11 Xookil

 Kʼaʼabéet k-náachtal tiʼ le religionoʼob maʼ tu kaʼanskoʼob u jaajiloʼ

Satanás yéetel u kʼasaʼan angeloʼobeʼ maʼ u kʼáatoʼob ka k-adorart Diosiʼ. Ku yilik u náachkuntkoʼob yaʼab máakoʼob tiʼ Dios. ¿Bix u beetkoʼob? Ku meyajtiʼob le religionoʼob maʼatech u kaʼanskoʼob u jaajiloʼ (2 Corintoiloʼob 11:13-15). Le religionoʼobaʼ, maʼatech u kaʼanskoʼob baʼax ku yaʼalik le Bibliaoʼ yéetel beyoʼob jeʼex le taakʼin falsooʼ: bey maʼalob taakʼineʼ, baʼaleʼ mix baʼal u beelal. Jeʼel tak u yoksik máak ich talamileʼ.

Jéeobaeʼ u pʼekmaj le religionoʼob ku kaʼanskoʼob baʼaloʼob maʼ jaajtakoʼ, tumen letiʼeʼ maʼatech u tuus. Ka taal Jesús way Luʼumeʼ, u nuuktakil le religionoʼoboʼ tu yóotoʼob u kíimsoʼob. Le máakoʼobaʼ ku tuklikoʼob kaʼacheʼ maʼalob bix u adorarkoʼob Dios. Letiʼobeʼ tu yaʼaloʼob: «Juntúuliliʼ taata yaan tiʼ toʼon, lelaʼ Jajal Dios». Baʼaleʼ, ¿baʼax kaʼach ku tuklik Jesús tu yoʼolaloʼob? Letiʼeʼ tu yaʼalaj: «Teʼexeʼ utiaʼaleʼex kʼasilbaʼal, tumen letiʼ a taataʼex» (Juan 8:41, 44). Bejlaʼa xaneʼ yaʼab máakoʼob ku tuklikoʼob táan u adorarkoʼob Dios, baʼaleʼ u jaajileʼ táan u adorarkoʼob Satanás yéetel u kʼasaʼan angeloʼob (1 Corintoiloʼob 10:20).

 Le religionoʼob maʼatech u kaʼanskoʼob u jaajiloʼ beyoʼob ukúul cheʼ maʼatech u tsʼáaik maʼalob icheʼ. Teʼ yóokʼol kaabaʼ jach yaʼab talamiloʼob yaan yoʼolal le baʼaloʼob kʼaastak ku beetaʼaloʼ. Bejlaʼeʼ ku beetaʼal baʼaloʼob subtsiltak, ku baʼateʼel le máakoʼoboʼ, ku yookoloʼob, ku beetaʼal kʼaas tiʼ le óotsiloʼoboʼ, yaʼab máakoʼob ku kíimskoʼob u yéet máakiloʼob yéetel yaʼab u beetaʼal uláakʼ baʼaloʼob kʼaastak. Yaʼab tiʼ le máakoʼob beetik le baʼaloʼobaʼ yaan u religionoʼob, baʼaleʼ maʼatech u kaʼansaʼaltiʼob u beetoʼob baʼax utstutʼaan Dios. Maʼ tu páajtal u biskubaʼob yéetel Dios, tumen maʼ tu xuʼulul u beetkoʼob baʼaloʼob kʼaastak (Mateo 7:17, 18).

Le religionoʼob maʼatech u kaʼanskoʼob u jaajiloʼ ku yaʼalkoʼob kʼaʼabéet u orar máak tiʼ imagenoʼob. Dioseʼ ku yaʼalikeʼ maʼ maʼalob ka orarnakoʼon tiʼ imagenoʼobiʼ. Le baʼax ku yaʼalikaʼ jach maʼalob. Tumen, ¿bix jeʼel a wuʼuykaba wa utúul máakeʼ ku tʼaan yéetel a foto, baʼaleʼ maʼatech u tsikbal ta wéetel? ¿Jeʼel wa u páajtal a amigotikeʼ? Maʼatan. Jéeobaeʼ u kʼáat ka orarnak máak chéen tiʼ letiʼ, maʼ tiʼ imagenoʼobiʼ (Éxodo 20:4, 5).

Le religionoʼob maʼatech u kaʼanskoʼob u jaajiloʼ ku yaʼalikoʼobeʼ maʼ kʼaas u kíimsik máak u yéet máakil ken yanak nukuch baʼateloʼobiʼ. Jesuseʼ tu yaʼaleʼ u amigoʼob Dioseʼ yaan u paklan yaabiltkubaʼob. Le oʼolaleʼ maʼatech u kíimskoʼob u yéet máakiloʼob (Juan 13:35). Kex kʼasaʼan utúul máakeʼ maʼ maʼalob ka kíimsaʼakiʼ. Le ka maʼach Jesús utiaʼal kíimsbileʼ, letiʼeʼ maʼ tu chaʼaj u baʼateʼel u disipuloʼobiʼ (Mateo 26:51, 52).

Le religionoʼob maʼatech u kaʼanskoʼob u jaajiloʼ ku yaʼalikoʼobeʼ le máaxoʼob kʼasaʼanoʼoboʼ ku muʼyajoʼob tiʼ upʼéel infierno. Baʼaleʼ le Bibliaoʼ ku yaʼalikeʼ u boʼolil le kʼebanoʼ kíimil (Romailoʼob 6:23). Jéeobaeʼ jach nojoch u yaabilaj. Le oʼolaleʼ, ¿jeʼel wa u beetik u muʼyaj le máakoʼob tiʼ upʼéel infiernooʼ? Maʼatan. Maʼ kun xáantaleʼ chéen le religión ku beetik baʼax u kʼáat Jéeoba kun pʼáatal way Luʼumeʼ (Apocalipsis 15:4). Tuláakal le uláakʼ religionoʼob ku kaʼanskoʼob le baʼax utstutʼaan Satanasoʼ yaan u láaj xuʼulsaʼaloʼob.