8 Xookil

 ¿Máaxoʼob u enemigoʼob Dios?

Satanaseʼ letiʼe u maas nojoch enemigo Diosoʼ. Letiʼeʼ utúul ángel tu tsʼáajuba tu contra Jéeoba. Satanaseʼ tak bejlaʼa u tsʼaamuba tu contra Dioseʼ, ku beetik u sen muʼyaj le máakoʼoboʼ, jach kʼasaʼan, yaʼab u tuus yéetel «utúul kíimsaj wíinik» (Juan 8:44).

Yaan uláakʼ angeloʼob tu nupubaʼob yéetel Satanás. Teʼ Bibliaoʼ tiʼ le angeloʼobaʼ ku yaʼalaʼaltiʼob kʼaakʼas pixanoʼob. Jeʼex Satanaseʼ, letiʼobeʼ jach u pʼekmoʼob wíinik le oʼolal ku beetkoʼob u muʼyaj (Mateo 9:32, 33; 12:22). Jéeobaeʼ yaan u xuʼulsik tiʼ Satanás yéetel tiʼ le kʼasaʼan angeloʼobaʼ. Maʼ kun xáantal ken xuʼuluk u beetkoʼob u muʼyaj wíinik (Apocalipsis 12:12).

Wa a kʼáat a beetaba u amigo Dioseʼ, maʼ unaj a beetik le baʼax utstutʼaan Satanasoʼ. Satanás yéetel u kʼasaʼan angeloʼobeʼ jach u pʼekmoʼob Jéeoba yéetel u kʼáatoʼob xan ka a tsʼáaba tu contra. Le beetikeʼ, unaj a tuklik tiʼ máax a kʼáat lúubul utsil: tiʼ Satanás wa tiʼ Jéeoba. Wa a kʼáat kuxtal minaʼan u xuuleʼ unaj a beetik le baʼax ku yaʼalik Diosoʼ. Satanaseʼ mantatsʼ táan u yilik bix jeʼel u tuskoʼoneʼ yéetel jejeláas baʼaxoʼob ku meyajtiʼ utiaʼal u beetik (Apocalipsis 12:9).