼob wiʼijil. Cada jaʼabeʼ yaʼab máaxoʼob ku kíimloʼob tumen minaʼan baʼal u jaantoʼob. Lelaʼ ku yeʼesik xan jach tsʼoʼok u náatsʼal u kʼiinil u yantal upʼéel Paraíso. Le Bibliaoʼ ku yaʼalik: «Yaan xan u yantal wiʼijiloʼob» (Marcos 13:8).

 U tíitkuba luʼum. Yaan u «kíilbal luʼum jejeláas tuʼuxoʼob» (Mateo 24:7). Bejlaʼeʼ táan xan u yilaʼal lelaʼ. Desde tu jaʼabil 1914 maas tiʼ upʼéel millón máakoʼob tsʼoʼok u kíimloʼob ikil u tíitkuba le luʼumoʼ.

Kʼasaʼan máakoʼob. Le máakoʼoboʼ «bíin u yaabiltoʼob taakʼin» yéetel «bíin tsʼuʼutchajkoʼob». Le máakoʼoboʼ maas yaan u yaabiltkoʼob u kʼaakʼas tsʼíibolaloʼob ke Dios. Le paalaloʼoboʼ maʼ ken u «yuʼuboʼob u tʼaan u taataʼob» (2 Timoteo 3:1-5). Teʼ kʼiinoʼobaʼ, ¿máasaʼ jach yaʼab máakoʼob beyoʼobaʼ? Maʼ tu beetkoʼob baʼax ku yaʼalik Jéeoba mix xan tu chaʼikoʼob u kaambal uláakʼ máakoʼob tiʼ Dios.

U sen beetaʼal baʼaloʼob kʼaastak. Jach yaan u yantal yaʼab máakoʼob kʼasaʼantakoʼob (Mateo 24:12). Maʼ xaaneʼ tak teech tsʼoʼok a tsʼáaik cuentaeʼ jach yaʼab máakoʼob kʼasaʼantakoʼob yaan teʼ kʼiinoʼobaʼ. Tuláakal tuʼuxeʼ séeb u yoklaʼal, u tuʼusul wa u beetaʼal loob tiʼ máak.

Tuláakal le baʼaxoʼob ku yilaʼalaʼ ku yeʼeskoʼob tsʼoʼok u náatsʼal u Reino Dios. Le Bibliaoʼ ku yaʼalik: «Ken a wileʼex táan u yúuchul le baʼaloʼobaʼ, ojéelteʼex u [reino] Jajal Dioseʼ naatsʼ yanil» (Lucas 21:31). Baʼaleʼ ¿baʼax u Reino Dios? Letiʼe u gobierno Dios yaan teʼ kaʼanoʼ. Le gobiernoaʼ yaan u sutik paraísoi le Luʼumaʼ yéetel yaan u luʼsik tuláakal le gobiernoʼob yaan way Luʼumeʼ (Daniel 2:44).