7 Xookil

 Upʼéel baʼax maʼ unaj k-tuʼubskiʼ

Jéeobaeʼ maʼ ken u chaʼa u kʼaskúuntaʼal le Paraísooʼ. Teʼ Paraísooʼ chéen u amigoʼob Jéeoba kun kajtaloʼobiʼ. ¿Baʼax kun úuchul tiʼ le kʼasaʼan máakoʼoboʼ? Utiaʼal k-ilikeʼ koʼox kʼaʼajsik le baʼax úuch tu kʼiiniloʼob Noeoʼ. Letiʼ kaʼacheʼ jach uts yéetel jach tu tsʼáaj u yóol u meyajt Dios. Baʼaleʼ le máakoʼob kuxlajoʼob tu kʼiiniloʼ jach tu beetoʼob baʼaloʼob kʼaastak. Le beetikeʼ Jéeobaeʼ tu yaʼalaj tiʼ Noé yaan u taasik upʼéel Búulkabal utiaʼal u xuʼulsik tiʼ le máakoʼobaʼ. Tu yaʼalaj xan tiʼ ka u beet upʼéel arca utiaʼal u salvarkuba letiʼ yéetel u familia le ken taalak le Búulkabaloʼ (Génesis 6:9-18).

Noé yéetel u familiaeʼ tu beetoʼob le arcaoʼ. Noeeʼ tu yaʼalaj tiʼ le máakoʼob yaan u taal upʼéel Búulkabaloʼ, baʼaleʼ mix máak creerte. Le máakoʼoboʼ maʼ xuʼul u beetkoʼob baʼaloʼob kʼaastakiʼ. Ka tsʼoʼok u beetik le arcaoʼ tu yoksaj le baʼalcheʼoboʼ, ka ook xan letiʼ yéetel u familiaiʼ. Jéeoba túuneʼ tu beetaj u taal upʼéel kʼaʼamkach jaʼ. Le jaʼoʼ kʼáax ich cuarenta kʼiinoʼob yéetel cuarenta áakʼaboʼob, ka búul tuláakal yóokʼol kaab (Génesis 7:7-12).

 Le kʼasaʼan máakoʼoboʼ kíimoʼob, baʼaleʼ Noé yéetel u familiaeʼ tu salvartubaʼob. Ka taal le Búulkabaloʼ Jéeobaeʼ tu salvartaj Noé yéetel u familia. Baʼaleʼ tuláakal le máakoʼob kʼasaʼantakoʼoboʼ kíimoʼob (Génesis 7:22, 23). Le Bibliaoʼ ku yaʼalikeʼ yaan u kʼuchul u kʼiinil u kaʼa xuʼulsaʼal tiʼ le máakoʼob kʼasaʼantakoʼoboʼ. Baʼaleʼ le máakoʼob utsoʼoboʼ yaan u salvarkubaʼob yéetel yaan u kuxtaloʼob tiʼe luʼum sutaʼan Paraísoiloʼ (2 Pedro 2:5, 6, 9).

Bejlaʼeʼ yaʼab máakoʼob beetik baʼaloʼob kʼaastak. Le yóokʼol kaabaʼ chuup yéetel máakoʼob kʼasaʼantakoʼob. Jéeobaeʼ mantatsʼ ku túuxtik le máaxoʼob meyajtik utiaʼal ka u yaʼaloʼob tiʼ le máakoʼob maʼ kun xáantal ken u taas upʼéel xuʼulsajiloʼ, baʼaleʼ yaʼab máakoʼobeʼ maʼ tu creerkoʼob. Maʼ xan u kʼáat u kʼex u kuxtaloʼobiʼ mix ka aʼalaʼaktiʼob tumen Dios baʼax maʼalob yéetel baʼax maʼ maʼalobiʼ. ¿Baʼax túun kun úuchul tiʼ le máakoʼobaʼ? ¿Yaan wa u kʼexik u kuxtaloʼob? Yaʼabeʼ maʼ ken u yóote. Bejlaʼeʼ jach tsʼoʼok u náatsʼal u kʼiinil u xuʼulsaʼal tiʼ le kʼasaʼan máakoʼoboʼ (Salmo 92:7).

Maʼ kun xuʼulsbil tiʼ le Luʼumoʼ, baʼaxeʼ yaan u suʼutul upʼéel Paraíso. Chéen u amigoʼob Jéeoba kun pʼáatloʼob kajtal way luʼum tiʼ upʼéel paraísooʼ (Salmo 37:29).