3 Xookil

 Kʼaʼabéet a kʼaj óoltik Dios

Utiaʼal a beetkaba u amigo Dioseʼ kʼaʼabéet a kʼaj óoltik tubeel. A amigoʼobeʼ u yojloʼob a kʼaabaʼ yéetel ku tʼankechoʼob ta kʼaabaʼ, ¿máasaʼ? Dioseʼ u kʼáat xan ka a kʼaj óolt u kʼaabaʼ yéetel ka a chʼaʼachiʼite. U kʼaabaʼ Dioseʼ Jéeoba (Salmo 83:18, NM; Mateo 6:9). Kʼaʼabéet xan a wojéeltik baʼax utstutʼaan yéetel baʼax maʼ utstutʼaaniʼ, máaxoʼob u amigoʼob yéetel máaxoʼob maʼatech. U kʼaj óoltaʼal tubeel utúul máakeʼ ku bisik yaʼab kʼiinoʼob, le oʼolaleʼ le Bibliaoʼ ku yaʼalikeʼ unaj a jóoʼsik u súutukil utiaʼal a kʼaj óoltik tubeel Jéeoba (Efesoiloʼob 5:15, 16).

U amigoʼob Dioseʼ ku beetkoʼob baʼax utstutʼaan. Tuukulnen tiʼ a amigoʼob. Wa mantatsʼ ka beetik u kʼuuxiloʼob bey xan wa ka beetik baʼax maʼ utstutʼaanoʼobeʼ, ¿jeʼel wa u seguer u biskubaʼob ta wéeteleʼ? ¿Máasaʼ maʼ? Bey túun xanoʼ wa a kʼáat a beetaba u amigo Dioseʼ kʼaʼabéet a beetik baʼax utstutʼaan (Juan 4:24).

Maʼ tuláakal le religionoʼob jeʼel u yáantkoʼob máak u beetuba u amigo Diosiʼ. Jesucristo, u maas maʼalob amigo Dioseʼ, tʼaanaj tiʼ kaʼapʼéel bej. Upʼéeleʼ kóoch yéetel yaʼab máakoʼob ku biniʼ. Le bejaʼ ku bisik máak tiʼ xuʼulsajil. Uláakʼoʼ nuʼutʼ yéetel chéen upʼíit máakoʼob ku biniʼ. Le bejaʼ ku bisik máak tiʼ kuxtal minaʼan u xuul. Lelaʼ ku yeʼesikeʼ wa a kʼáat a bisaba yéetel Dioseʼ kʼaʼabéet a kanik bix u kʼáat ka adorartaʼak (Mateo 7:13, 14).