5 Xookil

 U amigoʼob Dioseʼ yaan u kajtaloʼob teʼ Paraísooʼ

Le Paraíso kun antaloʼ maʼ bey jeʼex le yóokʼol kaab bejlaʼaʼ. Dioseʼ maʼ u kʼáat kaʼach ka yanak talamiloʼob yéetel muʼyajiloʼob way Luʼumeʼ. Le oʼolaleʼ, maʼ kun xáantaleʼ yaan u sutik paraísoi le Luʼumaʼ. ¿Bix le paraíso kun antaloʼ? Koʼox ilik baʼax ku yaʼalik le Bibliaoʼ.

Yaan u yantal utsul máakoʼob. U amigoʼob Dioseʼ yaan u kajtaloʼob teʼ paraísooʼ. Yaan u paklan áantkubaʼob yéetel yaan u kuxtaloʼob jeʼex u kʼáat Jéeobaeʼ (Proverbios 2:21).

Yaan u yantal yaʼab baʼal jaantbil. Teʼ Paraísooʼ, mix máak ken u máans wiʼijil. Le Bibliaoʼ ku yaʼalik: «Ka yanak yaʼabkach baʼal jaantbil teʼ kaajoʼoboʼ» (Salmo 72:16).

Yaan u yantal maʼalob najoʼob yéetel maʼalob meyajoʼob. Teʼ Paraísooʼ, tuláakal le familiaʼoboʼ yaan u yantal u yotochoʼob, yéetel tiʼ tuláakal máakeʼ yaan u yantal upʼéel meyaj ken u taas kiʼimak óolal tiʼ (Isaías 65:21-23).

 Maʼ kun antal baʼateloʼob. Mix máak kun baʼateʼel yéetel mix máak kun kíimil yoʼolal le baʼateloʼoboʼ. Le Bibliaoʼ ku yaʼalik: «[Dioseʼ] tsʼoʼok u tsʼáaik xuul tiʼ le baʼateloʼob[oʼ]» (Salmo 46:8, 9).

Yaan u yantal toj óolal. Le Bibliaoʼ ku yaʼalik: «Mix juntúul kajnáal [teʼ Paraíso] bíin u yaʼal: Kʼojaʼanen» (Isaías 33:24). Maʼ xan kun antal móochoʼob, chʼóopoʼob, kóokoʼob mix tootoʼobiʼ (Isaías 35:5, 6).

Maʼ kun antal muʼyajil mix kíimil. Le Bibliaoʼ ku yaʼalik: «Maʼ túun yantal kíimil, mix okʼol, mix yaj óolal, mix kʼiʼinamil, tumen tuláakal baʼax yaan kaʼacheʼ tsʼoʼok u máan» (Apocalipsis 21:4).

Maʼ kun antal kʼasaʼan máakoʼob. Jéeobaeʼ ku yaʼalik: «Le loolob máakoʼob yéetel le j-kaʼapʼéel ichoʼoboʼ bíin jóokʼesaʼakoʼob, bíin tojolchʼintaʼakoʼob xan» (Proverbios 2:22).

Le máakoʼoboʼ yaan u paklan yaabiltkubaʼob. Maʼ kun beetbil baʼaloʼob kʼaastakiʼ, mix máak ken u beet u muʼyaj yaanal máak, mix máak ken u kaxt chéen u yutsiliʼ yéetel mix máak ken u pʼektuba. Le máakoʼoboʼ yaan u biskubaʼob maʼalob yéetel yaan u kuxtaloʼob jeʼex u kʼáat Dioseʼ (Isaías 26:9).