13 Xookil

 Maʼ maʼalob u yokskuba máak tiʼ espiritismoiʼ

Satanaseʼ u kʼáat ka woksaba tiʼ baʼaloʼob yaan yil yéetel le espiritismooʼ. Yaʼab máakoʼobeʼ ku tʼalkúuntkoʼob janal yéetel ku beetkoʼob uláakʼ baʼaloʼob tumen saajkoʼob u beetaʼal loob tiʼob tumen le kʼaakʼas iikʼoʼob wa kʼaakʼas pixanoʼoboʼ. Letiʼobeʼ ku chʼuykíintkoʼob xan baʼaloʼob tu kaaloʼob wa tu kʼaboʼob. Ku binoʼob tu yiknal utúul j-meen utiaʼal ka santiguartaʼakoʼob wa utiaʼal ka tsʼaʼabaktiʼob «tsʼaakoʼob». Uláakʼoʼobeʼ ku mukikoʼob wa ku chʼuykíintkoʼob baʼaloʼob tu yotochoʼob tumen ku tuklikoʼob jeʼel u kanáantaʼaloʼob tumen le baʼaloʼobaʼ, wa ku meyajtiʼob uláakʼ baʼaloʼob utiaʼal u bintiʼob utsil tu negocioʼob. Wa yaan máax xan utstuyich utúul chʼúupal wa utúul xiʼipaleʼ ku polvostik wa ku hechizartik utiaʼal ka tsʼoʼokok u beel tu yéetel.

Utiaʼal a kanáantkaba tiʼ Satanaseʼ unaj a beetkaba u amigo Jéeoba. Jéeoba yéetel u angeloʼobeʼ maas yaan u muukʼoʼob ke Satanás yéetel u kʼasaʼan angeloʼob (Santiago 2:19; Apocalipsis 12:9). Tsʼoʼoleʼ Jéeobaeʼ u kʼáat xan u yáant le máaxoʼob u amigoʼoboʼ (2 Crónicas 16:9).

Le Bibliaoʼ ku yaʼalik: «Maʼ a beetikabaʼex j-meenil». Jéeobaeʼ ku yaʼalikeʼ jach upuliʼ maʼ maʼalob tuláakal le baʼaxoʼob yaan yil yéetel le espiritismooʼ. Le máaxoʼob ku yokskubaʼob tiʼ espiritismooʼ táan u tsʼáaikubaʼob yáanal u páajtalil le Kʼaasilbaʼaloʼ (Levítico 19:26).